Wayne Rooney រិះគន់កម្មវិធីប្រគំតន្ត្រីពាក់កណ្តាលតង់ (Halftime Show) វគ្គផ្តាច់ព្រ័ត្រ World Cup ថា «គ្មានបានការ» ទោះបីជាមានការចូលរួមពីតារាកំពូលៗដូចជា Madonna, Shakira និង Justin Bieber ក៏ដោយ
អត្ថបទសរសេរដោយ Danny • 34 views
អតីតប្រធានក្រុមជម្រើសជាតិអង់គ្លេស និងជាវីរបុរសក្លិប Manchester United លោក Wayne Rooney បានផ្តល់ការវាយតម្លៃយ៉ាងចាស់ដៃទៅលើកម្មវិធីសម្តែងតន្ត្រីពាក់កណ្តាលតង់លើកដំបូងបង្អស់ក្នុងប្រវត្តិសាស្ត្រវគ្គផ្តាច់ព្រ័ត្រ World Cup ដោយលោកបានសារភាពថា លោកពិតជាចង់ឱ្យតន្ត្រីនោះចប់ឆាប់ៗតាមដែលអាចធ្វើទៅបាន។ លោកមិនពេញចិត្តទាល់តែសោះចំពោះការបង្ហាញខ្លួនដ៏កក្រើកនៅកីឡដ្ឋាន MetLife Stadium ពីសំណាក់កំពូលតារាចម្រៀងលំដាប់ពិភពលោកជាច្រើនរូប។
នៅក្នុងព្រឹត្តិការណ៍វគ្គផ្តាច់ព្រ័ត្រ World Cup ២០២៦ រវាងអេស្ប៉ាញ និងអាហ្សង់ទីន សហព័ន្ធ FIFA បានសម្រេចចិត្តដាក់បញ្ចូលកម្មវិធីប្រគំតន្ត្រីពាក់កណ្តាលតង់បែបអាមេរិក (Super Bowl-style) ជាលើកដំបូង។ កម្មវិធីរយៈពេល ១១ នាទីនេះត្រូវបានរៀបចំឡើងដោយលោក Chris Martin (មេក្រុម Coldplay) ព្រមទាំងមានការចូលរួមសម្តែងពីតារាល្បីៗដូចជា Madonna, Shakira, Justin Bieber, ក្រុម BTS, Burna Boy រួមទាំងតួអង្គ Muppets និង Sesame Street ផងដែរ ដើម្បីស្វែងរកថវិការហូតដល់ ១០០ លានដុល្លារសម្រាប់មូលនិធិអប់រំសកលលោករបស់ FIFA (Global Citizen Education Fund)។
នៅក្នុងតួនាទីជាអ្នកវិភាគបាល់ទាត់ឱ្យទូរទស្សន៍ BBC ជាមួយអតីតតារាឆ្នើម Man City លោក Micah Richards និង Joe Hart ពិធីការិនី Gabby Logan បានសួរ Rooney ថាតើលោកពេញចិត្តចំណុចណាមួយជាងគេនៃការសម្តែងនោះ។ អតីតខ្សែប្រយុទ្ធរូបនេះបានឆ្លើយតបយ៉ាងខ្លី និងចំៗថា៖
«បើឱ្យខ្ញុំនិយាយត្រង់ៗ ចំណុចដែលខ្ញុំពេញចិត្តជាងគេ គឺនៅពេលដែលវា [ការសម្តែង] ត្រូវបានបញ្ចប់។
ខ្ញុំចូលចិត្តសិល្បករជាច្រើនរូបនៅក្នុងនោះ ប៉ុន្តែខ្ញុំគិតថាការសម្តែងនោះគឺគ្មានបានការ (Crap) វាមិនបានធ្វើឱ្យខ្ញុំរំភើប ឬមានអារម្មណ៍ចង់ទស្សនាទាល់តែសោះ ហើយខ្ញុំគ្រាន់តែចង់ឱ្យការប្រកួតបាល់ទាត់ឆាប់ចាប់ផ្តើមឡើងវិញតែប៉ុណ្ណោះ។ ខ្ញុំចូលចិត្ត Burna Boy, ចូលចិត្ត Bieber, ចូលចិត្ត Shakira ប៉ុន្តែការរៀបចំអំបាញ់មិញនេះគឺវាស្ងាត់ និងសោះកក្រោះពេក (Too flat)»។
បន្ទាប់ពីឮបែបនេះ លោក Micah Richards បាននិយាយបង្អាប់ Rooney លេងៗថា ជាមនុស្ស «គួរឱ្យធុញទ្រាន់ និងមានចិត្តចង្អៀត» (Miserable) ដែលមិនព្រមបើកចិត្តទទួលយកការកម្សាន្តថ្មីថ្មោងបែបនេះ។ ចំណែកឯនៅលើប៉ុស្តិ៍ទូរទស្សន៍ ITV វិញ វីរបុរសលោក Roy Keane ក៏បានផ្តល់ការវាយតម្លៃស្រដៀងគ្នាដែរថា៖ «វាហាក់ដូចជាមិនសូវអស្ចារ្យដូចការរំពឹងទុកឡើយ ប៉ុន្តែខ្ញុំគិតថាមនុស្សនៅក្នុងកីឡដ្ឋានផ្ទាល់ប្រហែលជារីករាយជាមួយវាជាងពួកយើងដែលមើលតាមកញ្ចក់ទូរទស្សន៍»។
ទោះបីជាការប្រកួតត្រូវបានកាត់សេចក្តីដោយអេស្ប៉ាញយកឈ្នះអាហ្សង់ទីន ១-០ ក្នុងវគ្គថែមម៉ោងដោយគ្រាប់បាល់របស់ Ferran Torres ក៏ដោយ ក៏ប្រធានបទស្តីពីការដាក់បញ្ចូលកម្មវិធី Halftime Show ទៅក្នុងវិស័យបាល់ទាត់ នៅតែជាចំណុចវែកញែកយ៉ាងក្តៅគគុកពីសំណាក់អ្នកគាំទ្រ និងអ្នកវិភាគជុំវិញពិភពលោក ថាតើគួររក្សាភាពប្រពៃណីរបស់បាល់ទាត់ ឬក៏គួរដើរតាមគន្លងកម្សាន្តបែបអាមេរិក។
