ហេតុអ្វីបានជាការផ្ទេរ Karim Adeyemi ទៅ Barcelona ខុសប្លែកពីការលក់កីឡាករផ្សេងទៀតរបស់ Borussia Dortmund?
អត្ថបទសរសេរដោយ Danny • 15 views
ការចុះហត្ថលេខានាំយក Karim Adeyemi របស់ក្លិប Barcelona មិនត្រឹមតែមកពង្រឹងតំបន់ប្រយុទ្ធរបស់លោក Hansi Flick ប៉ុណ្ណោះទេ ប៉ុន្តែវាក៏បានបញ្ចប់និន្នាការដោះដូរកីឡាករដ៏មានប្រជាប្រិយភាពបំផុតមួយរបស់ Borussia Dortmund ផងដែរ។
ខ្សែប្រយុទ្ធស្លាបសញ្ជាតិអាល្លឺម៉ង់រូបនេះ បានផ្លាស់ទៅកាន់ Barcelona ក្នុងកិច្ចព្រមព្រៀងតម្លៃថេរ ២២ លានអឺរ៉ូ ជាមួយនឹងប្រាក់បន្ថែមផ្សេងៗ ៧ លានអឺរ៉ូទៀតទៅតាមសមិទ្ធផល។ ទោះបីជាកិច្ចព្រមព្រៀងនេះមើលទៅជាអាជីវកម្មសមហេតុផលសម្រាប់ Borussia Dortmund ដោយសារ Adeyemi បានឈានចូលដល់ឆ្នាំចុងក្រោយនៃកិច្ចសន្យារបស់គេក៏ដោយ ប៉ុន្តែវានៅតែទាបជាងប្រាក់ចំណេញដ៏ច្រើនសន្ធឹកសន្ធាប់ដែលក្លិប Bundesliga មួយនេះធ្លាប់បង្កើតបាននៅលើទីផ្សារដោះដូរកីឡាករកន្លងមក។
Adeyemi ធ្វើឱ្យបែកបាក់ទម្រង់ជំនួញរបស់ Dortmund
Borussia Dortmund បានទិញ Adeyemi ពី RB Salpsburg ក្នុងឆ្នាំ ២០២២ ក្នុងតម្លៃ ៣០ លានអឺរ៉ូ ដោយមើលឃើញថារូបគេជាតារាយុវជនដ៏គួរឱ្យរំភើបម្នាក់ ដែលអាចអភិវឌ្ឍខ្លួនទៅជាកីឡាករកម្រិតពិភពលោក។ យ៉ាងណាមិញ បួនរដូវកាលក្រោយមក Barcelona ទទួលបានខ្សែប្រយុទ្ធរូបនេះក្នុងកញ្ចប់តម្លៃសរុបប្រហែល ២៩ លានអឺរ៉ូ ប៉ុណ្ណោះ ដែលមានន័យថា Dortmund មិនអាចលក់កីឡាកររូបនេះក្នុងតម្លៃថ្លៃជាងដើមទុនដែលពួកគេបានវិនិយោគឡើយ។ នេះគឺជាលទ្ធផលដ៏កម្រមួយសម្រាប់ក្លិបដែលបង្កើតកេរ្តិ៍ឈ្មោះលើការស្វែងរកតារាយុវជន អភិវឌ្ឍពួកគេ និងលក់ចេញវិញក្នុងតម្លៃប្រាក់ចំណេញមហាសាល។
ក្រឡេកមើលការលក់ដ៏ជោគជ័យកន្លងមករបស់ Dortmund
ការលក់ដ៏ជោគជ័យបំផុតមួយចំនួនរបស់ Borussia Dortmund គឺធ្វើឡើងជាមួយក្លិបយក្សទាំងពីររបស់អេស្ប៉ាញ។ ករណីល្បីល្បាញបំផុតបានកើតឡើងនៅឆ្នាំ ២០១៧ នៅពេលដែល Barcelona ទិញយក Ousmane Dembele ក្នុងកិច្ចព្រមព្រៀងតម្លៃ ១៣៥ លានអឺរ៉ូ រួមទាំងប្រាក់រង្វាន់លើកទឹកចិត្ត។ Dortmund បានបង់ប្រាក់ឱ្យ Rennes ត្រឹមតែ ១៥ លានអឺរ៉ូ ប៉ុណ្ណោះកាលពីមួយឆ្នាំមុន ដោយធ្វើឱ្យពួកគេទទួលបានប្រាក់ចំណេញអស្ចារ្យប្រហែល ១២០ លានអឺរ៉ូ។
ក្រោយមកនៅឆ្នាំ ២០២៣ Real Madrid បានបិទបញ្ចប់ការចុះហត្ថលេខាលើ Jude Bellingham បន្ទាប់ពី Dortmund បានអភិវឌ្ឍកីឡាករជម្រើសជាតិអង់គ្លេសរូបនេះឱ្យក្លាយជាខ្សែបម្រើដ៏ល្អបំផុតមួយរូបនៅអឺរ៉ុប។ បន្ទាប់ពីទិញគេពី Birmingham City ក្នុងតម្លៃ ២៩ លានអឺរ៉ូ ក្នុងឆ្នាំ ២០២០ Dortmund បានលក់គេទៅឱ្យក្លិបយក្សអេស្ប៉ាញក្នុងតម្លៃ ១២៧ លានអឺរ៉ូ។
ក្លិបក៏ទទួលបានប្រាក់ចំណេញយ៉ាងច្រើនលើកីឡាករដូចជា Jadon Sancho, Christian Pulisic, Erling Haaland, Pierre-Emerick Aubameyang, Henrikh Mkhitaryan, Mario Götze និង Jamie Gittens ដែលជួយពង្រឹងកេរ្តិ៍ឈ្មោះរបស់ពួកគេជាក្លិបឆ្លាតវៃបំផុតមួយក្នុងពិភពបាល់ទាត់លើទីផ្សារដោះដូរកីឡាករ។ ផ្អែកលើបរិបទនេះ កិច្ចព្រមព្រៀងរបស់ Adeyemi ត្រូវបានចាត់ទុកជាករណីលើកលែង ខុសពីច្បាប់ទម្លាប់ធម្មតារបស់ក្លិប។
