ប្រធាន FIFA លោក Gianni Infantino រួចផុតពីការស៊ើបអង្កេតរបស់ IOC ពាក់ព័ន្ធនឹងការចោទប្រកាន់រឿងទំនាក់ទំនងជាមួយ Donald Trump

គណៈកម្មាធិការអូឡាំពិកអន្តរជាតិ (IOC) នឹងមិនធ្វើការស៊ើបអង្កេតលើការអះអាងដែលថាប្រធាន FIFA លោក Gianni Infantino បានបំពានច្បាប់អព្យាក្រឹតភាពផ្នែកនយោបាយរបស់អូឡាំពិក តាមរយៈទំនាក់ទំនងរបស់លោកជាមួយប្រធានាធិបតីអាមេរិកលោក Donald Trump នោះឡើយ។

អង្គការសិទ្ធិមនុស្ស FairSquare បានដាក់ពាក្យបណ្តឹងទៅកាន់ IOC កាលពីដើមខែនេះ ដោយបានលើកឡើងពីការសម្រេចចិត្តរបស់ FIFA ក្នុងការលើកពេលការព្យួរការប្រកួត World Cup របស់ខ្សែប្រយុទ្ធអាមេរិក Folarin Balogun បន្ទាប់ពីមានសំណើផ្ទាល់ខ្លួនពីលោក Trump ទៅកាន់លោក Infantino ឱ្យពិនិត្យមើលប័ណ្ណក្រហមនោះឡើងវិញ។ ទោះបីជាលោក Infantino មានតំណែងជាសមាជិក IOC ក៏ដោយ អ្នកនាំពាក្យ IOC បានបញ្ជាក់ថា គណៈកម្មាធិការចរិយាធម៌របស់ខ្លួនគ្មានសមត្ថកិច្ចក្នុងការស៊ើបអង្កេតឡើយ ព្រោះបណ្តឹងនេះទាក់ទងនឹងការសម្រេចចិត្ត និងការគ្រប់គ្រងផ្ទៃក្នុងរបស់ FIFA ប៉ុណ្ណោះ។

អ្នកនាំពាក្យ IOC បានថ្លែងថា៖ "គណៈកម្មាធិការចរិយាធម៌ IOC បានវិភាគពាក្យបណ្តឹងរបស់ FairSquare យ៉ាងល្អិតល្អន់។ យើងកត់សម្គាល់ឃើញថា ផ្អែកតាមលក្ខន្តិកៈអូឡាំពិក សហព័ន្ធកីឡាអន្តរជាតិនីមួយៗរក្សាបាននូវឯករាជ្យភាព និងស្វ័យភាពក្នុងការគ្រប់គ្រងរបស់ខ្លួន។ ដូច្នេះ ពាក្យបណ្តឹងនេះគឺស្ថិតនៅក្រៅដែនសមត្ថកិច្ចរបស់គណៈកម្មាធិការចរិយាធម៌ IOC"។

ភាគី FairSquare បានពិពណ៌នាអំពីការសម្រេចចិត្តនេះថាជា "រឿងមិនសមហេតុផល" ហើយបានបន្ថែមថា វានឹងរឹតតែជំរុញឱ្យមានការអំពាវនាវឱ្យមានការកែទម្រង់ និងគ្រប់គ្រងស្ថាប័នកីឡាធំៗពីខាងក្រៅ ព្រោះស្ថាប័នទាំងនេះបង្ហាញថាគ្មានសមត្ថភាពក្នុងការអនុវត្តច្បាប់ផ្ទាល់ខ្លួនដោយតម្លាភាព និងអព្យាក្រឹតភាពនោះទេ។

កាលពីខែធ្នូឆ្នាំមុន FairSquare ក៏បានដាក់ពាក្យបណ្តឹងដោយឡែកមួយទៀតប្រឆាំងនឹងលោក Infantino ទៅកាន់គណៈកម្មាធិការចរិយាធម៌របស់ FIFA ពាក់ព័ន្ធនឹងការបង្ហាញការគាំទ្រជាសាធារណៈចំពោះគោលនយោបាយរបស់លោក Trump និងការបង្កើតពានរង្វាន់ FIFA Peace Prize ដើម្បីប្រគល់ជូនលោក Trump ក្នុងពិធីចាប់ឆ្នោត World Cup 2026 ផងដែរ។

គណៈកម្មាធិការវិវ័យរបស់ FIFA បានប្រកាសកាលពីថ្ងៃទី ៥ ខែកក្កដាថា ការព្យួរការប្រកួត ១ ប្រកួតស្វ័យប្រវត្តិនៃកីឡាករ Balogun ត្រូវបានលើកពេល ខណៈដែលលោក Trump បានទម្លាយនៅថ្ងៃបន្ទាប់ថា លោកបានតស៊ូមតិផ្ទាល់ខ្លួនជាមួយ Infantino។ អង្គភាព UEFA បានចេញសេចក្តីថ្លែងការណ៍រិះគន់ការសម្រេចចិត្តលើករណី Balogun ថាជា "រឿងមិនធ្លាប់មាន មិនអាចយល់បាន និងមិនអាចយកលេសបាន" ខណៈដែលកីឡាករ Balogun ផ្ទាល់បានសារភាពប្រាប់ CBS ថា ការជ្រៀតជ្រែកនេះបានបង្កឱ្យមានការវែកញែក និងភាពចចាមអារ៉ាមយ៉ាងខ្លាំង ដែលធ្វើឱ្យរូបគេពិបាកក្នុងការផ្តោតអារម្មណ៍លើការប្រកួត។