Maresca បញ្ជាក់យ៉ាងច្បាស់ថា លោកនឹងមិន ‘ចម្លងតាម Pep’ ឡើយនៅក្នុងក្លិប Manchester City
អត្ថបទសរសេរដោយ Danny • 18 views
លោក Enzo Maresca បានបញ្ជាក់យ៉ាងច្បាស់ថា លោក "មិនមែនមកទីនេះដើម្បីចម្លងតាម" លោក Pep Guardiola នោះទេ នៅពេលដែលរូបលោកចាប់ផ្តើមគ្រងតំណែងជាអ្នកចាត់ការទូទៅថ្មីរបស់ Manchester City។
លោក Guardiola ធ្លាប់ទទួលបានជោគជ័យយ៉ាងសន្ធឹកសន្ធាប់ដែលមិនធ្លាប់មាន ក្នុងអំឡុងពេលមួយទសវត្សរ៍នៅកីឡដ្ឋាន Etihad ដែលបានបន្សល់ទុកនូវកេរ្តិ៍ឈ្មោះ និងការទទួលខុសត្រូវយ៉ាងធំធេងសម្រាប់អ្នកមកបន្តតំណែង។ លោក Maresca ដឹងពីរឿងនេះច្បាស់ដោយផ្ទាល់ ដោយសាររូបលោកធ្លាប់ធ្វើជាជំនួយការរបស់គ្រូបង្វឹកសញ្ជាតិកាតាឡាន់រូបនេះ ក្នុងអំឡុងពេល Manchester City ឈ្នះពានរង្វាន់បី (Treble) ដ៏អស្ចារ្យ។
បន្ទាប់ពីធ្លាប់ដឹកនាំក្រុមអាយុក្រោម ២៣ ឆ្នាំរបស់ក្លិបផងនោះ គ្រូបង្វឹកសញ្ជាតិអ៊ីតាលីរូបនេះបានមកកាន់ទីក្រុង Manchester ជាលើកទីបី ប៉ុន្តែលើកនេះគឺដើម្បីដឹកនាំក្រុមធំផ្ទាល់តែម្តង ហើយលោកមានឆន្ទៈយ៉ាងមុតមាំក្នុងការធ្វើការងារតាមរបៀបរបស់ខ្លួនឯង។
លោក Maresca បានអះអាងថា៖ "ជាដំបូង វាសំខាន់ណាស់សម្រាប់ខ្ញុំក្នុងការធ្វើឱ្យច្បាស់ថា ខ្ញុំមកទីនេះដើម្បីធ្វើអ្វីដែលខ្ញុំចង់ធ្វើ និងធ្វើការងារតាមរបៀបដែលខ្ញុំចង់បាន។ ខ្ញុំមិនមែនមកទីនេះដើម្បីព្យាយាមចម្លងតាមនរណាម្នាក់នោះទេ"។
លោកបានបន្តទៀតថា៖ "ខ្ញុំមកទីនេះគ្រាន់តែដើម្បីធ្វើការងាររបស់ខ្ញុំ បញ្ជ្រាបទម្រង់បាល់ទាត់របស់ខ្ញុំ និងរបៀបដែលខ្ញុំមើលឃើញកីឡាបាល់ទាត់តែប៉ុណ្ណោះ។ គ្រូបង្វឹកគ្រប់រូបគឺខុសៗគ្នា។ វាអាចមានគំនិតស្រដៀងគ្នាខ្លះ ប៉ុន្តែនៅចុងបញ្ចប់ គ្រូបង្វឹកគ្រប់រូបសុទ្ធតែខុសគ្នា ទាំងរបៀបដែលយើងប្រឈមមុខនឹងការងារប្រចាំថ្ងៃ និងរបៀបដែលយើងប្រឈមមុខនឹងការប្រកួត។ ខ្ញុំមិនគិតថាមានគ្រូបង្វឹកណាដែលគ្រាន់តែ Copy & Paste ពីគ្រូបង្វឹកផ្សេងទៀតនោះទេ វាជារឿងលំបាក។ ខ្ញុំអាច Copy & Paste បាន ប៉ុន្តែខ្ញុំមិនមើលឃើញបាល់ទាត់ក្នុងផ្លូវដូចគ្នានឹងគ្រូបង្វឹកផ្សេងទៀតឡើយ"។
ទោះជាយ៉ាងណាក៏ដោយ លោក Maresca បាននិយាយថា រូបលោកបានទាក់ទងជាមួយអ្នកកាន់តំណែងមុនរបស់លោកជាញឹកញាប់៖ "ខ្ញុំបាននិយាយជាមួយ Pep ជាច្រើន ចាប់តាំងពីគាត់បានសម្រេចចិត្តចាកចេញពីក្លិប។ ខ្ញុំបាននៅជាមួយគាត់កាលពីមួយសប្តាហ៍មុន ហើយយើងបានចំណាយពេលពីរបីម៉ោងជាមួយគ្នា។ ទំនាក់ទំនងជាមួយ Pep ចាប់តាំងពីខ្ញុំនៅជាមួយក្រុម U23 គឺជិតស្និទ្ធខ្លាំងណាស់"។
នៅពេលគេសួរថា តើលោកនឹងបន្តទាក់ទងគ្នារហូតដល់រដូវកាលប្រកួតដែរឬទេ លោកបានឆ្លើយថា៖ "ទេ គាត់ត្រូវការរីករាយនឹងពេលវេលាសម្រាករបស់គាត់។ ហើយខ្ញុំក៏ត្រូវធ្វើការងាររបស់ខ្ញុំ និងស្វែងរកដំណោះស្រាយដោយខ្លួនឯងដែរ។ បន្ទាប់ពីរយៈពេល ១០ ឆ្នាំដែលត្រូវប្រកួតរៀងរាល់ ៣ ថ្ងៃម្តង វាពិតជាមានសម្ពាធខ្លាំង ដូច្នេះខ្ញុំគិតថាឥឡូវនេះគាត់សមនឹងទទួលបានការសម្រាក"។
ពាក់ព័ន្ធនឹងការមកបន្តតំណែងពីលោក Guardiola អ្នកចាត់ការថ្មីរូបនេះបានបន្ថែមថា៖ "សម្រាប់ខ្ញុំ វាគឺជាកិត្តិយសមួយ ព្រោះខ្ញុំចាត់ទុក Pep ថាជាគ្រូបង្វឹកដ៏ល្អបំផុតក្នុងអំឡុង ២០ ឆ្នាំចុងក្រោយនេះ។ ដូចដែលខ្ញុំបាននិយាយ វាគឺជាការប្រឈមមួយផងដែរ ព្រោះយើងបានឃើញហើយថា បន្ទាប់ពីមានគ្រូបង្វឹកប្រភេទនេះ ក្លិបតែងតែជួបការលំបាក។ ខ្ញុំដឹងពីរឿងនេះ និងយល់ច្បាស់ ប៉ុន្តែក្នុងពេលជាមួយគ្នានេះ ខ្ញុំមានអារម្មណ៍ធូរស្រាល និងប្រាកដចិត្តថាយើងអាចធ្វើការងារដ៏អស្ចារ្យមួយបាន"។
