Vinicius Junior ពន្យល់ពីរឿងមិនព្រមស៊ុតបាល់ពិន័យ១១ម៉ែត្រ មុនពេលប្រេស៊ីលធ្លាក់ចេញពី World Cup ក្រោមថ្វីជើងន័រវែស
អត្ថបទសរសេរដោយ Danny • 51 views
កំពូលខ្សែប្រយុទ្ធស្លាបរបស់ក្រុមជម្រើសជាតិប្រេស៊ីល (Brazil) និងក្លិប Real Madrid កីឡាករ Vinicius Junior បានចេញមុខបំបែកភាពស្ងៀមស្ងាត់ ដើម្បីបកស្រាយជុំវិញរឿងរ៉ាវចម្រូងចម្រាស ករណីដែលរូបគេមិនព្រមរ៉ាប់រងស៊ុតបាល់ពិន័យ ១១ ម៉ែត្រដ៏សំខាន់។ បាល់ពិន័យនោះត្រូវបានប្រគល់ទៅឱ្យមិត្តរួមក្រុម Bruno Guimaraes ជាអ្នកស៊ុត ប៉ុន្តែត្រូវបរាជ័យ រហូតធ្វើឱ្យក្រុមសាំបាត្រូវធ្លាក់ចេញពីព្រឹត្តិការណ៍ World Cup ២០២៦ យ៉ាងរន្ធត់ក្រោមថ្វីជើងក្រុមន័រវែស (Norway) ក្នុងលទ្ធផល ២-១។
តារាបាល់ទាត់វ័យ ២៥ ឆ្នាំរូបនេះ បានពន្យល់យ៉ាងច្បាស់ថា ការសម្រេចចិត្តជ្រើសរើសអ្នកស៊ុតបាល់ពិន័យ គឺធ្វើឡើងតាមបញ្ជារបស់គ្រូបង្វឹក លោក Carlo Ancelotti មិនមែនជារឿងដែលរូបគេចង់គេចវេសពីការទទួលខុសត្រូវឡើយ។ Vinicius បានថ្លែងថា៖ «ហេតុអ្វីបានជាខ្ញុំមិនស៊ុតបាល់ពិន័យ? ព្រោះវាជាការសម្រេចចិត្តរបស់គ្រូបង្វឹក។ ខ្ញុំមិនដែលលាក់ខ្លួន ឬរត់គេចពីការទទួលខុសត្រូវម្តងណាឡើយ។ នៅ Real Madrid ឱ្យតែគ្រូបង្វឹកបញ្ជា ខ្ញុំតែងតែធ្វើវា។ ការធ្វើតាមការរៀបចំនៅទីនេះ បញ្ជាក់ថាខ្ញុំមិនមែនជាមនុស្សអាត្មានិយមដែលចង់បានតែភាពលេចធ្លោផ្ទាល់ខ្លួននោះទេ»។
ទន្ទឹមនឹងនេះ Vinicius ក៏បានចេញមុខការពារ និងបង្ហាញសាមគ្គីភាពជាមួយមិត្តរួមក្រុម Bruno Guimaraes ផងដែរ ដោយលោកសង្ឃឹមថាការខុសឆ្គងមួយពេលនេះ នឹងមិនបំផ្លាញអាជីពជម្រើសជាតិរបស់ Guimaraes ឡើយ។ ជាមួយគ្នានោះ រូបគេបានផ្ញើសារសុំទោសទៅកាន់អ្នកគាំទ្រប្រេស៊ីលទាំងអស់ចំពោះការខកចិត្តដ៏ធំធេងនេះ ព្រោះក្រុមជម្រើសជាតិប្រេស៊ីលបានខកខានលើកពានរង្វាន់ពិភពលោកអស់រយៈពេលជាង ២ ទសវត្សរ៍មកហើយ។ ទោះជាយ៉ាងណា រូបគេនៅតែមានជំនឿចិត្តលើគ្រូបង្វឹកលោក Ancelotti និងប្តេជ្ញាចិត្តនាំយកក្រុមកីឡាករវ័យក្មេងជំនាន់ក្រោយវាយបកត្រឡប់មកឈរនៅលើកំពូលតារាងវិញនាពេលអនាគត។
