UEFA ចេញមុខវាយប្រហារ FIFA យ៉ាងចាស់ដៃជុំវិញការដោះលែងខ្សែប្រយុទ្ធអាមេរិក Folarin Balogun ឱ្យរួចផុតពីការពិន័យកាតក្រហម
អត្ថបទសរសេរដោយ Danny • 41 views
សហព័ន្ធកីឡាបាល់ទាត់អឺរ៉ុប (UEFA) បានបើកការវាយប្រហារយ៉ាងខ្លាំងក្លាមិនធ្លាប់មានទៅលើស្ថាប័ន FIFA ជុំវិញការសម្រេចចិត្តដ៏គួរឱ្យភ្ញាក់ផ្អើល ដែលអនុញ្ញាតឱ្យខ្សែប្រយុទ្ធអាមេរិក Folarin Balogun រួចផុតពីបម្រាមដកហូតការប្រកួតជាស្វ័យប្រវត្ត។ UEFA បានសង្កត់ធ្ងន់ថា ទង្វើនេះគឺកំពុង «ឆ្លងកាត់ខ្សែបន្ទាត់ក្រហម» និងកំពុងធ្វើឱ្យប៉ះពាល់ដល់ភាពស្មោះត្រង់ ក៏ដូចជាយុត្តិធម៌នៃពានរង្វាន់ពិភពលោក World Cup ២០២៦ ទាំងមូល។
នៅក្នុងសេចក្តីថ្លែងការណ៍ផ្លូវការ UEFA បានបង្ហាញការមិនជឿ និងថ្កោលទោសថា ការពិន័យកាតក្រហមផ្អាកមួយប្រកួតដាច់ខាត គឺជាគោលការណ៍គ្រឹះដែលមិនអាចកែប្រែ ឬលើកលែងបានឡើយ ជាពិសេសនៅពាក់កណ្តាលយុទ្ធនាការដែលកីឡាករដទៃទៀតតែងតែគោរពតាមច្បាប់នេះ។ UEFA បានបន្ថែមថា៖ «នៅពេលដែលភាពប្រាកដប្រជានៃច្បាប់លែងត្រូវបានធានាដោយអ្នកការពាររបស់វា នោះភាពស្មោះត្រង់នៃការប្រកួតនឹងត្រូវប្រឈមមុខនឹងហានិភ័យ ហើយការជឿជាក់លើការប្រកួតប្រជែងនឹងត្រូវបំផ្លាញ»។
ស្របពេលជាមួយគ្នានេះ អតីតប្រធានក្រុមអង់គ្លេស លោក Wayne Rooney បានរិះគន់យ៉ាងចាស់ដៃតាមកញ្ចក់ទូរទស្សន៍ BBC ថាការសម្រេចចិត្តនេះជារឿងអាម៉ាស់បំផុត និងបានទាមទារឱ្យប្រធាន FIFA លោក Gianni Infantino ត្រូវតែចេះអៀនខ្មាស់។ ចំណែកឯលោក Thomas Tuchel គ្រូបង្វឹកក្រុមអង់គ្លេស ក៏បាននិយាយបែបឌឺដងសើចចំអកថា ប្រហែលជា Harry Kane ត្រូវទូរស័ព្ទទៅសុំជំនួយពីប្រធានាធិបតីអាមេរិកលោក Donald Trump ដែរហើយ ដើម្បីជួយសម្រាលការពិន័យកាតក្រហមរបស់ខ្សែការពារ Jarell Quansah។
ទោះបីជាមានការរិះគន់ និងការតវ៉ាយ៉ាងខ្លាំងពីសមាគមបាល់ទាត់បែលហ្ស៊ិកក៏ដោយ ក៏កីឡាករ Folarin Balogun នៅតែត្រូវបានអនុញ្ញាតឱ្យចូលលេងក្នុងជំនួបវគ្គ ១៦ ក្រុមចុងក្រោយ ទល់នឹងក្រុមបែលហ្ស៊ិក (Belgium) នៅទឹកដីទីក្រុង Seattle ដដែល។ រឿងរ៉ាវនេះបានធ្វើឱ្យមហាជនកាន់តែសង្ស័យខ្លាំងឡើង ជុំវិញសេចក្តីរាយការណ៍ថា លោក Donald Trump បានទូរស័ព្ទផ្ទាល់ទៅកាន់មេធំ FIFA ដើម្បីសុំអន្តរាគមន៍កែប្រែការពិន័យកាតក្រហមនេះ។
