Trent Alexander-Arnold បង្ហាញការស្ងើចសរសើរចំពោះភាពហ្មត់ចត់ និងកម្រិតលេងដ៏តឹងរឹងរបស់លោក Jose Mourinho ក្នុងវគ្គហ្វឹកហាត់មុនបើករដូវកាលជាមួយ Real Madrid
អត្ថបទសរសេរដោយ Danny • 20 views
ខ្សែការពារស្លាបស្តាំជម្រើសជាតិអង់គ្លេស Trent Alexander-Arnold បានបើកចំហរទម្លាយពីភាពតានតឹង និងការហ្វឹកហាត់យ៉ាងស្វិតស្វាញក្នុងអំឡុងពេលប៉ុន្មានថ្ងៃដំបូងនៃយុទ្ធនាការត្រៀមរដូវកាលថ្មី (Pre-season) របស់ Real Madrid ដោយបានកោតសរសើរមិនដាច់ពីមាត់ចំពោះស្តង់ដារដ៏ខ្ពស់ និងភាពម៉ឺងម៉ាត់របស់គ្រូបង្វឹកថ្មី លោក Jose Mourinho។
ការចាប់ផ្តើមរដូវកាលថ្មី ២០២៦-២៧ ក្រោមការដឹកនាំរបស់លោក Mourinho នៅឯមជ្ឈមណ្ឌល Valdebebas គឺពោរពេញទៅដោយការហ្វឹកហាត់ទ្វេដង (Double sessions) ក្រោមអាកាសធាតុក្តៅខ្លាំងនៅក្នុងទីក្រុងម៉ាឌ្រីដ។ ថ្លែងប្រាប់ប្រព័ន្ធផ្សព្វផ្សាយផ្លូវការរបស់ក្លិប Trent បានបញ្ជាក់ថា៖
«មកទល់ពេលនេះ គឺល្អណាស់។ វាពិតជាក្តៅ និងហត់នឿយខ្លាំង។ យើងកំពុងស្ថិតក្នុងវគ្គ Pre-season ដូច្នេះនេះជាអ្វីដែលពួកយើងបានរំពឹងទុករួចជាស្រេចហើយ។ មានការហ្វឹកហាត់ធ្ងន់ៗ និងការហ្វឹកហាត់ពីរដងក្នុងមួយថ្ងៃច្រើនណាស់»។
ខ្សែការពាររូបនេះបានរៀបចំកាយសម្បទាយ៉ាងយកចិត្តទុកដាក់អំឡុងពេលសម្រាកវិស្សមកាលរដូវក្តៅ ដើម្បីធានាថាគេត្រឡប់មកវិញក្នុងស្ថានភាពរាងកាយដ៏រឹងមាំបំផុត។ ទាក់ទងនឹងការមកដឹកនាំជាលើកទីពីររបស់លោក Jose Mourinho នៅទឹកដី Bernabeu វិញ Trent បានសម្តែងការពេញចិត្តយ៉ាងខ្លាំង៖
«ការធ្វើការជាមួយលោក Mourinho? ពិតជាល្អខ្លាំងណាស់។ ខ្ញុំតែងតែកោតសរសើរគាត់តាំងពីដើមមក។ ខ្ញុំធ្លាប់លេងតទល់នឹងក្រុមរបស់គាត់ពីរបីដង ហើយវាជាមោទនភាពមួយដែលបានមកធ្វើការជាមួយគាត់ និងក្រុមការងាររបស់គាត់ផ្ទាល់នៅពេលនេះ»។
លោកបានបន្ថែមទៀតថា៖
«គាត់ជាមនុស្សម៉ឺងម៉ាត់ណាស់។ គោលការណ៍ និងកម្រិតនៃការរំពឹងទុករបស់គាត់គឺខ្ពស់ខ្លាំងណាស់ ដូច្នេះខ្ញុំទន្ទឹងរង់ចាំមើលថាតើនៅពេលយើងស្គាល់គ្នា Jir កាន់តែច្បាស់ យើងនឹងអាចរៀនសូត្របានច្រើនកម្រិតណាពីគាត់។ ពួកយើងទាំងអស់គ្នាសុទ្ធតែចង់រៀនសូត្រ និងអភិវឌ្ឍខ្លួន។ ខ្ញុំប្រាកដណាស់ថាគាត់នឹងបង្រៀនយើងច្រើន ហើយជួយយើងឱ្យឈ្នះពានរង្វាន់នៅឆ្នាំនេះ»។
គោលដៅចម្បងរបស់ Trent នៅក្នុងវគ្គត្រៀមរដូវកាលនេះ គឺការកសាងកាយសម្បទាឡើងវិញ និងការស្វែងយល់ឱ្យបានច្បាស់ពីយុទ្ធសាស្ត្រ និងទម្រង់លេងដែលលោក Mourinho ចង់ឱ្យក្រុមលេង ដើម្បីបង្កើតជាគ្រឹះដ៏រឹងមាំមួយក្នុងការប្រជែងពានរង្វាន់គ្រប់ស្ថាប័ននារដូវកាលថ្មីខាងមុខ។
