Tottenham ព្រមព្រៀងទិញយក Sandro Tonali ពី Newcastle ក្នុងតម្លៃកំណត់ត្រាក្លិបដល់ទៅ ១០០ លានផោន
អត្ថបទសរសេរដោយ Danny • 53 views
ក្លិបមាន់ខ្នាយមាស Tottenham Hotspur បានឈានដល់កិច្ចព្រមព្រៀងក្នុងការចុះហត្ថលេខាយកខ្សែបម្រើអន្តរជាតិអ៊ីតាលី Sandro Tonali ពីក្លិបសារិកាព្រៃ Newcastle United ក្នុងតម្លៃផ្ទេរដ៏មហាសាលដែលអាចកើនឡើងរហូតដល់ ១០០ លានផោន (តម្លៃដំបូង ៩២.៥ លានផោន រួមជាមួយប្រាក់លើកទឹកចិត្ត ៧.៥ លានផោន)។ ការផ្ទេរនេះនឹងធ្វើឱ្យរូបគេក្លាយជាកីឡាករថ្លៃបំផុតក្នុងប្រវត្តិសាស្ត្ររបស់ក្លិបមាន់ខ្នាយមាសឡុងដ៍មួយនេះ។
យោងតាមការចុះផ្សាយរបស់សារព័ត៌មាន The Athletic ការនាំយក Tonali មកកាន់តំបន់បម្រើនេះ គឺដើម្បីពង្រឹងក្រុមបន្ថែម ស្របពេលដែលយុវជន Lucas Bergvall កំពុងមានបំណងចង់ចាកចេញពីក្លិប។ នៅក្នុងរដូវកាលដោះដូរកីឡាករនារដូវក្តៅនេះ Tottenham បានធ្វើការយ៉ាងសកម្មដោយបាននាំចូលកីឡាករល្អៗជាច្រើនដូចជា Andy Robertson, Marco Senesi និង Jan Paul van Hecke ជាដើម។
គួររំឮកផងដែរថា Tonali បានផ្ទេរពីក្លិប AC Milan មកកាន់ Newcastle កាលពីខែកក្កដា ឆ្នាំ ២០២៣ ក្នុងតម្លៃ ៦០.៥ លានផោន ប៉ុន្តែត្រូវបានពិន័យព្យួរជើង ១០ ខែភ្លាមៗរឿងល្មើសច្បាប់ភ្នាល់បាល់។ យ៉ាងណាក៏ដោយ ក្រោយត្រឡប់មកវិញក្នុងខែសីហា ឆ្នាំ ២០២៤ រូបគេបង្ហាញទម្រង់លេងយ៉ាងលេចធ្លោ ដោយចូលលេងបាន ១១០ ប្រកួត ស៊ុតបញ្ចូលទីបាន ១០ គ្រាប់ និងបញ្ជូនបាល់ឱ្យមិត្តរួមក្រុមបាន ១០ ដង ព្រមទាំងជួយក្រុមឡើងទៅដល់វគ្គ ១៦ ក្រុមចុងក្រោយពានរង្វាន់ Champions League ទៀតផង។
ដោយសារតែក្រុមជម្រើសជាតិអ៊ីតាលីមិនបានកៅអីឡើងមកលេងពានរង្វាន់ World Cup 2026 ឡើយ ដូច្នេះ Tonali មិនមានភារកិច្ចជួយជាតិឡើយនៅរដូវក្តៅនេះ។ រូបគេនឹងផ្តោតអារម្មណ៍ទាំងស្រុងលើការរៀបចំឯកសារផ្ទេរទីមកកាន់ Tottenham ដើម្បីត្រៀមខ្លួនចូលរួមហ្វឹកហាត់កម្តៅសាច់ដុំ (Pre-season) ជាមួយមិត្តរួមក្រុមថ្មី។
