Thierry Henry វិភាគពីមូលហេតុដែល បារាំង តែងតែចាញ់ អេស្ប៉ាញ ស្របពេលវីរខ្សែប្រយុទ្ធរូបនេះទទួលស្គាល់ថា La Roja មានកម្រិតលេង «លើសលប់ខ្លាំង» ជាងក្រុមរបស់ Kylian Mbappe
អត្ថបទសរសេរដោយ Danny • 29 views
វីរបុរសបាល់ទាត់ជម្រើសជាតិបារាំង លោក Thierry Henry បានទទួលស្គាល់ត្រង់ៗថា ក្រុមជម្រើសជាតិអេស្ប៉ាញពិតជាមានកម្រិតលេង និងប្រព័ន្ធយុទ្ធសាស្ត្រល្អជាងបារាំងឆ្ងាយណាស់ បន្ទាប់ពីក្រុមមាន់គករងបរាជ័យ ២-០ ក្នុងវគ្គពាក់កណ្តាលផ្តាច់ព្រ័ត្រ World Cup កាលពីថ្ងៃអង្គារ។ អតីតខ្សែប្រយុទ្ធឆ្នើមរូបនេះបានកោតសរសើរចំពោះប្រព័ន្ធគ្រប់គ្រងបាល់ (Possession-based system) និងអត្តសញ្ញាណបាល់ទាត់រយៈពេលវែងរបស់ក្រុមកងទ័ពគោជល់ ដែលជាមូលហេតុធ្វើឱ្យ Kylian Mbappe និងមិត្តរួមក្រុមពិបាកតទល់ជានិច្ចនៅលើឆាកអន្តរជាតិ។
ក្នុងនាមជាអ្នកវិភាគឱ្យទូរទស្សន៍ Fox Sports លោក Henry បានបង្ហាញការចាប់អារម្មណ៍យ៉ាងខ្លាំងចំពោះទម្រង់លេងរបស់អេស្ប៉ាញ ដោយលោកបានថ្លែងថា៖
«ជនជាតិអេស្ប៉ាញគ្រប់គ្រងបាល់បានយ៉ាងល្អ និងបានបង្ហាញឱ្យឃើញថាហេតុអ្វីបានជាពួកគេជាម្ចាស់ជើងឯកអឺរ៉ុប។ ពួកគេពិតជាល្អជាងឆ្ងាយណាស់ ហើយក្រុមដែលលេងល្អជាងគឺជាអ្នកឈ្នះ។ អេស្ប៉ាញគឺជាក្រុមដែលពិបាកតទល់បំផុតនៅពេលដែលពួកគេនាំមុខ ១-០។ វាពិតជាពិបាកទទួលយក ប៉ុន្តែបារាំងត្រូវតែវិភាគពីអ្វីដែលបានកើតឡើង ដើម្បីត្រឡប់មកវិញកាន់តែខ្លាំងក្នុងការយកឈ្នះសត្រូវសាច់សាលោហិតថ្មីមួយនេះ»។
លោក Henry ក៏បានគូសបញ្ជាក់ផងដែរថា ភាពជោគជ័យ និងការត្រួតត្រារបស់បាល់ទាត់អេស្ប៉ាញ មិនមែនជាទង្វើចៃដន្យនោះទេ ព្រោះពួកគេមានទស្សនវិជ្ជា និងអត្តសញ្ញាណច្បាស់លាស់តាំងពីថ្នាក់យុវជន រហូតដល់ក្រុមធំ ទាំងផ្នែកបាល់ទាត់នារី ព្រឹត្តិការណ៍អូឡាំពិក (ដែលលោកធ្លាប់ចាញ់កាលដឹកនាំក្រុម U23 ឆ្នាំ ២០២៤) និងពានរង្វាន់ធំៗដទៃទៀត៖
«ពួកគេមានអត្តសញ្ញាណ និងទស្សនវិជ្ជាតែមួយ ពោលគឺលេងតាមរបៀបដូចគ្នាទាំងអស់មិនថស្ថិតក្នុងកម្រិតណឡើយ។ មិនថាជាកីឡាករដែលទើបចូលលេងលើកទី១ ឬលើកទី៣ ដូចជា Baena ឬ Nico Williams នោះទេ គឺពួកគេដឹងពីតួនាទីដែលត្រូវធ្វើច្បាស់លាស់តាំងពីអាយុ ៩ឆ្នាំមកម៉្លេះ ព្រោះពួកគេលេងក្នុងរចនាបថតែមួយ។ នៅពេលដែលអេស្ប៉ាញមានបាល់ ពួកគេមិនហុចឱ្យអ្នកវិញឡើយ គឺមានតែអ្នកទេដែលត្រូវរត់ទៅដណ្តើមយក»។
បរាជ័យនេះក៏បានកត់សម្គាល់នូវការបិទបញ្ចប់យុគសម័យដ៏រុងរឿងរយៈពេល ១៤ ឆ្នាំរបស់លោកគ្រូបង្វឹក Didier Deschamps ជាមួយក្រុមជម្រើសជាតិបារាំងផងដែរ បន្ទាប់ពីលោកបានសម្រេចចិត្តដើរចេញពីតំណែង។ ផ្ទុយទៅវិញ អេស្ប៉ាញកំពុងតែរង់ចាំការឡើងមកជួបគ្នានៅវគ្គផ្តាច់ព្រ័ត្រដ៏ធំ ជាមួយក្រុមឈ្នះរវាងអង់គ្លេស និងអាហ្សង់ទីន។
