Sadio Mane ប្រកាសលាឈប់ពីក្រុមជម្រើសជាតិសេណេហ្គាល់ ក្រោយធ្លាក់ចេញពី World Cup
អត្ថបទសរសេរដោយ Danny • 37 views
វីរៈបុរសបាល់ទាត់របស់ប្រទេសសេណេហ្គាល់ កីឡាករ Sadio Mane បានប្រកាសជាផ្លូវការថាលោកនឹងឈប់លេងឱ្យក្រុមជម្រើសជាតិហើយ បន្ទាប់ពីក្រុមរបស់លោកត្រូវធ្លាក់ចេញពីការប្រកួត World Cup វគ្គ ១៦ ក្រុមចុងក្រោយ។ ខ្សែប្រយុទ្ធវ័យ ៣៤ ឆ្នាំរូបនេះ បានសម្រេចចិត្តបញ្ចប់អាជីពអន្តរជាតិរយៈពេល ១៤ ឆ្នាំជាមួយក្រុមជម្រើសជាតិ ដោយធ្លាប់ចូលលេងបាន ១៣០ ប្រកួត និងធ្លាប់បានជួយក្រុមឱ្យឈ្នះពានរង្វាន់ធំប្រចាំទ្វីបផងដែរ។
ការសម្រេចចិត្តដ៏សំខាន់របស់អតីតខ្សែប្រយុទ្ធក្រុម Liverpool រូបនេះ ត្រូវបានចុះផ្សាយដោយសារព័ត៌មានសេណេហ្គាល់ Le Quotidien តែប៉ុន្មានថ្ងៃប៉ុណ្ណោះ បន្ទាប់ពីក្រុមសេណេហ្គាល់បានចាញ់ក្រុមប៊ែលហ្សិក ៣-២ យ៉ាងប្រកៀកប្រកិតនៅអាមេរិកខាងជើង។ នៅក្នុងសំបុត្រលាគ្នាផ្ញើចេញពីទីក្រុង Dakar លោក Mane បានសុំទោសប្រជាជនសេណេហ្គាល់ចំពោះរាល់ចំណុចខ្វះខាត ឬរឿងរ៉ាវដែលធ្វើឱ្យអ្នកគាំទ្រខកចិត្តកន្លងមក។
លោកបានសរសេរបញ្ជាក់ថា៖ «សូមដឹងថា ខ្ញុំបានលះបង់គ្រប់បែបយ៉ាងដើម្បីទង់ជាតិមួយនេះ។ ខ្ញុំបានធ្វើអស់ពីសមត្ថភាព និងតែងតែប្រយុទ្ធយ៉ាងខ្លាំងក្លាដើម្បីប្រទេសជាតិរបស់យើង។ ការគាំទ្រមិនចេះដាច់របស់អ្នករាល់គ្នា គឺជាកម្លាំងរុញច្រានឱ្យខ្ញុំទទួលបានជោគជ័យ»។
អាជីពរបស់ Mane ជាមួយក្រុមជម្រើសជាតិ នឹងត្រូវគេចងចាំថាជាសម័យកាលដ៏រុងរឿងបំផុតក្នុងប្រវត្តិសាស្ត្របាល់ទាត់សេណេហ្គាល់ តាមរយៈការឈ្នះពានរង្វាន់ទ្វីបអាហ្វ្រិក (AFCON) ចំនួន ២ ដង (ទោះបីជាពានចុងក្រោយត្រូវដកហូតវិញ ក្រោយពីក្រុមបានដើរចេញពីទីលានក្នុងវគ្គផ្តាច់ព្រ័ត្រឆ្នាំ ២០២៥ ដើម្បីតវ៉ានឹងការសម្រេចចិត្តបាល់ប៉េណាល់ទីក៏ដោយ)។ ទោះបីជាការលេងរបស់លោកនៅក្នុងព្រឹត្តិការណ៍ World Cup ឆ្នាំ ២០២៦ នេះមានកម្រិត ដោយសារតែទើបតែងើបពីរបួសនៅចុងបញ្ចប់ការប្រកួតក៏ដោយ ក៏ម្ចាស់អាវលេខ ១០ រូបនេះនៅតែជាជានិមិត្តរូបនៃបាល់ទាត់អាហ្វ្រិកសម័យថ្មី។ បន្ទាប់ពីឈប់លេងឱ្យជាតិ លោកមានគម្រោងយកបទពិសោធន៍ទៅជួយការងារបច្ចេកទេស ធ្វើជាគ្រូបង្វឹក ឬជួយការងារក្នុងសហព័ន្ធបាល់ទាត់វិញ ចំណែកពេលនេះលោកអាចផ្តោតអារម្មណ៍ពេញលេញលើការលេងឱ្យក្លិបអាជីពដោយមិនបាច់ហត់នឿយក្នុងការធ្វើដំណើរមកជួយក្រុមជាតិទៀតឡើយ។
