Ruben Amorim បើកកកាយពីកំហុសកាលដឹកនាំ Manchester United ក្នុងថ្ងៃប្រកាសចូលកាន់តំណែងជាគ្រូបង្វឹកថ្មីរបស់ AC Milan
អត្ថបទសរសេរដោយ Danny • 43 views
លោក Ruben Amorim បានចេញមុខទទួលស្គាល់ជាសាធារណៈនូវកំហុសឆ្គងមួយចំនួន ក្នុងអំឡុងពេល ១៤ ខែដ៏លំបាករបស់លោកក្នុងការដឹកនាំក្លិប Manchester United។ ការថ្លែងបែបនេះត្រូវបានធ្វើឡើងនៅក្នុងសន្និសីទសារព័ត៌មានលើកដំបូងរបស់លោក ក្នុងនាមជាគ្រូបង្វឹកថ្មីរបស់ក្លិប AC Milan ដោយលោកបានចាត់ទុកបទពិសោធន៍មិនល្អនៅទឹកដី Old Trafford ថាជាមេរៀនដ៏ធំមួយសម្រាប់អាជីព។
លោក Amorim ត្រូវបានបិសាចក្រហមបណ្តេញចេញពីតំណែងកាលពីខែមករា ឆ្នាំ ២០២៦ កន្លងទៅ បន្ទាប់ពីបានចូលមកដឹកនាំក្រុមជំនួសតំណែងចាស់កាលពីខែវិច្ឆិកា ឆ្នាំ ២០២៤។ ក្នុងអំឡុងពេលនោះ លោកបានជួបការលំបាកយ៉ាងខ្លាំងក្នុងការអនុវត្តទម្រង់លេង និងយុទ្ធសាស្ត្ររបស់ខ្លួន។ លោកបានបញ្ជាក់ប្រាប់អ្នកសារព័ត៌មាននៅអ៊ីតាលីថា៖ «វាពិបាកក្នុងការរៀបរាប់ពីកំហុសគ្រប់យ៉ាងណាស់ ព្រោះខ្ញុំត្រូវពន្យល់ពីបរិបទទាំងអស់នៃដំណើរផ្សងព្រេងចុងក្រោយនោះ។ អ្វីដែលខ្ញុំអាចនិយាយបានគឺ ខ្ញុំបានរៀនសូត្របានច្រើន ហើយខ្ញុំពិតជាបានធ្វើខុសខ្លះមែន ប៉ុន្តែខ្ញុំជឿថាខ្ញុំនឹងក្លាយជាគ្រូបង្វឹកដ៏ល្អជាងមុន»។ ទន្ទឹមនឹងនោះ លោកក៏បានផ្ញើសារសុំទោសទៅកាន់អ្នកគាំទ្រ Manchester United ផងដែរ ចំពោះការចាកចេញទាំងបង្ខំក្នុងពេលដែលក្រុមឈរនៅចំណាត់ថ្នាក់លេខ ៦ ក្នុងលីគ និងរងការរិះគន់រឿងមិនសូវទុកចិត្តកីឡាករវ័យក្មេងពីយុវជនបណ្ឌិត្យសភា។
ស្ថិតិបង្ហាញថា លោក Amorim បន្សល់ទុកនូវកំណត់ត្រាអាក្រក់បំផុតមួយនៅអង់គ្លេស ដោយដឹកនាំបាន ៦៣ ប្រកួត ឈ្នះ ២៥ ស្មើ ១៥ និងចាញ់ ២៣។ គិតតែក្នុងពានរង្វាន់ Premier League លោកឈ្នះបានត្រឹមតែ ១៥ ប្រកួតប៉ុណ្ណោះ ក្នុងចំណោម ៤៧ ប្រកួត ដែលធ្វើឱ្យលោកមានមធ្យមភាគពិន្ទុទាបបំផុត (១.២៣ ពិន្ទុក្នុងមួយប្រកួត) ក្នុងចំណោមគ្រូបង្វឹក Man Utd ទាំងអស់ក្នុងយុគសម័យ Premier League។ បច្ចុប្បន្ន គ្រូបង្វឹកសញ្ជាតិព័រទុយហ្គាល់រូបនេះ បានចុះកិច្ចសន្យារយៈពេល ៣ ឆ្នាំជាមួយ AC Milan ដើម្បីជំនួសតំណែងលោក Massimiliano Allegri ដោយមានភារកិច្ចនាំយកភាពជោគជ័យត្រឡប់មកកាន់កីឡដ្ឋាន San Siro វិញ។
