វីរៈបុរស Roger Milla និយាយពីអាយុចូលនិវត្តន៍របស់ Messi និង Ronaldo ព្រមទាំងបើកផ្លូវឱ្យបំបែកកំណត់ត្រាពិភពលោករបស់ខ្លួន
អត្ថបទសរសេរដោយ Danny • 41 views
វីរៈបុរសបាល់ទាត់ឆ្នើមរបស់ក្រុមជម្រើសជាតិកាមេរ៉ូន លោក Roger Milla បានចេញមុខមកកោតសរសើរយ៉ាងខ្លាំងចំពោះភាពអស្ចារ្យមិនចេះរីងស្ងួតរបស់ Cristiano Ronaldo (អាយុ ៤១ ឆ្នាំ) និង Lionel Messi (អាយុ ៣៩ ឆ្នាំ) ដែលកំពុងបន្តបង្ហាញទម្រង់លេងយ៉ាងលេចធ្លោនៅក្នុងព្រឹត្តិការណ៍ World Cup ២០២៦ ទោះបីជាវ័យរបស់ពួកគេកាន់តែជ្រេខ្លាំងក៏ដោយ។
លោក Milla ដែលបច្ចុប្បន្នកំពុងកាន់កាប់កំណត់ត្រាប្រវត្តិសាស្ត្រជាកីឡាករមានអាយុច្រើនជាងគេបំផុតដែលរកគ្រាប់បាល់បានក្នុងព្រឹត្តិការណ៍ World Cup (ក្នុងវ័យ ៤២ ឆ្នាំ និង ៣៩ ថ្ងៃ កាលពីឆ្នាំ ១៩៩៤) បានថ្លែងប្រាប់សារព័ត៌មាន A Bola ថា លោកពិតជាលើកទឹកចិត្ត និងកោតសរសើរចំពោះអ្នកទាំងពីរខ្លាំងណាស់។ លោកបានបញ្ជាក់ថា៖ «ខ្ញុំលឺគេនិយាយថាពួកគាត់លែងសូវរត់។ ប៉ុន្តែកីឡាករដែលមិនសូវរត់ហើយនៅតែបន្តរកគ្រាប់បាល់បាន និងជាអ្នកកាត់សេចក្តីជ័យជម្នះឱ្យក្រុម គឺរឹតតែគួរឱ្យសរសើរទៅទៀត។ បើកីឡាករនៅតែមានអារម្មណ៍ថារឹងមាំ ពួកគេគួរតែបន្តលេងទៅ អាយុមិនសំខាន់ឡើយ»។
ទាក់ទងនឹងអាយុនៃការចូលនិវត្តន៍ លោក Milla បានពន្យល់ថា ការលេងរហូតដល់អាយុ ៥០ ឆ្នាំ ហាក់ដូចជាជារឿងមិនអាចទៅរួចឡើយសម្រាប់កម្រិតអាជីពកំពូល ប៉ុន្តែបើត្រឹមអាយុ ៤៣ ឬ ៤៤ ឆ្នាំ គឺអាចធ្វើទៅបានទាំងស្រុង ឱ្យតែរាងកាយនៅតែអាចទ្រាំទ្ររួច។ លោកបានបន្ថែមទាំងចិត្តទូលាយថា លោកមិនដែលខ្វល់ខ្វាយពីការបាត់បង់កំណត់ត្រាចាស់របស់លោកឡើយ ព្រោះកំណត់ត្រាបង្កើតមកគឺដើម្បីឱ្យគេបំបែក ដូចជាកំណត់ត្រារបស់ស្ដេចបាល់ទាត់ Pele, Platini ឬ Maradona ក៏ត្រូវបានគេវ៉ាដាច់រួចរាល់ហើយដែរ អ្វីដែលសំខាន់គឺការបន្សល់ទុកនូវអារម្មណ៍ជក់ចិត្តដល់អ្នកគាំទ្រ។ បច្ចុប្បន្ន Messi រកបាន ៧ គ្រាប់ហើយនៅក្នុងព្រឹត្តិការណ៍នេះ។
