តម្លៃខ្លួនបំបែកកំណត់ត្រាពិភពលោក! Real Madrid ចង់ចំណាយ ២២៣ លានអឺរ៉ូ ទិញយក Michael Olise ពី Bayern Munich
អត្ថបទសរសេរដោយ Danny • 41 views
ក្លិបអធិរាជស Real Madrid កំពុងបង្កការភ្ញាក់ផ្អើលយ៉ាងខ្លាំងនៅលើទីផ្សារដោះដូរកីឡាករ ដោយមានបំណងចង់ចំណាយទឹកប្រាក់បំបែកកំណត់ត្រាពិភពលោកចំនួន ២២៣ លានអឺរ៉ូ ដើម្បីទិញយកខ្សែប្រយុទ្ធស្លាប Michael Olise ពីក្លិប Bayern Munich ទៅពង្រឹងតំបន់ប្រយុទ្ធបន្ថែមលើ Kylian Mbappe និង Vinicius Junior។
ខ្សែប្រយុទ្ធវ័យ ២៤ ឆ្នាំរូបនេះ បានបង្ហាញទម្រង់លេងយ៉ាងមហិមានាកាលពីរដូវកាលមុន ដោយរកបាន ២៥ គ្រាប់ និងជួយបញ្ជូនបាល់ (Assists) រហូតដល់ ២៨ លើក ព្រមទាំងកំពុងតែបង្ហាញភាពលេចធ្លោខ្លាំងជាមួយក្រុមជម្រើសជាតិបារាំងនៅក្នុងព្រឹត្តិការណ៍ World Cup ២០២៦ នេះផងដែរ។ ជុំវិញតម្លៃខ្លួនដ៏មហាសាលនេះ អតីតខ្សែប្រយុទ្ធជម្រើសជាតិបារាំង លោក Louis Saha បានលើកឡើងថា៖ «វាជាតួរលេខដ៏ឆ្កួតឡីឡាមួយ ប៉ុន្តែខ្ញុំគិតថា Olise ពិតជាស័ក្តិសមនឹងទទួលបានការដេញថ្លៃបែបនេះ ព្រោះអ្វីដែលយុវជនរូបនេះធ្វើបានក្នុងរយៈពេល ១ ទៅ ២ ឆ្នាំចុងក្រោយនេះ គឺជារឿងដែលមិនគួរឱ្យជឿ»។
លោក Saha ថែមទាំងបានប្រៀបធៀបទម្រង់លេងរបស់ Olise ទៅនឹងវីរៈបុរសវ័យចាស់ Zinedine Zidane កាលពីឆ្នាំ ២០០៦ ទៀតផង ដោយសារតែស្ទីលលេងដ៏ទន់ភ្លន់ មានទំនុកចិត្តខ្ពស់ និងការគ្រប់គ្រងចង្វាក់ហ្គេមនៅតំបន់បំរើប្រយុទ្ធយ៉ាងល្អឥតខ្ចោះ ដែលជួយបើកឱកាសឱ្យ Mbappe ងាយស្រួលក្នុងការរកគ្រាប់បាល់។
ទោះជាយ៉ាងណាក៏ដោយ ក្លិប Bayern Munich តែងតែបង្ហាញជំហរយ៉ាងរឹងមាំថា ពួកគេមិនមានបំណងក្នុងការដោះលែង Olise ឡើយ ដោយសាររូបគេមានកិច្ចសន្យារហូតដល់ឆ្នាំ ២០២៩។ បច្ចុប្បន្ន Olise កំពុងផ្តោតអារម្មណ៍យ៉ាងខ្លាំងក្នុងការជួយក្រុមបារាំង តទល់នឹងក្រុមប៉ារ៉ាហ្គាយ (Paraguay) នៅក្នុងវគ្គ ១៦ ក្រុមចុងក្រោយនាថ្ងៃសៅរ៍នេះ។
