អ្នកចាត់ការទូទៅរបស់ PSG ជួបគ្រោះថ្នាក់រហូតដល់បាក់ឆ្អឹងដងកាំបិតដោយសារជិះកង់
អត្ថបទសរសេរដោយ • 203 views
លោក Luis Enrique គ្រូបង្វឹករបស់ក្លឹប Paris Saint-Germain (PSG) នឹងទទួលការវះកាត់ បន្ទាប់ពីបានបាក់ឆ្អឹងដងកាំបិតនៅក្នុងគ្រោះថ្នាក់ជិះកង់កាលពីថ្ងៃសុក្រ។ នេះបើតាមការបញ្ជាក់ឲ្យដឹងពីក្លឹបនៃលីគកំពូលរបស់បារាំង។
អតីតអ្នកចាត់ការក្លឹប Barcelona វ័យ 55 ឆ្នាំរូបនេះគឺជាអ្នកដែលមានចំណង់ចំណូលចិត្តក្នុងការជិះកង់ និងជានិច្ចកាលតែងតែចូលរួមក្នុងព្រឹត្តិការណ៍ប្រកួតធំៗដែលទាក់ទងជាមួយកីឡាជិះកង់ ដោយកាលពីឆ្នាំទៅគាត់បានចូលរួមក្នុងព្រឹត្តិការណ៍ជិះកង់ចម្ងាយ ៧០០ គីឡូម៉ែត្ររយៈពេល ៨ ថ្ងៃនៅអាហ្វ្រិកខាងត្បូង។
យ៉ាងណាមិញ បើតាមអ្វីដែល PSG បានប្រកាសខាងលើ មានន័យថា Enrique ស្ថិតក្នុងភាពមិនច្បាស់លាស់ថាតើគាត់នឹងអាចជាសះស្បើយទាន់ពេលវេលាឬយ៉ាងណានោះឡើយ ខណៈដែល PSG នឹងត្រូវប៉ះគ្នាជាមួយ Lens នៃការប្រកួតក្នុងលីគនាថ្ងៃ ១៤ ខាងមុខ និង ៣ ថ្ងៃបន្ទាប់ពួកគេនឹងត្រូវប៉ះគ្នាក្នុងពានរង្វាន់ Champions League ទល់ជាមួយ Atalanta ។
គួរបញ្ជាក់ផងដែរថាជាធម្មតាការបាក់ឆ្អឹងដងកាំបិតគឺតម្រូវឲ្យមានការវះកាត់ដើម្បីព្យាបាល ហើយទម្រាំតែអាចវិលទៅសភាពធម្មតាវិញក៏ត្រូវការពេលវេលាចន្លោះពី ៦ ទៅ ៨ សប្ដាហ៍ដែរ។
Enrique ត្រូវបានតែងតាំងឲ្យកាន់តំណែងអ្នកចាត់ការទូទៅនៅកីឡដ្ឋាន Parc des Princes កាលពីរដូវក្ដៅ ២០២៣ ដោយការមកដល់របស់បុរសសញ្ជាតិអេស្ប៉ាញរូបនេះបានជួយឲ្យ PSG ឈ្នះពាន Ligue 1, French Cups និងពានរង្វាន់លីគកំពូលរបស់អឺរ៉ុប Champions League ជាលើកដំបូងក្នុងប្រវត្តិសាស្ត្ររបស់ក្លឹបកាលពីរដូវកាលមុន ក្រោយផ្ដួលក្រុមខ្លាំងមកពីអ៊ីតាលី Inter Milan ក្រោមលទ្ធផល ៥ ទល់នឹង ០ នាទីក្រុងម៉ូនិច។
