Pep Guardiola កំពុងស្វែងរក «អត្ថន័យជីវិតថ្មី» ក្នុងវ័យ 56 ឆ្នាំ ក្រោយចាកចេញពី Man City ខណៈលោកសារភាពថា មិនទាន់មានអារម្មណ៍ចង់វិលត្រឡប់មកកាន់ពិភពបាល់ទាត់វិញឡើយ
អត្ថបទសរសេរដោយ Danny • 32 views
កំពូលអ្នកចាត់ការទូទៅសញ្ជាតិអេស្ប៉ាញលោក Pep Guardiola បានទម្លាយឱ្យដឹងថា បច្ចុប្បន្នលោកមិនទាន់មានចំណង់ ឬអារម្មណ៍ចង់វិលត្រឡប់មកធ្វើជាគ្រូបង្វឹកបាល់ទាត់ឡើងវិញឡើយ ក្រោយពេលសម្រេចចិត្តចាកចេញពីក្លិប Manchester City។ បុរសវ័យ ៥៦ ឆ្នាំរូបនេះបានពន្យល់ថា លោកកំពុងផ្តោតលើការឆ្លុះបញ្ចាំងពីជីវិតផ្ទាល់ខ្លួន និងការផ្តល់ពេលវេលាជូនក្រុមគ្រួសារ បន្ទាប់ពីបានចំណាយពេលជិត ២ ទសវត្សរ៍ស្ថិតក្រោមសម្ពាធដ៏ធ្ងន់ធ្ងរនៃបាល់ទាត់កម្រិតកំពូល។
លោក Pep Guardiola បានសង្កត់ធ្ងន់ថា លោកមិនមានអារម្មណ៍នឹករលឹកដល់ការប្រកួតទាល់តែសោះ បន្ទាប់ពីបានសម្រេចចិត្តបញ្ចប់រយៈពេល ១០ រដូវកាលដ៏ជោគជ័យបំផុតជាមួយក្លិបយក្សនៃលីគកំពូល Premier League មួយនេះ។ ការសម្រេចចិត្តដើរចេញពីកៅអីគ្រូបង្វឹក គឺធ្វើឡើងដើម្បីការពារសុខភាពផ្លូវចិត្ត និងស្វែងរកសុភមង្គលថ្មីនៅក្រៅរង្វង់ការងារបាល់ទាត់ដែលធ្លាប់ជាដង្ហើមរបស់លោក។
នៅក្នុងបទសម្ភាសន៍ថ្មីមួយជាមួយវេទិកា OKX លោក Guardiola បានបើកចំហរពីមូលហេតុផ្ទាល់ខ្លួនយ៉ាងដូច្នេះថា៖
«បើនិយាយពីផ្លូវចិត្ត ខ្ញុំមិននឹកអ្វីទាំងអស់ទាល់តែសោះ។ ខ្ញុំបានចាប់ផ្តើមធ្វើជាគ្រូបង្វឹកតាំងពីអាយុ ៣៧ ឆ្នាំ ហើយជីវិតទាំងមូលរបស់ខ្ញុំគឺជាប់ជំពាក់តែជាមួយបាល់ទាត់។ ឥឡូវនេះ ខ្ញុំចង់ព្យាយាមស្វែងរក និងស្វែងយល់ពីជីវិត ទៅរកសុភមង្គលតាមរយៈការធ្វើអ្វីៗផ្សេងទៀតដែលមិនពាក់ព័ន្ធនឹងបាល់ទាត់ទាល់តែសោះ»។
លោកបានបន្តទៀតថា៖
«ខ្ញុំស្រឡាញ់ការងាររបស់ខ្ញុំ ប៉ុន្តែវានឹងមានពេលមួយដែលអ្នកមានអារម្មណ៍ថាត្រូវតែឈប់។ ប្រហែលជាថ្ងៃណាមួយ ខ្ញុំភ្ញាក់ដឹងខ្លួនឡើងហើយនិយាយថា 'មិនអីទេ ខ្ញុំចង់ត្រឡប់ទៅធ្វើជាគ្រូបង្វឹកវិញ'។ ប៉ុន្តែអារម្មណ៍នោះត្រូវតែចេញមកពីខាងក្នុងខ្លួនឯងពិតប្រាកដ ហើយនៅថ្ងៃនេះ ខ្ញុំគ្រាន់តែមិនទាន់មានអារម្មណ៍បែបនោះនៅឡើយ»។
តម្លៃនៃគ្រួសារត្រូវមកមុនគេ៖ ការសម្រេចចិត្តផ្អាកពីការងារជាបណ្តោះអាសន្ននេះ គឺត្រូវបានជម្រុញយ៉ាងខ្លាំងដោយបំណងប្រាថ្នាចង់ចំណាយពេលឱ្យបានពេញលេញជាមួយក្រុមគ្រួសារ។ លោកបានរៀបរាប់ទាំងអារម្មណ៍កក់ក្តៅថា៖
«ខ្ញុំកំពុងស្វែងរកមើលថា តើជីវិតរបស់ខ្ញុំនឹងទៅជាយ៉ាងណា។ ខ្ញុំសម្រេចចិត្តឈប់ ព្រោះខ្ញុំចង់មើលថែខ្លួនឯងឱ្យបានច្រើនជាងមុន។ ខ្ញុំចង់ចំណាយពេលជាមួយកូនៗ និងឪពុករបស់ខ្ញុំ ដែលបច្ចុប្បន្នគាត់មានអាយុ ៩៥ ឆ្នាំហើយ ហើយគាត់នៅរស់រានមានជីវិតជាមួយពួកយើង។ ខ្ញុំឈានចូលដល់អាយុ ៥៦ ឆ្នាំហើយ មិនមែននៅក្មេងទៀតទេ ហើយរបៀបដែលយើងមើលឃើញអ្វីៗជុំវិញខ្លួនក៏ផ្លាស់ប្តូរទៅតាមនោះដែរ។ ខ្ញុំកំពុងសម្របខ្លួនទៅនឹងដំណាក់កាលថ្មីនេះ ប៉ុន្តែវាដំណើរការទៅយ៉ាងល្អ»។
ទោះជាយ៉ាងណា លោក Guardiola មិនបានបិទផ្លូវទាំងស្រុងក្នុងការវិលត្រឡប់មកកាន់ពិភពបាល់ទាត់វិញនៅថ្ងៃអនាគតនោះឡើយ។ ចំពោះក្លិបចាស់ Manchester City លោកបានបញ្ជាក់ថា ថ្ងៃណាមួយលោកនឹងត្រឡប់ទៅកាន់កីឡដ្ឋាន Etihad ក្នុងនាមជាអ្នកគាំទ្រ ឬនៅពីក្រោយឆាកវិញ ហើយប្រសិនបើក្លិបត្រូវការលោកនៅពេលណា លោកនឹងនៅទីនោះជានិច្ច។
ជាចុងក្រោយ លោក Pep ក៏បានឆ្លៀតពោលពាក្យសរសើរ និងផ្តល់កិត្តិយសយ៉ាងខ្ពង់ខ្ពស់ដល់លោក Jurgen Klopp ផងដែរ ដោយបានលើកឡើងថា៖ «គាត់គឺជាគូប្រជែងដ៏អស្ចារ្យបំផុតក្នុងអាជីពរបស់ខ្ញុំ។ គាត់មានសមត្ថភាពអាចផ្លាស់ប្តូរប្រព័ន្ធយុទ្ធសាស្ត្ររបស់គាត់រៀងរាល់ ២០ នាទីម្តង។ កាលនោះ គាត់ធ្លាប់ធ្វើឱ្យខ្ញុំវិលមុខ និងសឹងតែឆ្កួតម្តងៗទៅហើយ»។
