តារាឆ្នើមវ័យក្មេងហូឡង់ទម្លាយក្តីស្រមៃចង់លេងចាប់ដៃគូជាមួយ Pau Cubarsi នៅ Barcelona ក្រោយឃើញសមត្ថភាពទប់ទល់នឹង Cristiano Ronaldo

ខ្សែការពារវ័យក្មេងរបស់ក្លិប Twente កីឡាករ Ruud Nijstad បានសារភាពជាសាធារណៈពីមហិច្ឆតារបស់ខ្លួនក្នុងការផ្ទេរទៅលេងឱ្យក្លិប FC Barcelona នាពេលអនាគត ដើម្បីចាប់ដៃគូការពារកណ្តាលជាមួយ Pau Cubarsi បន្ទាប់ពីរូបគេលាន់មាត់កោតសរសើរយ៉ាងខ្លាំងចំពោះទម្រង់លេងរបស់ខ្សែការពារអេស្ប៉ាញរូបនេះ ក្នុងការបិទកំពូលខ្សែប្រយុទ្ធ Cristiano Ronaldo នៅក្នុងព្រឹត្តិការណ៍ World Cup ២០២៦។

ខ្សែការពារឆ្នើមវ័យ ១៨ ឆ្នាំរបស់ហូឡង់រូបនេះ ធ្លាប់ត្រូវបានផ្សារភ្ជាប់ព័ត៌មានផ្ទេរកាស៊ូជាមួយក្រុមអ្នកមានបុណ្យ Blaugrana ម្តងរួចមកហើយ។ នៅក្នុងបទសម្ភាសន៍ជាមួយសារព័ត៌មាន Sportnieuws រូបគេបានទម្លាយថា ការទស្សនា Cubarsi លេងឱ្យជម្រើសជាតិអេស្ប៉ាញយកឈ្នះព័រទុយហ្គាល់ ១-០ ក្នុងវគ្គ ១៦ ក្រុមចុងក្រោយនៃពានរង្វាន់ពិភពលោក ដោយអាចទប់ទល់នឹងសម្ពាធពីសំណាក់ Ronaldo បានយ៉ាងល្អឥតខ្ចោះ គឺជាកត្តាជម្រុញចិត្តដ៏ធំធេង៖

«ខ្ញុំបានឃើញគាត់ (Cubarsi) លេងទល់នឹង Cristiano Ronaldo ហើយខ្ញុំពិតជារីករាយ និងកោតសរសើរខ្លាំងណាស់ក្នុងការទស្សនាទម្រង់លេងរបស់គាត់។ ខ្ញុំមិនរំពឹងថាអ្វីៗនឹងដើរលឿនបែបនេះសម្រាប់ខ្ញុំឡើយ ប៉ុន្តែការបានលេងឱ្យ FC Barcelona និងបង្កើតដៃគូការពារកណ្តាលជាមួយ Cubarsi គឺពិតជាគោលដៅកំពូលរបស់ខ្ញុំ (Ultimate goal)។ ទោះជាយ៉ាងណា សម្រាប់ពេលបច្ចុប្បន្ន ខ្ញុំចង់បន្តអភិវឌ្ឍសមត្ថភាពខ្លួនឯងនៅ Twente ជាមុនសិន ព្រោះខ្ញុំនៅមានរឿងជាច្រើនដែលត្រូវរៀនសូត្រនៅទីនេះ»។

Ruud Nijstad បានបង្ហាញទម្រង់លេងយ៉ាងលេចធ្លោក្នុងរដូវកាលដំបូងរបស់គេជាមួយ Twente ក្នុងលីគកំពូលហូឡង់ Eredivisie ដោយបង្ហាញខ្លួនបាន ២៤ ប្រកួត និងបានក្លាយជាកីឡាករជម្រើសដំបូងជាទៀងទាត់នៅប៉ុន្មានខែចុងក្រោយនៃរដូវកាល។ ក្នុងនាមជាខ្សែការពារកណ្តាលដែលប្រើប្រាស់ជើងឆ្វេង (Left-footed centre-back) រូបគេត្រូវបានចាត់ទុកជាគ្រាប់ពេជ្រវ័យក្មេងដ៏ភ្លឺស្វាងម្នាក់របស់ហូឡង់ ហើយទម្រង់លេងបែបនេះគឺត្រូវចំទិសដៅរបស់ Barcelona ដែលតែងតែស្វែងរកកីឡាករវ័យក្មេងមានដុង និងសក្តានុពលខ្ពស់សម្រាប់គម្រោងរយៈពេលវែង។

បច្ចុប្បន្ន Nijstad នៅតែបន្តផ្តោតអារម្មណ៍ខ្ពស់លើការកសាងភាពស្ថិតស្ថេរក្នុងក្រុមធំរបស់ Twente ប៉ុន្តែប្រសិនបើរូបគេនៅតែបន្តបង្ហាញទម្រង់លេងឡើងកូដបែបនេះ ក្តីស្រមៃក្នុងការទៅរួមរស់ជាមួយ Cubarsi នៅទឹកដី Camp Nou អាចនឹងក្លាយជាការពិតនៅក្នុងទីផ្សារដោះដូរកីឡាករនាពេលខាងមុខ។