Ousmane Dembele ទម្លាយអាថ៌កំបាំងពីដំបូន្មានរបស់ Kylian Mbappe ដែលជួយឱ្យបារាំងស៊ុតទម្លុះសំណាញ់ទីម៉ារ៉ុក ឡើងទៅវគ្គពាក់កណ្តាលផ្តាច់ព្រ័ត្រ

ខ្សែប្រយុទ្ធស្លាប Ousmane Dembele បានបើកកកាយថា ការណែនាំយុទ្ធសាស្ត្រភ្លាមៗពីសំណាក់ប្រធានក្រុម Kylian Mbappe នៅលើទីលាន គឺជាកូនសោរដ៏សំខាន់ដែលជួយឱ្យក្រុមជម្រើសជាតិបារាំង រកបានគ្រាប់បាល់ទីពីរយ៉ាងម៉ាត់ចត់ ក្នុងជ័យជម្នះ ២-០ លើក្រុមម៉ារ៉ុក កក់កៅអីឡើងទៅវគ្គពាក់កណ្តាលផ្តាច់ព្រ័ត្រ World Cup ២០២៦។

នៅក្នុងការប្រកួតដ៏ស្វិតស្វាញនោះ លោក Dembele បានពន្យល់ប្រាប់សារព័ត៌មាន M6 ថា ពីរឬបីនាទីមុនពេលគ្រាប់បាល់កើតឡើង Mbappe បានប្រាប់ឱ្យលោកដូរមកឈរនៅតំបន់កណ្តាល ដើម្បីត្រៀមលក្ខណៈវាយបកលឿន (Counter-attack) ឱ្យតែមានឱកាស។ នៅពេលការប្រកួតដំណើរការទៅតាមនោះមែន Mbappe បានរត់ទាញខ្សែការពារយ៉ាងឆ្លាតវៃដើម្បីបង្កើតចន្លោះប្រហោង ធ្វើឱ្យ Dembele មានឱកាសទាត់បញ្ចូលទីយ៉ាងស្អាត ទោះបីជាក្នុងប្រកួតនោះ Mbappe បានទាត់បាល់ពិន័យប៉េណាល់ទីមិនចូលមួយលើកក៏ដោយ។ លោក Dembele បានសរសើរមិត្តរួមក្រុមថា៖ «គេជាកីឡាករដ៏អស្ចារ្យ ជាប្រធានក្រុមរបស់យើង គេគ្មានការភ័យខ្លាច និងមានស្មារតីរឹងមាំបំផុត»។

ជ័យជម្នះនេះបានជួយឱ្យបារាំងឡើងទៅវគ្គពាក់កណ្តាលផ្តាច់ព្រ័ត្រ World Cup ៣ លើកជាប់ៗគ្នា។ ក្នុងនាមជាកីឡាករម្នាក់ដែលធ្លាប់រួមរស់ជាមួយក្រុមជម្រើសជាតិអស់រយៈពេល ១០ ឆ្នាំមកនេះ ខ្សែប្រយុទ្ធរបស់ក្លិប PSG រូបនេះបានសង្កត់ធ្ងន់ថា ក្រុមទាំងមូលត្រូវតែរក្សាការផ្តោតអារម្មណ៍ឱ្យបានខ្ពស់បំផុតដើម្បីឈានទៅលើកពានរង្វាន់ពិភពលោក។ សម្រាប់វគ្គពាក់កណ្តាលផ្តាច់ព្រ័ត្រខាងមុខ ក្រុមមាន់គគករួមទាំង Kylian Mbappe និង Dembele ត្រូវធ្វើដំណើរទៅកាន់ទីក្រុង Dallas ដើម្បីរង់ចាំតតាំងជាមួយក្រុមឈ្នះរវាង អេស្ប៉ាញ ឬ ប៊ែលហ្សិក។