Neymar បានបដិសេធ និងធ្វើការចំអកលើព័ត៌មានដែលថា រូបគេបានជេរប្រមាថកីឡាករវ័យក្មេង Gabriel Bontempo បន្ទាប់ពីប្រកួតស្មើ Chapecoense ២-២

ខ្សែប្រយុទ្ធឆ្នើមរបស់ Santos កីឡាករ Neymar បានធ្វើការឆ្លើយតបយ៉ាងកំប្លែង និងចំអកទៅកាន់របាយការណ៍ដែលបានចោទប្រកាន់ថា រូបគេបានជេរប្រមាថមិត្តរួមក្រុមវ័យក្មេង បន្ទាប់ពីការប្រកួតស្មើ ២-២ យ៉ាងតឹងតែងជាមួយ Chapecoense ដោយបានបង្ហោះរូបថតបែបលេងសើចជាមួយកីឡាករវ័យក្មេង Gabriel Bontempo។ កីឡាករវ័យ 34 ឆ្នាំរូបនេះ ដែលជាអ្នករកគ្រាប់បាល់ទាំងពីរគ្រាប់ក្នុងប្រកួតនោះ បានចេញមុខបដិសេធយ៉ាងដាច់អហង្ការលើបណ្តាញសង្គម ព្រមទាំងបានយកស្ថានការណ៍នេះមកធ្វើជាកំប្លែងជាមួយ Bontempo តាមអ៊ីនធឺណិត។

សារព័ត៌មានមួយចំនួនក្នុងប្រទេសប្រេស៊ីលបានរាយការណ៍ថា Neymar បានជេរប្រមាថ និងវាយប្រហារយ៉ាងខ្លាំងៗលើ Bontempo ដោយថែមទាំងបានចំអកឱ្យទម្រង់លេងរបស់កីឡាករវ័យក្មេងរូបនេះទៀតផង។ ទោះជាយ៉ាងណា អតីតខ្សែប្រយុទ្ធរបស់ Barcelona រូបនេះ បានសម្រួលស្ថានការណ៍ដោយការបង្ហោះរូបថតជាមួយ Bontempo លើ Instagram ជាមួយនឹងចំណងជើងថា «អាប្អូនតូច» អមដោយ Emoji សើច ខណៈដែល Bontempo ក៏បានចែករំលែករូបនោះបន្ត ដើម្បីបញ្ជាក់ថាទំនាក់ទំនង និងភាពចុះសម្រុងគ្នាក្នុងក្រុមនៅតែល្អប្រសើរ។

បន្ថែមពីលើនេះ Neymar បានបង្ហោះវីដេអូលើ Instagram Story របស់ខ្លួនដើម្បីបកស្រាយថា៖ «ខ្ញុំបានឃើញព័ត៌មានដែលថាខ្ញុំបានវាយប្រហារកីឡាករវ័យក្មេងក្នុងបន្ទប់ផ្លាស់សម្លៀកបំពាក់ ដែលវាជាការភូតភរទាំងស្រុង។ នៅក្នុងបន្ទប់នោះ យើងទាំងអស់គ្នាបានជជែកដាស់តឿនគ្នាទៅវិញទៅមកដើម្បីជ័យជម្នះ ប៉ុន្តែគ្មាននរណាម្នាក់ដៅក្បាលលើកីឡាករវ័យក្មេងនោះទេ។ ខ្ញុំនឹងមិនអត់ឱនឱ្យអ្នកដែលបង្កើតព័ត៌មានមិនពិត និងព្យាយាមបំបែកបំបាក់ក្រុមបែបនេះឡើយ»។

បច្ចុប្បន្ន Neymar នឹងត្រូវខកខានការប្រកួត Serie A បន្ទាប់របស់ Santos ទល់នឹង Athletico Paranaense ដោយសារទទួលបានកាតលឿង ៣ ដង ប៉ុន្តែរូបគេនៅតែជាកម្លាំងសំខាន់សម្រាប់ប្រកួតពានរង្វាន់ CONMEBOL Sudamericana និង Copa do Brasil ខាងមុខនេះ។