Nacho៖ ខ្ញុំមិនស្ដាយក្រោយដែលចាកចេញពី Real Madrid ហើយខ្ញុំអាចលេងរហូតដល់វ័យដូច Ronaldo និង Modrić

អតីតប្រធានក្រុម Real Madrid កីឡាករ Nacho Fernández ដែលបច្ចុប្បន្នកំពុងលេងឱ្យក្លិប Al-Qadsiah បានចែករំលែកពីក្តីសុខ និងភាពរីករាយក្នុងការរស់នៅ និងប្រកួតបាល់ទាត់ក្នុងប្រទេសអារ៉ាប៊ីសាអូឌីត។

ក្នុងកិច្ចសម្ភាសន៍ជាមួយសារព័ត៌មានអេស្ប៉ាញ AS លោក Nacho បានបញ្ជាក់ថា គ្រប់យ៉ាងគឺពិតជាវិជ្ជមានខ្លាំងណាស់ ហើយលោក និងគ្រួសារមានក្ដីសុខជាខ្លាំង។ លោកបានបន្តថា ការរស់នៅទីនោះគឺជាបទពិសោធថ្មីស្រឡាងមួយ ខណៈដែលកូនៗរបស់លោកទទួលបានការអប់រំយ៉ាងល្អនៅសាលាអន្តរជាតិអង់គ្លេស។ ទោះបីជាលោកនឹកផ្ទះ មិត្តភក្តិ និងគ្រួសារនៅទីក្រុងម៉ាឌ្រីដក៏ដោយ ប៉ុន្តែលោកកំពុងរីករាយនឹងពេលវេលានៅអារ៉ាប៊ីសាអូឌីត។ លោកក៏បានបន្ថែមទៀតថា គ្រួសាររបស់លោកទទួលបានការស្វាគមន៍ និងរាប់អានយ៉ាងកក់ក្តៅ ដោយគ្រាន់តែរស់នៅដោយគោរពតាមទំនៀមទម្លាប់ក្នុងស្រុក។

ទាក់ទងនឹងការសម្រេចចិត្តចាកចេញពី Real Madrid ខ្សែការពាររូបនេះបានអះអាងថា លោកមិនដែលស្ដាយក្រោយឡើយ។ ការសម្រេចចិត្តចាកចេញពីក្លិបក្នុងពេលដែលទទួលបានជោគជ័យ លើកពានរង្វាន់ Champions League ក្នុងនាមជាប្រធានក្រុម គឺជាការសម្រេចចិត្តដ៏លំបាកបំផុត ប៉ុន្តែវាជាពេលវេលាដ៏ត្រឹមត្រូវ។ លើសពីនេះ លោកបានបញ្ជាក់ពីកាយសម្បទារបស់លោកថា នៅតែមានភាពរឹងមាំ និងល្អប្រសើរដូចកាលលេងនៅ Real Madrid ដែរ។ លោកជឿថា វិធីសាស្ត្រនៃការថែរក្សាសុខភាពបច្ចុប្បន្នអាចឱ្យរូបលោកលេងរហូតដល់វ័យដូច Modrić ឬ Cristiano Ronaldo ប៉ុន្តែលោកបានតាំងចិត្តថានឹងព្យួរស្បែកជើងនៅពេលដែលខ្លួននៅតែមានទម្រង់លេងល្អ ដោយមិនបណ្តោយឱ្យវ័យ ឬកាយសម្បទាបង្ខំឱ្យលោកឈប់នោះឡើយ។

ជាចុងក្រោយ Nacho ក៏បានកោតសរសើរយ៉ាងខ្លាំងចំពោះការផ្ទេររបស់ Marc Cucurella មកកាន់ Real Madrid ដោយលោកចាត់ទុកថាជានិមិត្តរូបនៃការទិញចូលដ៏អស្ចារ្យ។ លោកបានលើកឡើងថា Cucurella ជាកីឡាករដែលមានកម្លាំងចិត្តប្រកួតប្រជែង ១០០% និងមានលក្ខណៈសម្បត្តិសមស្របបំផុតក្នុងការលេងឱ្យ Real Madrid ហើយលោកជឿជាក់ថា ខ្សែការពាររូបនេះនឹងនាំមកនូវផលវិជ្ជមានយ៉ាងច្រើនដល់ក្រុម។