Michael Olise ចង់ជួបជជែកជាមួយប្រធានក្លិប Bayern Munich ភ្លាមៗក្រោយចប់ World Cup ដើម្បីសុំដំឡើងប្រាក់ខែ និងបញ្ជាក់ពីអនាគត

មានការរាយការណ៍មកថា ខ្សែប្រយុទ្ធស្លាបក្រុមជម្រើសជាតិបារាំង កីឡាករ Michael Olise កំពុងស្វែងរកការជួបពិភាក្សាបន្ទាន់មួយជាមួយថ្នាក់ដឹកនាំក្លិប Bayern Munich ដើម្បីនិយាយពីរឿងអនាគតរបស់គេ បន្ទាប់ពីបង្ហាញទម្រង់លេងយ៉ាងលេចធ្លោក្នុងពានរង្វាន់ World Cup រហូតធ្វើឱ្យតម្លៃខ្លួនហក់ឡើងយ៉ាងខ្លាំង និងមានការចាប់អារម្មណ៍ខ្លាំងពីក្លិប Real Madrid។

កីឡាករ Olise ដែលបានផ្ទេរពី Crystal Palace ទៅ Bayern Munich ក្នុងតម្លៃ 55 លានអឺរ៉ូ កាលពីឆ្នាំ 2024 បានក្លាយជាចំណែកដ៏សំខាន់ជួយឱ្យបារាំងឡើងទៅដល់វគ្គពាក់កណ្តាលផ្តាច់ព្រ័ត្រ World Cup ឆ្នាំ 2026 នេះ (ត្រូវជួប Spain) ដោយរូបគេធ្វើជំនួយការស៊ុតបាល់បានរហូតដល់ទៅ 6 ដង។ តាមសារព័ត៌មាន El Debate បានឱ្យដឹងថា Olise ចង់ជួបជាមួយប្រធានក្លិប Bayern លោក Herbert Hainer ភ្លាមៗក្រោយចប់ការប្រកួត ដើម្បីបញ្ជាក់ពីជំហររបស់ខ្លួន ព្រោះគេចង់ឱ្យក្លិបដំឡើងឋានៈ និងប្រាក់ខែឱ្យសមនឹងសមត្ថភាពបច្ចុប្បន្ន។

សម្ពាធកាន់តែខ្លាំងបានធ្លាក់ទៅលើ Bayern ដោយសារតែនៅក្នុងជំរំប្រមូលផ្តុំរបស់ក្រុមជម្រើសជាតិបារាំង មិត្តរួមក្រុមរបស់គេដូចជា Mbappe, Aurelien Tchouameni និង Ibrahima Konate សុទ្ធតែជាអ្នកគាំទ្រ និងព្យាយាមបញ្ចុះបញ្ចូល Olise ឱ្យផ្លាស់ទៅរួមរស់ជាមួយគម្រោងថ្មីនៅកីឡដ្ឋាន Santiago Bernabeu របស់ Real Madrid។ ការលេងស៊ីចង្វាក់គ្នាយ៉ាងល្អរវាង Mbappe និង Olise នៅក្នុងទីលាន បានធ្វើឱ្យរូបគេរារែកចិត្ត និងចង់ទៅលេងជុំគ្នានៅកម្រិតក្លិបជារៀងរាល់សប្តាហ៍។

ទោះជាយ៉ាងណា ការផ្ទេរទៅ Real Madrid មិនមែនជារឿងងាយស្រួលឡើយ ព្រោះតម្លៃខ្លួនរបស់ Olise ពេលនេះត្រូវបានគេប៉ាន់ស្មានថាឡើងរហូតដល់ទៅប្រហែល 200 លានអឺរ៉ូ ហើយគេនៅសល់កិច្ចសន្យា 3 ឆ្នាំទៀតជាមួយ Bayern។ ខាង Bayern ផ្ទាល់ក៏មិនចង់លក់កីឡាករសំខាន់រូបនេះដែរ ដោយពួកគេបានត្រៀមផ្តល់កិច្ចសន្យាថ្មីជាមួយប្រាក់ខែសុទ្ធរហូតដល់ 14 លានអឺរ៉ូ (កើនពីប្រាក់ខែចាស់ 8 លានអឺរ៉ូ) ដើម្បីការពារកុំឱ្យក្លិបផ្សេងមកទិញយក។ ប៉ុន្តែភ្នាក់ងាររបស់ Olise គឺអ្នកស្រី Rebecca James បានណែនាំកីឡាករមិនទាន់ឱ្យប្រញាប់ចុះហត្ថលេខាលើកិច្ចសន្យាថ្មីជាមួយ Bayern ឡើយ ដើម្បីរក្សាអំណាចចរចា និងអាចធ្វើឱ្យតម្លៃខ្លួនធ្លាក់ចុះខ្លះនៅឆ្នាំ 2027 ខាងមុខ។