Michael Olise ជាប់ពាក់ព័ន្ធនឹងជម្លោះផ្លូវច្បាប់រឿងទទួលស្គាល់កូនស្រីវ័យ ២០ ខែ ជាមួយស្ត្រីអាល្លឺម៉ង់ដើមកំណើតម៉ារ៉ុក
អត្ថបទសរសេរដោយ Danny • 34 views
តារាបាល់ទាត់ជម្រើសជាតិបារាំងវ័យ ២៤ ឆ្នាំ Michael Olise ត្រូវប្រឈមមុខនឹងវិបត្តិផ្ទាល់ខ្លួនដ៏នឹកស្មានមិនដល់ ក្រោយពេលត្រឡប់មកពីអាមេរិកវិញ។ ស្ត្រីជនជាតិអាល្លឺម៉ង់ដើមកំណើតម៉ារ៉ុកម្នាក់ បានទម្លាយការរស់នៅរបស់កូនស្រីវ័យ ២០ ខែរបស់គេ ដែលនាំឱ្យកើតជាជម្លោះផ្លូវច្បាប់ជុំវិញការផ្គត់ផ្គង់ និងការទទួលស្គាល់កូនជាផ្លូវការ។
កាសែតអាល្លឺម៉ង់ Bild បានចុះផ្សាយបទសម្ភាសន៍របស់អ្នកនាង Fatima Zonbrischer វ័យ ៣៤ ឆ្នាំ រស់នៅក្រុង Dusseldorf ដោយអ្នកនាងបានអះអាងថា បានទាក់ទងស្នេហាជាមួយ Olise កាលពី ៤ ឆ្នាំមុន កំឡុងពេលគេលេងឱ្យ Crystal Palace។ នាងបានដឹងថាមានផ្ទៃពោះពីរខែក្រោយពេលបែកគ្នា។ លទ្ធផលធ្វើតេស្ត DNA នៅទីក្រុង Munich បានបញ្ជាក់ថា Olise ពិតជាឪពុកបង្កើតរបស់កុមារី Alia Nour។ អ្នកនាង Fatima បានចោទប្រកាន់ថា រូបគេបដិសេធមិនព្រមជួបមុខកូន និងមិនបានបង់ប្រាក់ចិញ្ចឹមបីបាច់ថែរក្សាកូនអស់រយៈពេល ២ ឆ្នាំមកហើយ។
ក្រុមមេធាវីរបស់ Olise បានចេញមុខបដិសេធការចោទប្រកាន់នេះ ដោយបញ្ជាក់ថា កីឡាកររូបនេះបានផ្តល់ជំនួយតាំងពីដំបូង និងបើកជំហរក្នុងការដោះស្រាយដោយសន្តិវិធី។ ពួកគេបានទម្លាយថា អ្នកនាង Fatima ធ្លាប់បានទាមទារប្រាក់ចិញ្ចឹមកូនរហូតដល់ ៦០,០០០ អឺរ៉ូ ក្នុងមួយខែនៅតុលាការបារាំង ប៉ុន្តែមិនបានសម្រេច។ ខាង Olise ថែមទាំងបានស្នើបង់ប្រាក់លើសពីកម្រិតអតិបរមាដែលច្បាប់អាល្លឺម៉ង់បានកំណត់ទៀតផង។
រឿងអាស្រូវនេះបានកើតឡើងចំពេលដែល Olise ទើបតែបញ្ចេញទម្រង់លេងយ៉ាងលេចធ្លោដោយលត់គ្រាប់ Assist ច្រើនជាងគេក្នុងព្រឹត្តិការណ៍ World Cup 2026 ហើយឈ្មោះរបស់គេកំពុងត្រូវបានភ្ជាប់ទំនាក់ទំនងយ៉ាងខ្លាំងជាមួយនឹងការផ្ទេរទៅកាន់ Real Madrid ដើម្បីលេងចាប់ដៃគូជាមួយ Kylian Mbappé។ សម្រាប់កីឡាករដែលចូលចិត្តរក្សាភាពឯកជនរូបនេះ រឿងអាស្រូវជាសាធារណៈនេះគឺជាការវាយប្រហារយ៉ាងធ្ងន់ធ្ងរ។
