ក្នុងអវត្តមានរបស់ Messi ខ្សែប្រយុទ្ធ Suárez ធ្វើឱ្យការបង្ហាញខ្លួនលើកដំបូងរបស់ Lewandowski ក្នុងលីគអាមេរិកខកបំណង

ការទាត់បញ្ចូលទី ២ គ្រាប់ពីសំណាក់កីឡាករ Luis Suárez បានធ្វើឱ្យការបង្ហាញខ្លួនលើកដំបូងរបស់ Robert Lewandowski ជាមួយក្លិប Chicago Fire មិនសមប្រកបឡើយ ដោយ Inter Miami បានយកឈ្នះក្នុងលទ្ធផល ៣-២ នៅក្នុងការប្រកួតលីគ Major League Soccer (MLS)។

Lionel Messi បានអវត្តមានពីការប្រកួតនេះ ដោយសាររូបគេកំពុងសម្រាកនៅឯស្រុកកំណើត បន្ទាប់ពីបរាជ័យក្នុងវគ្គផ្តាច់ព្រ័ត្រ World Cup ក្រោមដៃក្រុមជម្រើសជាតិអេស្ប៉ាញ។

Suárez បានអបអរសាទរការបង្ហាញខ្លួនលើកទី ១០០ របស់គេឱ្យ Inter Miami យ៉ាងល្អប្រសើរ ដោយរកបានគ្រាប់បាល់ពិន័យ ១១ ម៉ែត្រនៅវគ្គទីមួយ និងបន្ថែម ១ គ្រាប់ទៀតនៅវគ្គទីពីរ។

ផ្ទុយទៅវិញ Lewandowski ដែលនឹងឈានចូលវ័យ ៣៨ ឆ្នាំនៅខែសីហានេះ ធ្វើមិនសូវបានល្អឡើយ ហើយត្រូវ បានផ្លាស់ប្តូរចេញបន្ទាប់ពីលេងបាន ១ ម៉ោង។ រូបគេហាក់មានការលំបាកក្នុងការសម្របខ្លួនទៅនឹងល្បឿនប្រកួតលឿននៃលីគ MLS ហើយថែមទាំងបានបង្ហាញកាយវិការខឹងសម្បារទៅកាន់មិត្តរួមក្រុម ដោយទាមទារឱ្យមានការស្ងប់ស្ងាត់ និងបញ្ជូនបាល់ខ្លីៗ។

Inter Miami ទទួលបានគ្រាប់បាល់ទីបី និងជាគ្រាប់បាល់ជ័យជម្នះពីកីឡាករវ័យក្មេង Preston Blampek នៅនាទីទី ៨៥។ ជ័យជម្នះនេះធ្វើឱ្យ Inter Miami បន្តឈរនៅលេខរៀងទី ២ ក្នុងតារាង Eastern Conference មាន ៣៤ ពិន្ទុ ខណៈ Chicago Fire ឈរនៅលេខ ៣ មាន ២៦ ពិន្ទុ។