Chelsea ជោគជ័យក្នុងការទិញយកខ្សែការពារ Maxence Lacroix ដែល Arsenal ក៏ចង់បានកីឡាករនេះដូចគ្នា ក្នុងតម្លៃ ៥២ លានផោន
អត្ថបទសរសេរដោយ Danny • 20 views
យោងតាមការរាយការណ៍ពីសារព័ត៌មាន The Sun ក្លិប Chelsea កំពុងត្រៀមលក្ខណៈរៀបចំតំបន់ការពាររបស់ពួកគេឡើងវិញនៅរដូវក្តៅនេះ ដោយបានឈានដល់កិច្ចព្រមព្រៀងនាំយកខ្សែការពារ Maxence Lacroix ពី Crystal Palace ក្នុងតម្លៃ ៥២ លានផោន ខណៈដែលកីឡាករូបនេះត្រូវពិនិត្យសុខភាពនៅថ្ងៃនេះផ្ទាល់តែម្តង។
ខ្សែការពារសញ្ជាតិបារាំងវ័យ ២៦ ឆ្នាំរូបនេះ បានក្លាយជាគោលដៅកំពូលមួយរបស់ Chelsea បន្ទាប់ពីអ្នកចាត់ការក្រុមថ្មីលោក Xabi Alonso ចង់បានខ្សែការពារដែលមានបទពិសោធន៍ និងសមត្ថភាពខ្ពស់មកពង្រឹងតំបន់ការពារ។ មុននេះ បុរសម្នាក់នេះក៏ធ្លាប់ជាគោលដៅរបស់ Arsenal ផងដែរ បន្ទាប់ពីក្រុម Gunners ចង់បានគេមកជំនួស William Saliba ដែលរងរបួសរយៈពេលវែង ប៉ុន្តែ Arsenal មិនដែលបានដាក់សំណើផ្លូវការនោះឡើយ។ Crystal Palace ធ្លាប់ទាមទារតម្លៃ ៦០ លានផោន ប៉ុន្តែបានយល់ព្រមលើតម្លៃ ៥២ លានផោន ដែលជាតួលេខស្មើនឹងអ្វីដែល Tottenham បានទិញ Jan Paul van Hecke ពី Brighton ដែរ។
អំឡុងពេលលេងឱ្យ Crystal Palace កីឡាករ Lacroix ធ្លាប់ឈ្នះពានរង្វាន់ចំនួនបី រួមមាន FA Cup, UEFA Europa Conference League និង Community Shield ដែលធ្វើឱ្យគេក្លាយជាខ្សែការពារដ៏លេចធ្លោម្នាក់នៅក្នុងលីគកំពូលអង់គ្លេស។ លើសពីនេះ Chelsea ក៏កំពុងចាប់អារម្មណ៍លើ John Stones ដែលជាកីឡាករឥតគិតថ្លៃ ដើម្បីបន្ថែមភាពជាអ្នកដឹកនាំក្នុងក្រុមផងដែរ។
ទន្ទឹមនឹងការនាំចូលកីឡាករថ្មី ខ្សែការពារមួយចំនួនរបស់ Chelsea ក៏កំពុងរៀបចំខ្លួនចាកចេញពី Stamford Bridge ផងដែរ។ Trevoh Chalobah ទទួលបានសំណើពីក្លិប Como នៅអ៊ីតាលី ដែលដឹកនាំដោយលោក Cesc Fàbregas ខណៈដែល Axel Disasi ដែលធ្លាប់ទៅលេងឱ្យ West Ham United ក្នុងកិច្ចសន្យាខ្ចីជើង ក៏កំពុងទទួលបានការចាប់អារម្មណ៍ពី Milan ក្នុងតម្លៃប្រហែល ២៥ លានផោន។ សកម្មភាពយ៉ាងរហ័សនេះ បង្ហាញយ៉ាងច្បាស់ពីផែនការរបស់លោក Alonso ក្នុងការកសាងក្រុមឱ្យមានភាពប្រកួតប្រជែងខ្លាំងក្លាសម្រាប់រដូវកាលថ្មី។
