Manuel Neuer តបតទៅអ្នកវិភាគវិញរឿងចោទប្រកាន់ថា លោកជាអ្នកធ្វើឱ្យអាល្លឺម៉ង់ចាញ់អេក្វាឌ័រ
អត្ថបទសរសេរដោយ Danny • 50 views
អ្នកចាំទីដៃឆ្នើម និងជាប្រធានក្រុមជម្រើសជាតិអាល្លឺម៉ង់ កីឡាករ Manuel Neuer បានបដិសេធមិនទទួលខុសត្រូវចំពោះគ្រាប់បាល់ខូចចិត្តដែលធ្វើឱ្យក្រុមឡាស៊ែរចាញ់អេក្វាឌ័រ ២-១ ឡើយ ទោះបីជាមានការរិះគន់យ៉ាងចាស់ដៃពីសំណាក់ប្រព័ន្ធផ្សព្វផ្សាយ និងអតីតកីឡាករល្បីៗក៏ដោយ។ តារាឆ្នើមរបស់ក្លិប Bayern Munich រូបនេះបានចេញមុខការពារបច្ចេកទេសឈរទីតាំងរបស់ខ្លួន ខណៈដែលលោកគ្រូបង្វឹក Julian Nagelsmann ក៏បានចេញមុខមកកាត់ក្តីជួយអ្នកចាំទីរូបនេះផងដែរ។
រលកនៃការរិះគន់បានផ្ទុះឡើងបន្ទាប់ពីកីឡាករ Gonzalo Plata របស់អេក្វាឌ័រ បានរត់មកកាត់មុខខ្សែការពារ Jonathan Tah រួចស៊ុតបញ្ចូលទីគ្រាប់ជ័យជម្នះនៅនាទីទី ៧៧។ នៅក្នុងស្ថានភាពនោះ Neuer ហាក់បីដូចជាមានភាពរារែកនៅពេលដែលបាល់ហោះកាត់តំបន់គ្រោះថ្នាក់ ដែលធ្វើឱ្យមហាជនយល់ថា រូបគេខ្វះភាពហ្មត់ចត់ក្នុងការសម្រេចចិត្ត។
ទោះជាយ៉ាងណា បុរសវ័យ ៤០ ឆ្នាំរូបនេះបានពន្យល់ពីហេតុផលបច្ចេកទេសយ៉ាងច្បាស់ៗថា៖ «អ្នកណាដែលធ្លាប់លេងជាអ្នកចាំទី មុខជាដឹងហើយថាខ្ញុំត្រូវតែឈរក្នុងទីតាំងបែបនោះធៀបនឹងគន្លងបាល់។ ខ្ញុំគ្រាន់តែចង់ចាប់បាល់វាឱ្យជាប់ ព្រោះវាជាជម្រើសដែលមានសុវត្ថិភាពបំផុត។ ប្រសិនបើខ្ញុំព្យាយាមលូកទៅប្រតាយប្រតប់បាល់នៅត្រឹមកម្រិតទ្រូង វាអាចនឹងភ្លាត់ស្នៀតចូលទីខ្លួនឯងក៏ថាបាន»។ ហើយនៅពេលត្រូវសួរចំៗថា តើលោកទទួលស្គាល់កំហុសចំពោះគ្រាប់បាល់នោះទេ លោកបានតបយ៉ាងខ្លីថា៖ «ទេ»។
ទន្ទឹមនឹងនេះ លោក Julian Nagelsmann ក៏បានចេញមុខមកការពារកូនក្រុមរបស់ខ្លួនដែរថា៖ «វាមិនមែនជាកំហុសរបស់ Neuer ទាំងស្រុងនោះទេ។ ពួកយើងត្រូវតែចេះការពារ និងទប់ស្កាត់បាល់តាំងពីខាងក្រៅមកម្ល៉េះ។ វាជាស្ថានភាពមួយដ៏ពិបាក និងអយុត្តិធម៌ខ្លាំងណាស់សម្រាប់អ្នកចាំទី»។
ទោះបីជាមានការបកស្រាយបែបណាក៏ដោយ សម្ពាធលើតំណែងអ្នកចាំទីដៃមួយរបស់អាល្លឺម៉ង់នៅតែបន្តកើនឡើង។ អតីតប្រធានក្រុមជម្រើសជាតិ លោក Lothar Matthaus បានរិះគន់ចំៗតាមរយៈសារព័ត៌មាន Waz ថា៖ «គេចូលទៅបង្ក្រាបបាល់ដោយភាពរារែក និងទន់ជ្រាយពេក។ នោះមិនមែនជា Neuer ដែលយើងធ្លាប់ស្គាល់ឡើយ»។
គួររំលឹកផងដែរថា គិតត្រឹមវគ្គចែកពូលនៃព្រឹត្តិការណ៍ World Cup 2026 នេះ Neuer បានរបូតគ្រាប់បាល់ចំនួន ៤ គ្រាប់ហើយក្នុងការប្រកួត ៣ លើកកន្លងមក ដែលធ្វើឱ្យអ្នកគាំទ្រចាប់ផ្តើមនឹកឃើញដល់អ្នកចាំទី Oliver Baumann ដែលធ្លាប់បង្ហាញទម្រង់លេងយ៉ាងល្អឥតខ្ចោះក្នុងវគ្គជម្រុះ និងការប្រកួតកម្តៅសាច់ដុំចុងក្រោយទល់នឹងសហរដ្ឋអាមេរិក (United States) មុនពេលត្រូវកាត់ឈ្មោះទៅអង្គុយកៅអីបម្រុងវិញ។
