មូលហេតុដែល Manchester United កំពុងប្រញាប់ប្រញាល់លក់ Marcus Rashford ឱ្យដាច់ស្រឡះមុនថ្ងៃទី 8 ខែសីហា
អត្ថបទសរសេរដោយ Danny • 38 views
ក្លិបបិសាចក្រហម Manchester United កំពុងខិតខំប្រឹងប្រែងយ៉ាងខ្លាំងក្នុងការរៀបចំលក់ខ្សែប្រយុទ្ធ Marcus Rashford ចេញជាអចិន្ត្រៃយ៍ មុនពេលក្រុមឈានចូលដល់កម្មវិធីហ្វឹកហាត់ត្រៀមបើកបរដូវកាលថ្មី (Pre-season)។ ថ្នាក់ដឹកនាំក្លិបចង់ដោះស្រាយអនាគតរបស់កីឡាករវ័យ ២៨ ឆ្នាំរូបនេះឱ្យរួចរាល់ មុនពេលក្រុមធំត្រូវធ្វើដំណើរទៅកាន់ទីក្រុង Dublin ប្រទេសអៀរឡង់ នៅថ្ងៃទី ៨ ខែសីហា ខាងមុខ។
យោងតាមការចុះផ្សាយរបស់សារព័ត៌មាន The Sun បានឱ្យដឹងថា ថ្ងៃទី ៩ ខែសីហា គឺជាកាលបរិច្ឆេទដែលក្រុមកីឡាករទាំងអស់ដែលបានចូលរួមប្រកួត World Cup ត្រូវត្រឡប់មកជួយក្លិបវិញ។ ដូចនេះ United មានពេលត្រឹមតែមួយរយៈពេលខ្លីប៉ុណ្ណោះក្នុងការបញ្ចប់កិច្ចសន្យាលក់ដាច់ទៅលើសមាជិករូបនេះ។ ផ្ទុយទៅវិញ ខ្លួនសាមីកីឡាករ Rashford ក៏បានបង្ហាញជំហរច្បាស់លាស់ក្នុងការចាកចេញពីទឹកដី Old Trafford ផងដែរ ដោយរូបគេមិនចង់ឱ្យរឿងរ៉ាវផ្ទេរក្លិបមកំដរអារម្មណ៍ក្នុងការជួយក្រុមជម្រើសជាតិអង់គ្លេសឡើយ។
កន្លងមក Rashford ធ្លាប់បានទៅលេងឱ្យក្លិប Barcelona ក្នុងកិច្ចសន្យាខ្ចីជើង ដោយស៊ុតបញ្ចូលទីបាន ១៤ គ្រាប់ និងជួយក្រុមការពារតំណែងជើងឯក La Liga ប៉ុន្តែកិច្ចព្រមព្រៀងទិញដាច់តម្លៃ ២៦ លានផោនបានហួសសុពលភាពតាំងពីថ្ងៃទី ១៥ ខែមិថុនា បន្ទាប់ពី Barca សម្រេចចិត្តទៅទិញ Anthony Gordon ក្នុងតម្លៃ ៧០ លានផោនជំនួសវិញ។ ទោះបីជាមានការចាប់អារម្មណ៍ពី Tottenham ក៏ដោយ ក៏ Rashford ចង់ផ្ទេរទៅកាន់ក្លិបដែលមានកៅអីលេង Champions League ជាង។ ចំណែកឯយុទ្ធសាស្ត្ររបស់ Manchester United ពេលនេះ គឺមិនព្រមដោះដូរក្នុងលក្ខខណ្ឌខ្ចីជើងទៀតឡើយ ពោលគឺចង់លក់ដាច់ដើម្បីយកប្រាក់មកទិញកីឡាករថ្មី ដូចករណីលក់ Rasmus Hojlund ទៅឱ្យ Napoli ក្នុងតម្លៃ ៣៨ លានផោនដែរ ដោយបច្ចុប្បន្នក្លិបកំពុងសម្លឹងឃើញខ្សែប្រយុទ្ធស្លាប Crysencio Summerville របស់ West Ham ជាអ្នកមកជំនួសតំណែង។
