អតីតតារាឆ្នើមរបស់ Man Utd និង Chelsea បង្ហាញការសង្ស័យលើការទិញយក Andrey Santos ក្នុងតម្លៃ ៥០ លានផោន របស់ Manchester United

អតីតខ្សែបម្រើល្បីឈ្មោះរបស់ក្លិប Manchester United លោក Nicky Butt និងអតីតតារាឆ្នើមរបស់ Chelsea លោក Emmanuel Petit បានចេញមុខមកបង្ហាញការងឿងឆ្ងល់ និងព្រមានថាការដែលក្រុមបិសាចក្រហមចំណាយលុយរហូតដល់ទៅ 50 លានផោន ទិញយកខ្សែបម្រើវ័យក្មេង Andrey Santos ពី Chelsea គឺជារឿងចម្លែក និងជាការផ្សងព្រេងដ៏ប្រថុយប្រថានមួយ។

តាមការចុះផ្សាយរបស់សារព័ត៌មាន Sky Sports បានឱ្យដឹងថា Manchester United បានព្រមព្រៀងលើកិច្ចសន្យាទិញយកកីឡាករវ័យ 22 ឆ្នាំសញ្ជាតិប្រេស៊ីលរូបនេះហើយ។ ទោះជាយ៉ាងណា លោក Nicky Butt បាននិយាយប្រាប់ Paddy Power ថា តម្លៃខ្លួនដ៏ខ្ពស់នេះនឹងបង្កើតជាសម្ពាធឱ្យ Santos ត្រូវតែចូលលេងជាជម្រើស 11 នាក់ដំបូងភ្លាមៗ ទោះបីជាគេមិនទាន់មានបទពិសោធន៍ច្រើនក្នុងកម្រិតកំពូលក៏ដោយ។ លោក Butt បានបញ្ជាក់ថា៖ «បើទិញក្នុងតម្លៃ 25 ទៅ 30 លានផោន យើងអាចយល់បាន... ប៉ុន្តែតម្លៃ 50 លានផោន គេមិនមែនមកដើម្បីអង្គុយនៅកៅអីបម្រុងឡើយ។ កាលពីរដូវកាលមុន គេបានចូលលេងឱ្យ Chelsea តែ 13 ប្រកួតប៉ុណ្ណោះ ដូច្នេះការទិញនេះមើលទៅហាក់ដូចជាការទិញយកកីឡាករដែលមានត្រឹមសមត្ថភាពបង្កប់ ជាងការទិញកីឡាករដែលធ្លាប់បង្ហាញភាពខ្លាំងរួចរាល់»។

ស្របពេលជាមួយគ្នានេះ លោក Emmanuel Petit ក៏បានយល់ស្របដែរថា ការផ្លាស់ប្តូរនេះគឺជារឿងប្រថុយប្រថានសម្រាប់ទាំងក្លិប និងសាមីខ្លួនកីឡាករ។ លោក Petit បានប្រាប់ BOYLE Sports ថា បន្ទាប់ពី Santos ធ្វើបានល្អក្នុងការខ្ចីជើងនៅក្លិប Strasbourg គេបានត្រឡប់មក Chelsea វិញ ប៉ុន្តែមិនសូវបានចូលលេង និងធ្វើមិនសូវបានល្អតាមការរំពឹងទុកឡើយ។ ការផ្លាស់មកចូលរួមជាមួយ Manchester United ផ្ដោតលើការប្រកួតប្រជែងពានរង្វាន់ធំ Champions League នាពេលនេះ នឹងតម្រូវឱ្យ Santos ត្រូវស្វែងរកទំនុកចិត្តលើខ្លួនឯង និងរៀបចំផ្លូវចិត្តឱ្យបានរឹងមាំឡើងវិញជាដាច់ខាត បើចង់ទទួលបានជោគជ័យ។