Luka Modric សម្រេចចិត្តលើអនាគតជាមួយ AC Milan ក្រោយ ក្រូអាត ធ្លាក់ចេញពីព្រឹត្តិការណ៍ World Cup

ខ្សែបម្រើជើងចាស់ Luka Modric ត្រូវបានរាយការណ៍ថា ត្រៀមខ្លួនបន្តស្នាក់នៅកីឡដ្ឋាន San Siro បន្ថែមទៀត ដោយព្រមព្រៀងលើកិច្ចសន្យាថ្មីរយៈពេលមួយឆ្នាំជាមួយក្លិប AC Milan។ ការសម្រេចចិត្តយ៉ាងឆាប់រហ័សនេះ ធ្វើឡើងភ្លាមៗបន្ទាប់ពីក្រុមជម្រើសជាតិក្រូអាត បានធ្លាក់ចេញពីព្រឹត្តិការណ៍ World Cup 2026 យ៉ាងខកចិត្តកាលពីប៉ុន្មានថ្ងៃមុន។

យោងតាមសារព័ត៌មាន Sky Sport Italia បានឱ្យដឹងថា ការព្យាយាមបញ្ចុះបញ្ចូលយ៉ាងស្វិតស្វាញពីថ្នាក់ដឹកនាំរបស់ AC Milan រួមទាំងគ្រូបង្វឹកថ្មីលោក Ruben Amorim ទទួលបានជោគជ័យហើយ។ លោក Amorim ដែលទើបតែមកកាន់តំណែងថ្មី បានបង្ហាញជំហរយ៉ាងច្បាស់ថា លោកចង់ឱ្យវីរកីឡាករសញ្ជាតិក្រូអាតរូបនេះ ធ្វើជាអ្នកដឹកនាំក្នុងដំណើរការផ្លាស់ប្តូរទម្រង់លេងនៅតំបន់បម្រើរបស់ក្រុម។

ទោះបីជាកិច្ចសន្យាចាស់របស់ម្ចាស់ពានរង្វាន់ Ballon d’Or រូបនេះបានផុតកំណត់កាលពីថ្ងៃទី ៣០ មិថុនាក៏ដោយ ប៉ុន្តែដោយសារតែក្តីស្រឡាញ់តាំងពីក្មេងចំពោះក្លិប និងឱកាសក្នុងការធ្វើការក្រោមយុទ្ធសាស្ត្រថ្មីរបស់លោក Amorim បានក្លាយជាកត្តាដ៏សំខាន់ដែលធ្វើឱ្យរូបគេសម្រេចចិត្តបន្តដំណើរជាមួយក្រុមយ៉ាងហោចណាស់មួយរដូវកាលទៀត។

បច្ចុប្បន្ន Modric កំពុងតែសម្រាកលំហែកាយ ប៉ុន្តែរូបគេត្រូវបានរំពឹងថានឹងផ្តល់ចម្លើយយល់ព្រមជាផ្លូវការក្នុងពេលឆាប់ៗនេះ ដើម្បីចូលរួមជាមួយមិត្តរួមក្រុមក្នុងការត្រៀមខ្លួនមុនរដូវកាលថ្មី។ ប្រសិនបើផែនការប្រព្រឹត្តទៅដោយរលូន រូបគេនឹងរួមដំណើរជាមួយក្រុមទៅកាន់ការប្រកួតទស្សនកិច្ចនៅអូស្ត្រាលី នាថ្ងៃទី ២៦ កក្កដាខាងមុខនេះ ដែលនេះជាការជម្រុញដ៏ធំមួយសម្រាប់ AC Milan ទាំងផ្នែកពាណិជ្ជកម្ម និងកីឡា មុនពេលយុទ្ធនាការ Serie A ជំនាន់ថ្មីចាប់ផ្តើម។

ទោះបីជានឹងត្រូវប្រារព្ធពិធីខួបកំណើតឈានចូលវ័យ ៤១ ឆ្នាំ នាខែកញ្ញាខាងមុខនេះក្តី ប៉ុន្តែ Modric នៅតែបង្ហាញពីកាយសម្បទាដ៏រឹងមាំ និងគួរឱ្យកោតសរសើរ។ កាលពីរដូវកាលមុន រូបគេចូលលេងឱ្យ AC Milan បានរហូតដល់ ៣៧ ប្រកួត រកបាន ២ គ្រាប់ និងបញ្ជូនបាល់ឱ្យមិត្តរួមក្រុមស៊ុតបាន ៣ ដង។ បទពិសោធន៍ដ៏សម្បូរបែបរបស់អតីតតារាឆ្នើមរបស់ Real Madrid រូបនេះ នឹងក្លាយជាអាវុធដ៏សំខាន់ក្នុងការជួយ AC Milan វាយបកយកភាពខ្លាំងក្លាមកវិញ ក្រោយបញ្ចប់ក្នុងចំណាត់ថ្នាក់លេខ ៥ យ៉ាងខកចិត្តកាលពីរដូវកាលមុន។