Lionel Scaloni ស្រក់ទឹកភ្នែកទាំងអាល័យ និងសុំពេលគិតគូរពីអនាគតជាមួយក្រុមជម្រើសជាតិអាហ្សង់ទីន ក្រោយបរាជ័យក្នុងវគ្គផ្តាច់ព្រ័ត្រ World Cup
អត្ថបទសរសេរដោយ Danny • 28 views
គ្រូបង្វឹកក្រុមជម្រើសជាតិអាហ្សង់ទីនលោក Lionel Scaloni បានសម្រក់ទឹកភ្នែក និងដើរចេញពីបន្ទប់សន្និសីទសារព័ត៌មានមុនម៉ោង បន្ទាប់ពីបានទម្លាយពីអារម្មណ៍ពិតជុំវិញអនាគតរបស់លោកជាមួយក្រុម។ បុរសវ័យ ៤៨ ឆ្នាំរូបនេះបានបង្ហើបថា លោកនឹងជួបពិភាក្សាជាមួយប្រធានសហព័ន្ធបាល់ទាត់អាហ្សង់ទីន លោក Claudio 'Chiqui' Tapia ក្នុងពេលឆាប់ៗខាងមុខ ប៉ុន្តែលោកបានទទួលស្គាល់ថា សម្ពាធក្នុងការរក្សាស្តង់ដារជោគជ័យដ៏មហិមាដូចមុនៗ គឺជារឿងដ៏លំបាកបំផុត។
លោក Lionel Scaloni បានផ្លាស់ប្តូរវាសនារបស់អាហ្សង់ទីនចាប់តាំងពីឆ្នាំ ២០១៨ ដោយបានដឹកនាំក្រុមឱ្យស្គាល់ពានរង្វាន់ធំៗជាបន្តបន្ទាប់ រួមមានពាន Copa America ឆ្នាំ ២០២១ និង ២០២៤ ព្រមទាំងពានរង្វាន់ World Cup ឆ្នាំ ២០២២ ផងដែរ។ នៅក្នុងសន្និសីទសារព័ត៌មាន លោកបានថ្លែងទាំងក្តុកក្តួលថា៖
«ទីកន្លែងនេះគឺអស្ចារ្យណាស់ វាគឺជាកន្លែងដ៏មានន័យដូចសុបិន្ត។ ខ្ញុំនិងក្រុមការងារមិនដែលនឹកស្មានដល់ឡើយ [ចំពោះពានរង្វាន់ទាំងអស់ដែលបានឈ្នះ]។
ប៉ុន្តែដើម្បីបន្តទៅមុខទៀត អ្នកត្រូវការពឹងផ្អែកលើកត្តាជាច្រើន ដែលវាពិតជាពិបាកក្នុងការបង្កើតភាពជោគជ័យដ៏ធំធេងបែបនេះឡើងវិញណាស់។ ពួកយើងបានព្យាយាមអស់ពីសមត្ថភាពរហូតដល់នាទីចុងក្រោយ។ ខ្ញុំគិតថាវាពិតជាយុត្តិធម៌ណាស់ដែលខ្ញុំត្រូវសុំពេលគិតគូរពីរឿងនេះឱ្យបានដិតដល់»។
ទោះជាយ៉ាងណាក៏ដោយ លោក Scaloni បានបញ្ជាក់ថា លោកនឹងមិនចាកចេញភ្លាមៗឡើយ ពោលគឺលោកនឹងបន្តដឹកនាំរហូតដល់ផុតកិច្ចសន្យានៅខែធ្នូ ឆ្នាំ ២០២៦ ខាងមុខ៖ «ខ្ញុំនឹងពិភាក្សាជាមួយប្រធានសហព័ន្ធ។ ខ្ញុំនឹងបន្តរហូតដល់ចប់កិច្ចសន្យា។ ខ្ញុំដឹងពីអ្វីដែលខ្ញុំចង់ធ្វើ ប៉ុន្តែខ្ញុំគ្រាន់តែមានអារម្មណ៍ថាត្រូវតែគិតពិចារណា»។
នៅក្នុងប្រកួតវគ្គផ្តាច់ព្រ័ត្រ World Cup អាហ្សង់ទីនបានរងបរាជ័យក្រោមថ្វីជើងអេស្ប៉ាញ ១-០ ទាំងដុនដាប ដោយមិនមានឱកាសស៊ុតចំគោលដៅសូម្បីតែមួយលើកឡើយ។ ទោះជាយ៉ាងណា លោក Scaloni យល់ថាការប្រកួតគឺមានភាពប្រកៀកប្រកិតគ្នាខ្លាំង៖ «ខ្ញុំបានយំអស់ចិត្តរួចទៅហើយនៅក្នុងបន្ទប់ផ្លាស់ប្តូរសម្លៀកបំពាក់។ ខ្ញុំពិតជាដឹងគុណដល់កីឡាករគ្រប់រូប ពួកគេគឺជាអ្នកប្រយុទ្ធដ៏ពិតប្រាកដ»។
ជាមួយគ្នានេះ លោកក៏បានសម្តែងការដឹងគុណយ៉ាងជ្រាលជ្រៅចំពោះ Lionel Messi ក្នុងវ័យ ៣៩ ឆ្នាំ ដែលអាចជាការបង្ហាញខ្លួនចុងក្រោយនៅក្នុងព្រឹត្តិការណ៍ World Cup៖ «គាត់គឺជាកីឡាករបាល់ទាត់ដ៏ល្អបំផុតក្នុងប្រវត្តិសាស្ត្រ វាពិតជាអស្ចារ្យណាស់ដែលបានធ្វើការជាមួយគាត់»។ នៅក្នុងព្រឹត្តិការណ៍នេះ Messi បញ្ចប់ក្នុងចំណាត់ថ្នាក់លេខ២ នៃពានរង្វាន់ស្បែកជើងមាស (Golden Boot) ដោយរកបាន ៨ គ្រាប់ និង ៤ Assists ក្រោមតារាឆ្នើម Kylian Mbappe របស់បារាំងដែលរកបាន ១០ គ្រាប់។
