លោក Lionel Scaloni ឆ្លើយតបជុំវិញពាក្យចចាមអារ៉ាមពីការចូលនិវត្តន៍របស់ Lionel Messi មុនពេលជំនួបផ្តាច់ព្រ័ត្រ World Cup ដ៏ធំជាមួយអេស្ប៉ាញ
អត្ថបទសរសេរដោយ Danny • 32 views
គ្រូបង្វឹកជម្រើសជាតិអាហ្សង់ទីន លោក Lionel Scaloni បានបដិសេធក្នុងការទស្សទាយ ឬវាយតម្លៃលើអនាគតរបស់ Lionel Messi ជាមួយក្រុមជម្រើសជាតិឡើយ មុនពេលការប្រកួតវគ្គផ្តាច់ព្រ័ត្រ World Cup ២០២៦ ដ៏ជក់ចិត្តទល់នឹងអេស្ប៉ាញចូលមកដល់។ លោក Scaloni បានសង្កត់ធ្ងន់ថា មានតែសាមីខ្លួនប្រធានក្រុមរូបនេះម្នាក់គត់ ដែលដឹងច្បាស់ថាត្រូវបន្ត ឬបញ្ឈប់ បន្ទាប់ពីបញ្ចប់ការប្រកួតនេះ។
ពាក្យចចាមអារ៉ាម និងការសង្ស័យពីការចូលនិវត្តន៍របស់ខ្សែប្រយុទ្ធវ័យ ៣៩ ឆ្នាំរូបនេះ បានកើនឡើងយ៉ាងខ្លាំងក្នុងកំឡុងពេលត្រៀមខ្លួនសម្រាប់វគ្គផ្តាច់ព្រ័ត្រនៅថ្ងៃអាទិត្យ។ នៅក្នុងសន្និសីទសារព័ត៌មាននៅទីក្រុងញូវយ៉ក កាលពីថ្ងៃសុក្រ លោក Scaloni បានសារភាពដោយត្រង់ និងឆ្លើយទាំងសំណើចថា លោកមិនទាន់ទទួលបានសញ្ញាណាមួយពី Messi ឡើយ៖
«តើខ្ញុំដឹងអ្វីទៅ? ទៅសួរគាត់ខ្លួនឯងទៅ! និយាយដោយស្មោះត្រង់ ខ្ញុំគ្មានដឹងតម្រុយបន្តិចណាទាល់តែសោះ។ គាត់នៅតែបន្តធ្វើឱ្យពួកយើងភ្ញាក់ផ្អើលជានិច្ច»។
ទោះបីជាវ័យកាន់តែជ្រេក៏ដោយ ក៏យុទ្ធនាការ World Cup ២០២៦ នេះ មន្តអាគមបាល់ទាត់របស់ Messi នៅតែមិនទាន់សាបរលាប ដោយរូបគេរកបានរហូតដល់ទៅ ៨ គ្រាប់ និងបញ្ជូនបាល់បាន ៤ ដង ដែលកំពុងឈរនៅកំពូលតារាងដណ្តើមពានរង្វាន់ស្បែកជើងមាស (Golden Boot) ស្មើជាមួយ Kylian Mbappe របស់បារាំង ព្រមទាំងទើបតែបានបង្ហាញទម្រង់លេងយ៉ាងអស្ចារ្យជួយឱ្យអាហ្សង់ទីនយកឈ្នះអង់គ្លេស ២-១ ក្នុងវគ្គពាក់កណ្តាលផ្តាច់ព្រ័ត្រទៀតផង។
ការថ្លែងអំណរគុណដ៏ជ្រាលជ្រៅដល់ក្រុមកីឡាករ៖ ក្រៅពីនិយាយពីរឿង Messi លោក Scaloni ក៏បានបង្ហាញក្តីរំភើប និងបានរំលឹកពីការថ្លែងអំណរគុណដែលលោកបានប្រាប់ទៅកាន់កូនក្រុមទាំងអស់ សម្រាប់ការរក្សាបាននូវភាពជោគជ័យដ៏អស្ចារ្យជាច្រើនឆ្នាំកន្លងមកនេះ៖
«វាជារឿងពិបាកខ្លាំងណាស់ក្នុងការធ្វើបែបនេះបាន។ ពួកគេបានសម្រេចសមិទ្ធផលជាច្រើន ដែលកាលពីមុនគ្មាននរណាម្នាក់ហ៊ានគិតដល់ឡើយ។ ខ្ញុំបានប្រាប់ពួកគេកាលពីម្សិលមិញថា អ្វីដែលពួកគេបានធ្វើគឺជារឿងដែលមិនគួរឱ្យជឿ ហើយខ្ញុំពិតជាដឹងគុណយ៉ាងជ្រាលជ្រៅបំផុត។ ទាំងរូបខ្ញុំ និងក្រុមការងារទាំងអស់នឹងដឹងគុណពួកគេជារៀងរហូត។ វាមិនមែនជារឿងងាយស្រួលឡើយក្នុងការមកដល់ដំណាក់កាលនេះ និងរក្សាការប្រកួតប្រជែងកម្រិតខ្ពស់បានច្រើនឆ្នាំបែបនេះ»។
លោកបានបន្ថែមថា៖ «ខ្ញុំសង្ឃឹមថាពួកយើងនឹងឈ្នះ ប៉ុន្តែប្រសិនបើយើងមិនឈ្នះ ក៏ដំណើរទស្សនកិច្ចមួយនេះពិតជាមិនគួរឱ្យជឿ និងជាគំរូដ៏ល្អសម្រាប់មនុស្សគ្រប់គ្នា ព្រមទាំងប្រជាជន និងប្រទេសជាតិរបស់យើងដែរ»។
ទោះជាយ៉ាងណា ពិភពលោកទាំងមូលកំពុងតែរង់ចាំអ៊ុតមើលថា តើការប្រកួតវគ្គផ្តាច់ព្រ័ត្រ World Cup ដ៏ធំទល់នឹងក្រុមអេស្ប៉ាញ នឹងក្លាយជា «របាំចុងក្រោយ» (Final dance) ក្នុងអាជីពអន្តរជាតិដ៏រុងរឿងរបស់ Lionel Messi ឬក៏គ្រាន់តែជាទំព័រប្រវត្តិសាស្ត្រមួយទៀត មុននឹងរូបគេបន្តដំណើរទៅមុខទៀត។
