Lionel Scaloni ទទួលស្គាល់ថាវាជារឿងឆ្កួតឡីឡាមួយ ប្រសិនបើអាហ្សង់ទីនត្រូវធ្លាក់ចេញក្រោមដៃ Cape Verde ក្នុងប្រកួតទី១០០ របស់លោក
អត្ថបទសរសេរដោយ Danny • 45 views
គ្រូបង្វឹកជម្រើសជាតិអាហ្សង់ទីន លោក Lionel Scaloni បានទទួលស្គាល់ទាំងដកដង្ហើមធំថា វាជារឿងដ៏ឆ្កួតឡីឡាមួយ ប្រសិនបើក្រុមរបស់លោកត្រូវរងបរាជ័យ និងធ្លាក់ចេញពីព្រឹត្តិការណ៍ World Cup ២០២៦ ក្រោមថ្វីជើងក្រុមទន់ខ្សោយ Cape Verde ចំពេលដែលលោកកំពុងដឹកនាំក្រុមបានចំនួន ១០០ ប្រកួតពេញក្នុងអាជីព។
ក្រុមការពារតំណែងជើងឯកពិភពលោកអាហ្សង់ទីន ប៊ិះនឹងត្រូវជួបគ្រោះមហន្តរាយទៅហើយ នៅក្នុងវគ្គ ៣២ ក្រុមចុងក្រោយ ដោយត្រូវក្រុមលំដាប់បង្គួរមកពីអាហ្វ្រិកអូសបន្លាយដល់ការថែមម៉ោង ១២០ នាទី មុននឹងយកឈ្នះទាំងត្រដរខ្យល់ក្នុងលទ្ធផល ៣-២ នាកីឡដ្ឋានក្នុងក្រុង Miami។ លោក Scaloni បានថ្លែងប្រាប់សារព័ត៌មាន TyC Sports ថា៖ «ក្រុមមួយនេះមិនដែលបោះបង់ឡើយ។ វាពិតជាជារឿងឆ្កួតខ្លាំងណាស់ ប្រសិនបើត្រូវចាញ់នៅក្នុងប្រកួតទី ១០០ របស់ខ្ញុំ ប៉ុន្តែនេះហើយជាបាល់ទាត់។ វាជាការប្រកួតដ៏លំបាកបំផុតមួយ ហើយខ្ញុំសូមកោតសរសើរដល់គូប្រកួត ដែលពួកគេបានបង្ហាញឱ្យឃើញថា នៅលើលោកនេះគ្មានក្រុមណាដែលងាយស្រួលស៊ីនោះឡើយ»។
ទោះបីជាទទួលបានជ័យជម្នះ និងការកោតសរសើរពីស្មារតីប្រយុទ្ធរបស់ក្រុមកីឡាករក៏ដោយ ប៉ុន្តែលោក Scaloni បានបង្ហើបថា លោកមិនដែលអារម្មណ៍កក់ក្តៅ ឬគិតថាខ្លួនឯងបានឡើងទៅវគ្គបន្តដោយងាយស្រួលនោះឡើយ តាំងពីដើមមក។ លោកបានសង្កត់ធ្ងន់ថា ក្រុមមានចំណុចអវិជ្ជមានជាច្រើនដែលត្រូវយកទៅជជែក និងកែសម្រួលឡើងវិញជាបន្ទាន់ បន្ទាប់ពីការលេងមានសភាពមិនសូវស្អាតភ្នែក និងបណ្តោយឱ្យគូប្រកួតវាយបកធ្វើឱ្យមានការពិបាកខ្លាំងពេក។
បន្ទាប់ពីឆ្លងផុតស្ថានភាពដ៏តានតឹងនេះ ក្រុមអាហ្សង់ទីនត្រូវត្រៀមខ្លួនប្រឈមមុខនឹងក្រុមជម្រើសជាតិអេហ្ស៊ីប (Egypt) របស់ Mohamed Salah នៅក្នុងវគ្គ ១៦ ក្រុមចុងក្រោយ ដែលនឹងត្រូវធ្វើឡើងនៅម៉ោង ៤:០០ ទៀបភ្លឺ ថ្ងៃពុធ ទី ៨ ខែកក្កដាខាងមុខនេះ (ម៉ោងនៅក្នុងប្រទេសកម្ពុជា)។
