លោក Lionel Scaloni បង្ហាញក្តីរំភើបជាខ្លាំង និងលើកសរសើរស្មារតីជាបងប្អូនដែលមិនចេះបោះបង់របស់ក្រុមកីឡាករអាហ្សង់ទីន
អត្ថបទសរសេរដោយ Danny • 34 views
គ្រូបង្វឹកក្រុមជម្រើសជាតិអាហ្សង់ទីន លោក Lionel Scaloni ស្ទើរតែមិនអាចទប់ទឹកភ្នែកបានឡើយ បន្ទាប់ពីកូនក្រុមបានវាយបកយកឈ្នះអង់គ្លេស ២-១ យ៉ាងរំភើប ដើម្បីកក់កៅអីឡើងទៅវគ្គផ្តាច់ព្រ័ត្រ World Cup។ លោកបានកោតសរសើរចំពោះចរិតលក្ខណៈ ភាពឯកភាពគ្នា និងភាពធន់របស់ក្រុមកីឡាករ ដោយសង្កត់ធ្ងន់ថា ភាពជោគជ័យរបស់ពួកគេគឺត្រូវបានបង្កើតឡើងនៅលើស្មារតីបងប្អូន មិនមែនជាភាពអំនួតនោះទេ ខណៈដែលពួកគេកំពុងត្រៀមខ្លួនទៅជួបអេស្ប៉ាញ។
នៅក្នុងកិច្ចសម្ភាសន៍ក្រោយបញ្ចប់ការប្រកួតដ៏តានតឹង លោក Scaloni បានថ្លែងប្រាប់ប្រព័ន្ធផ្សព្វផ្សាយ TyC Sports ទាំងរំភើបញាប់ញ័រថា៖
«ខ្ញុំគ្មានពាក្យអ្វីត្រូវនិយាយឡើយ។ វាជាក្តីរីករាយដ៏ធំធេងសម្រាប់ប្រទេសជាតិ និងប្រជាជនរបស់យើង។ កាលពីថ្ងៃមុន ខ្ញុំបាននិយាយថា ក្រុមមួយនេះមិនចេះធ្វើឱ្យខ្ញុំឈប់ភ្ញាក់ផ្អើលនោះទេ។ សំឡេងរបស់ខ្ញុំកំពុងតែអួលដើមក ព្រោះនេះជាការបង្ហាញឱ្យឃើញនូវរឿងរ៉ាវជាច្រើន៖ ស្មារតីក្រុម ភាពជាបងប្អូន ការមិនបោះបង់ និងការតស៊ូរហូតដល់វិនាទីចុងក្រោយ។ យើងនឹងព្យាយាមប្រកួតដើម្បីឈ្នះពានរង្វាន់នៅវគ្គផ្តាច់ព្រ័ត្រ ប៉ុន្តែតើក្រុមមួយនេះត្រូវធ្វើអ្វីបន្ថែមទៀតទៅ? ពួកគេបានធ្វើឱ្យខ្ញុំរំភើបចិត្តយ៉ាងខ្លាំង»។
លោកបានបន្ថែមទៀតថា៖
«យើងនឹងផ្តល់អ្វីៗគ្រប់យ៉ាងដែលមានដើម្បីយកឈ្នះ ប៉ុន្តែវាកម្រណាស់ក្នុងការធ្វើឱ្យមនុស្សទូទៅយល់ពីអ្វីដែលក្រុមកីឡាករបាននិងកំពុងបង្ហាញនៅលើទីលាន។ ពួកយើងមានលក្ខណៈពិសេសប្លែក (Unique) ហើយវាមិនមែនជាភាពអំនួត (Arrogance) ឡើយ។ ទឹកចិត្តរបស់ប្រជាជនយើង និងការលះបង់ទាំងនេះហើយដែលនាំយើងទៅរកជ័យជម្នះ»។
លោក Scaloni ជឿជាក់ថា ទម្រង់លេងរបស់អាហ្សង់ទីនក្នុងការប្រកួតនេះ គឺជាទម្រង់លេងដ៏ល្អបំផុតមួយនៅក្នុងប្រវត្តិសាស្ត្របាល់ទាត់ជាតិ។ ទោះបីជាលោកទទួលស្គាល់នូវគ្រាប់បាល់ដ៏ល្បីល្បាញជាប្រវត្តិសាស្ត្ររបស់វីរបុរស Diego Maradona ពេលទល់នឹងអង់គ្លេសកាលពីឆ្នាំ ១៩៨៦ ក៏ដោយ ប៉ុន្តែបើនិយាយពីទម្រង់លេងជារួមក្នុងវគ្គពាក់កណ្តាលផ្តាច់ព្រ័ត្រនេះ គឺពិតជាអស្ចារ្យមិនគួរឱ្យជឿ។ លោកបានបញ្ជាក់ថា ក្រុមមួយនេះតែងតែលេងបានល្អបំផុតនៅក្រោមសម្ពាធខ្លាំង ហើយទោះបីជាលទ្ធផលប្រែជាចាញ់ក៏លោកនៅតែមានមោទនភាពដែរ ព្រោះក្រុមកីឡាករបានបង្ហាញពីភាពក្លាហានរហូតដល់ទីបញ្ចប់។
បច្ចុប្បន្ន ក្រុមមេឃខៀវអាហ្សង់ទីន កំពុងតែបង្វែរការយកចិត្តទុកដាក់ទាំងស្រុងទៅលើការប្រកួតវគ្គផ្តាច់ព្រ័ត្រដ៏ធំទល់នឹងក្រុមគោជល់អេស្ប៉ាញ ដែលនឹងត្រូវធ្វើឡើងនៅកីឡដ្ឋាន New York New Jersey នាថ្ងៃអាទិត្យខាងមុខនេះ ដើម្បីដេញតាមស្រវាយកពានរង្វាន់ World Cup ពីរជំនាន់ជាប់ៗគ្នាជាប្រវត្តិសាស្ត្រ។
