Lionel Messi ស៊ុតបញ្ចូលទីគ្រាប់ទី 19 ក្នុង World Cup តាមរយៈការទាត់ហ្វ្រីឃីក ក្រោយប្តូរចូលនៅវគ្គទីពីរ
អត្ថបទសរសេរដោយ Danny • 55 views
ខ្សែប្រយុទ្ធឆ្នើមសញ្ជាតិអាហ្សង់ទីន កីឡាករ Lionel Messi នៅតែបន្តបង្ហាញទម្រង់លេងដ៏គួរឱ្យកោតសរសើរនៅក្នុងព្រឹត្តិការណ៍ FIFA World Cup 2026 នេះ ដោយរូបគេបានបន្ថែមការបង្កើតកំណត់ត្រាថ្មីៗទៅក្នុងទំព័រប្រវត្តិសាស្ត្របាល់ទាត់ពិភពលោកជាបន្តបន្ទាប់។
នៅក្នុងការប្រកួតកាលពីថ្ងៃសៅរ៍កន្លងទៅនេះ ម្ចាស់អាវលេខ ១០ របស់ក្រុមអាលប៊ីសេឡេស្ដ (Argentina) ត្រូវបានលោកគ្រូបង្វឹកដាក់ឱ្យអង្គុយនៅកៅអីបម្រុងនៅវគ្គទីមួយ។ ទោះជាយ៉ាងណា រូបគេត្រូវបានប្តូរចូលទៅក្នុងទីលាននៅនាទីទី ៦១ នៃវគ្គទីពីរ ហើយបានស៊ុតបញ្ចូលទីគ្រាប់បាល់ហ្វ្រីឃីក (Free-kick) យ៉ាងស្អាត បំពេញគ្រាប់បាល់ទី ១៩ របស់ខ្លួនក្នុងប្រវត្តិសាស្ត្រ World Cup ព្រមទាំងជួយឱ្យអាហ្សង់ទីនយកឈ្នះហ្សកដានី (Jordan) ក្នុងលទ្ធផល ៣-១។
គ្រាប់បាល់នេះ បានធ្វើឱ្យ Messi ក្លាយជាកីឡាករដំបូងគេបង្អស់ដែលមានកំណត់ត្រាស៊ុតបញ្ចូលទីបាន ៧ ប្រកួតជាប់ៗគ្នាក្នុងព្រឹត្តិការណ៍ World Cup (គិតចាប់តាំងពីការប្រកួតនៅកាតាក្នុងវគ្គ ១៦ ក្រុមទល់នឹងអូស្ត្រាលី វគ្គ ៨ ក្រុមទល់នឹងហូឡង់ វគ្គពាក់កណ្តាលផ្តាច់ព្រ័ត្រទល់នឹងក្រូអាត និងវគ្គផ្តាច់ព្រ័ត្រទល់នឹងបារាំង រហូតមកដល់វគ្គចែកពូលឆ្នាំ ២០២៦ នេះ)។ កំណត់ត្រានេះបាននាំមុខវីរៈបុរសបាល់ទាត់ល្បីៗជំនាន់មុនដូចជា លោក Just Fontaine របស់បារាំង និងលោក Jairzinho របស់ប្រេស៊ីល ដែលធ្លាប់ធ្វើបាន ៦ ប្រកួតជាប់គ្នា។
មុនពេលការប្រកួតនេះចូលមកដល់ Messi ក៏បានវ៉ាដាច់កំណត់ត្រារបស់ស្ដេចបាល់ទាត់ លោក Pele ផងដែរ ទៅលើការមានចំណែករួមផ្សំក្នុងគ្រាប់បាល់ (Goal involvements) ច្រើនជាងគេបំផុត (ស៊ុតបញ្ចូលទី និងបញ្ជូនបាល់ឱ្យមិត្តរួមក្រុម)។ គិតត្រឹមពេលនេះ បុរសវ័យ ៣៩ ឆ្នាំរូបនេះ បានបង្ហាញខ្លួននៅក្នុង World Cup ចំនួន ២៩ ប្រកួត ដែលជាចំនួនច្រើនជាងគេបំផុតក្នុងលោក និងទទួលបានជ័យជម្នះរហូតដល់ទៅ ១១ លើក។
លើសពីនេះទៅទៀត Messi ក៏បានចែករំលែកកំណត់ត្រាជាមួយ Cristiano Ronaldo ក្នុងការក្លាយជាកីឡាករដែលបានចូលរួមប្រកួតក្នុងព្រឹត្តិការណ៍ World Cup រហូតដល់ទៅ ៦ ជំនាន់នៅលើទីលាន។ រូបគេក៏ជាកីឡាករតែម្នាក់គត់ដែលបានស៊ុតបញ្ចូលទីគ្រប់វគ្គទាំងអស់នៃយុទ្ធនាការពិភពលោក (តាំងពីវគ្គចែកពូលរហូតដល់វគ្គផ្តាច់ព្រ័ត្រ)។
Messi បានបិទបញ្ចប់វគ្គចែកពូលក្នុងនាមជាអ្នកស៊ុតបញ្ចូលទីច្រើនជាងគេបំផុត (Top scorer) ប្រចាំការប្រកួត World Cup 2026 នេះ ជាមួយនឹងគ្រាប់បាល់ចំនួន ៦ គ្រាប់ក្នុងដៃ (ស៊ុតចូលអាល់ហ្សេរី ៣ គ្រាប់ អូទ្រីស ២ គ្រាប់ និងហ្សកដានី ១ គ្រាប់)។ រូបគេកំពុងតែឈានជើងចូលទៅកាន់វគ្គ ៣២ ក្រុមចុងក្រោយ ដើម្បីការពារតំណែង និងដេញតាមក្តីស្រមៃដណ្តើមពានរង្វាន់ស្បែកជើងមាស (Golden Boot) ដែលជារង្វាន់តែមួយគត់ដែលរូបគេមិនធ្លាប់ទទួលបានពីមុនមកក្នុងអាជីព។
