Lamine Yamal ចេញមុខបញ្ចុះបញ្ចូលឱ្យ Julian Alvarez ផ្ទេរមកចូលរួមជាមួយ FC Barcelona

តារាឆ្នើមវ័យក្មេងរបស់ក្លិប Barcelona កីឡាករ Lamine Yamal បានសម្តែងបំណងប្រាថ្នាយ៉ាងខ្លាំងជាថ្មីម្តងទៀត ក្នុងការចង់ឃើញខ្សែប្រយុទ្ធ Julian Alvarez ផ្ទេរមកកាន់កីឡដ្ឋាន Camp Nou ដោយលោកជឿជាក់ថា ខ្សែប្រយុទ្ធរបស់ក្រុម Atletico Madrid រូបនេះ មានលក្ខណៈសម្បត្តិសមស្រប ១០០% ទៅនឹងទម្រង់លេងរបស់ក្លិបអ្នកមានបុណ្យ។

កីឡាករវ័យ ១៨ ឆ្នាំរូបនេះបានថ្លែងប្រាប់សារព័ត៌មាន Mundo Deportivo ដោយបើកចំហថា៖ «គ្រប់គ្នាដឹងហើយថាគេជាកីឡាករកំពូល ដែលនរណាក៏ចង់លេងជាមួយដែរ។ ពួកយើងរីករាយនឹងស្វាគមន៍គេ ហើយបើគេមកពិតមែន ពួកយើងនឹងសប្បាយចិត្តខ្លាំងណាស់។ ខ្ញុំគិតថាគេស៊ីសង្វាក់គ្នាល្អជាមួយទម្រង់លេងរបស់ Barca។ ប្រសិនបើខ្ញុំជាគេ ខ្ញុំនឹងសម្រេចចិត្តផ្ទេរមកទីនេះភ្លាម ព្រោះគេនឹងបានមកកាន់ក្លិបដ៏ល្អបំផុត ទីក្រុងដ៏ស្រស់ស្អាតបំផុត និងមានអ្នកគាំទ្រដ៏អស្ចារ្យបំផុតក្នុងលោក»។

ខណៈដែល Yamal កំពុងដើរតួជាភ្នាក់ងារមិនផ្លូវការដើម្បីបញ្ចុះបញ្ចូលខ្សែប្រយុទ្ធជម្រើសជាតិអាហ្សង់ទីន ស្ថានភាពផ្ទៃក្នុងនៅឯក្លិប Atletico Madrid ឯណោះវិញកំពុងមានភាពតានតឹងខ្លាំង។ រវាង Julian Alvarez និងគ្រូបង្វឹកលោក Diego Simeone ត្រូវបានរាយការណ៍ថា បានឈានដល់ចំណុចបាក់បែក ក្រោយពេលលោក Simeone អស់ការអត់ធ្មត់នឹងកីឡាករវ័យ ២៦ ឆ្នាំរូបនេះ ដែលតែងតែបង្ហាញតម្រុយជាសាធារណៈចង់ចាកចេញទៅកាន់ Barcelona។ ថ្នាក់ដឹកនាំរបស់ Atleti ចាប់ផ្តើមគិតគូរពីការលក់រូបគេចេញដើម្បីជៀសវាងបញ្ហាក្នុងក្រុម។ ទោះជាយ៉ាងណា ឧបសគ្គធំបំផុតសម្រាប់លោក Joan Laporta និងប្រធានបច្ចេកទេស Deco គឺបញ្ហាហិរញ្ញវត្ថុរបស់ Barcelona ព្រោះ Atletico Madrid នឹងទាមទារតម្លៃខ្លួនខ្ពស់ ប្រសិនបើត្រូវលក់កីឡាករសំខាន់ទៅឱ្យក្រុមប្រជែងក្នុងលីគជាមួយគ្នា។