Justin Bieber ចាប់ដៃគូជាមួយ Shakira, Madonna និងក្រុម BTS នឹងរួមគ្នាសម្តែងក្នុងកម្មវិធី Halftime Show លើកដំបូងក្នុងវគ្គផ្តាច់ព្រ័ត្រ World Cup 2026
អត្ថបទសរសេរដោយ Danny • 43 views
ព្រឹត្តិការណ៍កីឡាបាល់ទាត់ពិភពលោក World Cup ឆ្នាំ ២០២៦ នឹងបង្កើតទំព័រប្រវត្តិសាស្ត្រថ្មីមួយផ្នែកតន្ត្រី បន្ទាប់ពីកំពូលតារាចម្រៀងលំដាប់ពិភពលោកសញ្ជាតិកាណាដា Justin Bieber បានចុះកិច្ចសន្យាចូលរួមសម្តែងជាផ្លូវការ ក្នុងកម្មវិធីប្រគំតន្ត្រីពាក់កណ្តាលវគ្គផ្តាច់ព្រ័ត្រ (Halftime Show) លើកដំបូងបំផុត។ រូបលោកនឹងត្រូវឡើងឆាករួមគ្នាជាមួយតារាល្បីៗជាច្រើនទៀតដូចជា Madonna, Shakira និងក្រុមចម្រៀង K-pop ដ៏ល្បីល្បាញ BTS។
សហព័ន្ធកីឡាបាល់ទាត់អន្តរជាតិ (FIFA) និងអង្គការ Global Citizen បានបញ្ជាក់ថា Justin Bieber គឺជាតារាលំដាប់កំពូលចុងក្រោយគេដែលបានចូលរួមក្នុងបញ្ជីឈ្មោះអ្នកសម្តែងនៅកីឡដ្ឋាន New York New Jersey នៅថ្ងៃទី ១៩ ខែកក្កដា ខាងមុខនេះ។ កម្មវិធីលំដាប់ពិភពលោកមួយនេះ ត្រូវបានរៀបចំ និងដឹកនាំដោយលោក Chris Martin ដែលជាមេក្រុមតន្ត្រី Coldplay។ ការប្រគំតន្ត្រីនេះមានគោលបំណងសប្បុរសធម៌ដ៏ធំមួយ គឺការស្វែងរកថវិកាឱ្យបាន ១០០ លានដុល្លារ សម្រាប់មូលនិធិអប់រំ «FIFA Global Citizen Education Fund» ដើម្បីជួយដល់ការអប់រំ និងការលេងកីឡារបស់កុមារក្រីក្រនៅជុំវិញពិភពលោក។
ក្រៅពីកំពូលតារាទាំង ៤ រូបខាងលើ នៅក្នុងកម្មវិធីក៏មានការចូលរួមពីតារាចម្រៀងអាហ្វ្រិកលេចធ្លោគឺលោក Burna Boy, លោក Gustavo Dudamel, ក្រុមចម្រៀងកុមារ PS22 Chorus និងការលេចមុខរបស់តួអង្គតុក្កតាដ៏ល្បីល្បាញ The Muppets (Kermit និង Miss Piggy) ផងដែរ។ ប្រធានសហព័ន្ធ FIFA លោក Gianni Infantino បានសម្តែងការមោទនភាពយ៉ាងខ្លាំងចំពោះកិច្ចសហការនេះ ដោយលោកបានបញ្ជាក់ថា គ្មានអ្វីសំខាន់ជាងការផ្តល់ឱកាសអប់រំដល់កុមារឡើយ។ ជាមួយគ្នានេះ ក្រុមអ្នករៀបចំកម្មវិធីបានរំពឹងទុកថា ការសម្តែងរយៈពេល ១១ នាទីនេះ នឹងក្លាយជាព្រឹត្តិការណ៍តន្ត្រីដែលមានអ្នកទស្សនាច្រើនបំផុតក្នុងប្រវត្តិសាស្ត្រទូរទស្សន៍ និងជាការជួបជុំសិល្បករដ៏ធំបំផុតមិនធ្លាប់មានគិតចាប់តាំងពីព្រឹត្តិការណ៍ Live Aid មក។
