Joleon Lescott លើកឡើងថា អង់គ្លេស «មិនអាចរអ៊ូរទាំបានឡើយ» ក្រោយរងការបង្រៀនពីកំពូលកីឡាករ Lionel Messi ក្នុងវគ្គពាក់កណ្តាលផ្តាច់ព្រ័ត្រ World Cup ព្រោះ «គ្មាននរណាអាចឃាត់គាត់បានឡើយក្នុងប្រវត្តិសាស្ត្រ»
អត្ថបទសរសេរដោយ Danny • 40 views
អតីតខ្សែការពារជម្រើសជាតិអង់គ្លេស លោក Joleon Lescott បានបើកចំហរប្រាប់សារព័ត៌មាន GOAL ថា ក្រុមតោខៀវអង់គ្លេស «មិនអាចរអ៊ូរទាំ ឬបន្ទោសខ្លួនឯងបានឡើយ» ក្រោយពីរងបរាជ័យក្រោមថ្វីជើងរបស់ Lionel Messi ព្រោះនៅក្នុងប្រវត្តិសាស្ត្របាល់ទាត់ គឺពិតជា «គ្មាននរណាម្នាក់អាចទប់ទល់ ឬបញ្ឈប់កំពូលកីឡាកររូបនេះបានឡើយ»។
ក្តីស្រមៃក្នុងការបញ្ចប់ភាពរាំងស្ងួតពានរង្វាន់អស់រយៈពេល ៦០ ឆ្នាំរបស់អង់គ្លេស ត្រូវរលាយបាត់បង់ម្តងទៀតនៅក្នុងព្រឹត្តិការណ៍ World Cup ២០២៦ វគ្គពាក់កណ្តាលផ្តាច់ព្រ័ត្រ បន្ទាប់ពីពួកគេបានចាញ់ក្រុមអាហ្សង់ទីន ២-១ យ៉ាងជូរចត់។ ទោះបីជាអង់គ្លេសបាននាំមុខមុនដោយគ្រាប់បាល់របស់ Anthony Gordon ក៏ដោយ ប៉ុន្តែយុទ្ធសាស្ត្រដកថយទៅការពារខ្លាំងពេករបស់លោកគ្រូបង្វឹក Thomas Tuchel នាទីចុងក្រោយ បានបើកឱកាសឱ្យ Messi បង្ហាញឥទ្ធិពលនៅលើទីលាន។
ទោះបីជាវ័យឈានដល់ ៣៩ ឆ្នាំ និងត្រូវបានខ្សែការពារអង់គ្លេសទប់ជាប់អស់រយៈពេល ៨៥ នាទីក៏ដោយ ក៏ម្ចាស់ពានរង្វាន់ Ballon d'Or ៨ សម័យរូបនេះ បានប្រើប្រាស់ពេលវេលាត្រឹមតែប៉ុន្មាននាទីចុងក្រោយដើម្បីផ្លាស់ប្តូរការប្រកួតទាំងស្រុង។ ទីមួយ លោកបានបញ្ជូនបាល់ឱ្យ Enzo Fernandez ស៊ុតតាមស្មើ និងទីពីរ បានទម្លាក់បាល់យ៉ាងស្អាតឱ្យ Lautaro Martinez តែតបញ្ចូលទីនៅនាទីទី ៩០+២។
ជុំវិញការរិះគន់លើទម្រង់លេងរបស់អង់គ្លេស លោក Joleon Lescott បានផ្តល់ទស្សនៈការពារក្រុមថា៖
«ខ្ញុំមិនគិតថាវាជាការបង្ហាញទម្រង់លេងដ៏ល្អឥតខ្ចោះពេញមួយហ្គេមនោះទេ ប៉ុន្តែវាជាការចេះប្រើប្រាស់ឱកាសចំពេល។ លោក (Messi) ដឹងច្បាស់ថាខ្លួនឯងស្ថិតក្នុងដំណាក់កាលណានៃអាជីព។ តើគាត់នៅតែអាចបញ្ជាការប្រកួតបានទេ? ពិតណាស់ គឺបាន ប៉ុន្តែនៅក្នុងឱកាសតិចតួច ហើយគាត់បានធ្វើឱ្យឱកាសទាំងនោះទៅជាគ្រាប់បាល់ពិតប្រាកដ។ នៅពេលដែលក្រុមដេញតាមពីក្រោយ អ្នកអាចមើលឃើញភ្លាមថាគាត់ចាប់ផ្តើមបង្កើនកម្រិតលេង និងគ្រប់គ្រងបាល់បានច្រើនជាងគេក្នុងរយៈពេល ៣០ នាទីចុងក្រោយ»។
លោកបានសង្កត់ធ្ងន់បន្ថែមទៀតថា៖
«វាហាក់បីដូចជាមិនសូវយុត្តិធម៌ឡើយ ដែលយើងកំពុងតែអង្គុយរិះគន់ទម្រង់លេង យុទ្ធសាស្ត្រ និងការសម្រេចចិត្តរបស់ក្រុមអង់គ្លេស ស្របពេលដែលយើងក៏កំពុងតែលាន់មាត់សរសើរកំពូលកីឡាករដ៏អស្ចារ្យបំផុតក្នុងប្រវត្តិសាស្ត្របាល់ទាត់ម្នាក់នេះ។ យើងមិនអាចរអ៊ូរទាំថាខ្លួនឯងធ្វើខុសនោះទេ ព្រោះគាត់គ្រាន់តែធ្វើអ្វីដែលគាត់តែងតែធ្វើតែប៉ុណ្ណោះ។ គ្មាននរណាម្នាក់ក្នុងប្រវត្តិសាស្ត្របាល់ទាត់អាចបញ្ឈប់ Messi បានឡើយ ប៉ុន្តែយើងបែរជាមកអន់ចិត្តដែលយើងធ្វើវាមិនបានទៅវិញ»។
ការបរាជ័យនេះបានពន្យារពេល «ការឈឺចាប់ ៦០ ឆ្នាំ» របស់អង់គ្លេសបន្តទៅមុខទៀត ខណៈដែល Lionel Messi បានបង្ហាញឱ្យពិភពលោកឃើញម្តងទៀតថា មិនត្រូវមើលរំលងមន្តអាគមបាល់ទាត់របស់លោកឡើយ ទោះបីជាស្ថិតក្នុងស្ថានភាពបែបណាក៏ដោយ។
