Joan Laporta បង្ហាញការរំភើបចិត្តខ្លាំងចំពោះការជួបគ្នារវាង Lionel Messi និង Lamine Yamal ក្នុងវគ្គផ្តាច់ព្រ័ត្រ World Cup ដោយលើកឡើងថា «Messi គឺជាអតីតកាល រីឯ Yamal គឺជាអនាគត»
អត្ថបទសរសេរដោយ Danny • 46 views
ប្រធានក្លិប Barcelona លោក Joan Laporta ជឿជាក់ថា ការប្រកួតវគ្គផ្តាច់ព្រ័ត្រពានរង្វាន់ពិភពលោក World Cup ២០២៦ រវាងអាហ្សង់ទីន និងអេស្ប៉ាញ នឹងក្លាយជាការបង្ហាញពីឥទ្ធិពលដ៏ខ្លាំងក្លានៃសាលាបណ្តុះបណ្តាល La Masia ដោយសារតែវីរកីឡាករប្រចាំក្លិប និងតារាជំនាន់ថ្មីត្រូវមកតទល់គ្នានៅលើសមរភូមិដ៏ធំបំផុត។
លោក Laporta ដែលកំពុងមានវត្តមាននៅទីក្រុងញូវយ៉ក មុនពេលការប្រកួតវគ្គផ្តាច់ព្រ័ត្រចូលមកដល់នៅកីឡដ្ឋាន MetLife (New York/New Jersey Stadium) បានសម្តែងការមោទនភាពយ៉ាងខ្លាំង ព្រោះនៅក្នុងក្រុមជម្រើសជាតិអេស្ប៉ាញមានកីឡាកររបស់ Barcelona រហូតដល់ទៅ ៨ រូប ស្របពេលដែលអតីតនិមិត្តរូប និងជាវីរបុរសប្រចាំក្លិបគឺ Lionel Messi កំពុងដឹកនាំក្រុមអាហ្សង់ទីន។
នៅក្នុងបទសម្ភាសន៍ជាមួយវិទ្យុ RAC1 លោក Laporta បានរៀបរាប់ពីការផ្លាស់ប្តូរជំនាន់ដ៏មានអត្ថន័យរវាង Messi និង Lamine Yamal ថា៖
«Messi បានឡើងមកដល់វគ្គផ្តាច់ព្រ័ត្រ ហើយខ្ញុំពិតជារំភើបចិត្តណាស់។ គាត់គឺជាមោទនភាពរបស់សាលា La Masia។ Messi គឺជាអតីតកាល និងជាបច្ចុប្បន្នកាល រីឯ Lamine គឺជាបច្ចុប្បន្នកាល និងជាអនាគតកាល។ យើងពិតជាមានសេចក្តីសុខណាស់ដែលមានទម្រង់លេងតាមបែបបទពិតប្រាកដរបស់ Barca»។
លោកបានបន្ថែមទាំងក្តីរីករាយក្នុងនាមជាប្រធានក្លិបទៀតថា៖
«ក្នុងនាមជាប្រធានក្លិប ខ្ញុំមានមោទនភាពខ្លាំងណាស់ដែលបានបណ្តុះបណ្តាលកីឡាករទាំងពីររូបនេះនៅផ្ទះរបស់យើងផ្ទាល់។ ហើយប្រសិនបើយើងបូករួមបញ្ចូលទាំង Eric Garcia, [Pau] Cubarsi ដែលកំពុងមានយុទ្ធនាការ World Cup ដ៏អស្ចារ្យ, [Dani] Olmo, Gavi, Pedri និង Ferran [Torres] ទៀតនោះ... វាពិតជាទិដ្ឋភាពដ៏អស្ចារ្យបំផុត»។
លោក Laporta មើលឃើញថា វគ្គផ្តាច់ព្រ័ត្រនេះជាភស្តុតាងបញ្ជាក់ពីទស្សនវិជ្ជាបាល់ទាត់របស់ Barcelona ដែលនៅតែមានឥទ្ធិពលបំផុតក្នុងកម្រិតកំពូលនៃវិស័យបាល់ទាត់ពិភពលោក។ លោកបានវិភាគពីទម្រង់លេងរបស់ក្រុមទាំងពីរដោយកត់សម្គាល់ថា អាហ្សង់ទីនលេងបែបសម្រុក និងដាច់ប្តូរផ្តាច់ (Aggressive) ជាង ខណៈដែលក្រុមអេស្ប៉ាញលេងដោយមានសាមគ្គីភាព និងការសហការគ្នាខ្ពស់ ដែលមានទម្រង់លេងស្រដៀងទៅនឹងរបៀបលេងរបស់ Barca ដែរ។
ការប្រកួតវគ្គផ្តាច់ព្រ័ត្រដ៏ធំនេះ មិនត្រឹមតែជាការកាត់សេចក្តីរកម្ចាស់ជើងឯកពិភពលោកថ្មីនោះទេ ប៉ុន្តែក៏ជាឱកាសប្រវត្តិសាស្ត្រដែលសិស្សច្បង និងសិស្សប្អូនរួមសាលា La Masia ចាប់ពី Messi រហូតដល់ Yamal ត្រូវមកចារឹកឈ្មោះនៅលើឆាកអន្តរជាតិជាមួយគ្នា។
