Jeremie Aliadiere វិភាគពីតួនាទីជាប្រធានក្រុមជម្រើសជាតិរបស់ Kylian Mbappe បន្ទាប់ពីខ្សែប្រយុទ្ធឆ្នើមរូបនេះបានរិះគន់យុទ្ធសាស្ត្រក្រុមក្រោយធ្លាក់ចេញពីវគ្គពាក់កណ្តាលផ្តាច់ព្រ័ត្រ World Cup
អត្ថបទសរសេរដោយ Danny • 39 views
អតីតខ្សែប្រយុទ្ធសញ្ជាតិបារាំងលោក Jeremie Aliadiere បានលើកឡើងប្រាប់សារព័ត៌មាន GOAL ថា Kylian Mbappe នៅតែជាបុរសដ៏ស័ក្តិសមបំផុតក្នុងការបន្តពាក់ស្លាកប្រធានក្រុមជម្រើសជាតិបារាំងទៅមុខទៀត បើទោះបីជាមានការយល់ឃើញថា អ្នកធ្វើជាប្រធានក្រុម «មិនចាំបាច់ទាល់តែជាកីឡាករដែលលេងល្អដាច់គេក្នុងក្រុម» ក៏ដោយ។
ការចោទសួរជុំវិញភាពជាអ្នកដឹកនាំរបស់ Mbappe បានកើតឡើងសារជាថ្មី បន្ទាប់ពីក្រុមមាន់គកបារាំងបានរងបរាជ័យក្រោមស្នាដៃអេស្ប៉ាញ ក្នុងវគ្គពាក់កណ្តាលផ្តាច់ព្រ័ត្រ World Cup ២០២៦។ ភ្លាមៗក្រោយបញ្ចប់ការប្រកួត ខ្សែប្រយុទ្ធវ័យ ២៧ ឆ្នាំរបស់ Real Madrid រូបនេះ បានបង្ហាញអារម្មណ៍មិនពេញចិត្ត និងបាននិយាយរិះគន់ចំៗនៅក្នុងសារព័ត៌មានទៅលើប្រព័ន្ធយុទ្ធសាស្ត្រ និង «ការប្រាស្រ័យទាក់ទង» របស់លោកគ្រូបង្វឹក Didier Deschamps ដែលជាទង្វើមួយអាចបង្កឱ្យមានភាពរកាំរកូសក្នុងក្រុម។
ទោះជាយ៉ាងណា មុនពេលដែលបារាំងត្រូវឈានទៅរកយុទ្ធសម័យថ្មីក្រោមការដឹកនាំរបស់លោក Zinedine Zidane លោក Aliadiere បានផ្តល់ទស្សនៈជុំវិញការរិះគន់នេះថា៖
«ប្រធានក្រុមមិនចាំបាច់ទាល់តែជាកីឡាករដែលលេងខ្លាំងជាងគេ ឬជាមនុស្សដែលស្រែកខ្លាំងជាងគេនៅក្នុងទីលាននោះទេ។ នៅក្នុងគំនិតរបស់ខ្ញុំ គេត្រូវតែជាមនុស្សដែលដឹកនាំក្រុមតាមរយៈការធ្វើជាគំរូ (Lead by example) និងបង្ហាញផ្លូវដ៏ត្រឹមត្រូវ។ ចំណុចសំខាន់មួយទៀត គឺរបៀបដែលអ្នកនិយាយទៅកាន់សារព័ត៌មាន របៀបដែលអ្នកបង្ហាញរូបភាពចេញមកក្រៅ និងរបៀបដែលអ្នកនិយាយពីគ្រូបង្វឹក និងមិត្តរួមក្រុម គឺត្រូវតែព្យាយាមធ្វើឱ្យស្ថានការណ៍ស្ងប់ស្ងាត់»។
លោកបានបន្តទៀតថា៖
«ការធ្វើជាប្រធានក្រុមនៅពេលដែលក្រុមលេងឈ្នះ និងមានស្ថានភាពល្អ គឺនរណាក៏ធ្វើបានដែរ។ ប៉ុន្តែអ្វីដែលសំខាន់ គឺនៅពេលដែលក្រុមជួបការលំបាក តើអ្នកដោះស្រាយវាបែបណា? ការដែល Mbappe ចេញមកប្រាប់អ្នកកាសែត និងរិះគន់យុទ្ធសាស្ត្ររបស់គ្រូបង្វឹកភ្លាមៗក្រោយចាញ់វគ្គពាក់កណ្តាលផ្តាច់ព្រ័ត្រ World Cup ខ្ញុំគិតថាវាមិនមែនជាទង្វើដ៏ល្អឡើយ ព្រោះវាប្រៀបដូចជាការបន្ថែមសាំងលើភ្លើង។ តួនាទីរបស់អ្នកនៅពេលនោះ គឺត្រូវសម្រួលស្ថានការណ៍ និងនិយាយតាមការពិតដោយមិនត្រូវបាត់បង់ម្ចាស់ការលើខ្លួនឯងឡើយ»។
ទោះបីជាមានការខ្វះចន្លោះក្នុងការគ្រប់គ្រងអារម្មណ៍ក្រៅទីលានខ្លះក៏ដោយ ក៏ Aliadiere នៅតែអះអាងថា Mbappe គឺជាមេដឹកនាំដ៏អស្ចារ្យម្នាក់នៅលើទីលាន តាមរយៈការលះបង់ និងការលេងដាច់ប្តូរផ្តាច់របស់គេ។ ការបញ្ចេញមតិរិះគន់នោះ គ្រាន់តែជារបៀបដែលគេដោះស្រាយជាមួយការខកចិត្តផ្ទាល់ខ្លួនតែប៉ុណ្ណោះ ហើយរូបគេនៅតែជាមនុស្សដែលស័ក្តិសមបំផុតសម្រាប់តំណែងនេះដដែល។
បច្ចុប្បន្ន មុនពេលលោក Deschamps ត្រូវលាឈប់ពីតំណែងគ្រូបង្វឹកជាផ្លូវការ រូបលោក និងប្រធានក្រុម Mbappe ត្រូវដឹកនាំក្រុមបារាំងប្រកួតចុងក្រោយបង្អស់ដើម្បីដណ្តើមចំណាត់ថ្នាក់លេខ ៣ ជាមួយក្រុមជម្រើសជាតិអង់គ្លេសនៅថ្ងៃសៅរ៍នេះ។ ស្របពេលជាមួយគ្នានេះ Mbappe កំពុងតែឈរនៅលើកំពូលតារាងដេញថ្លៃស្បែកជើងមាស (Golden Boot) ដោយរកបាន ៨ គ្រាប់ ស្មើគ្នាជាមួយកំពូលខ្សែប្រយុទ្ធអាហ្សង់ទីន Lionel Messi ផងដែរ។
