Ibrahima Konate បញ្ជាក់ថាក្រុមបារាំងមិនធ្លាក់ចូលក្នុង «អន្ទាក់ពាក្យសម្តី» របស់ Lamine Yamal ឡើយ មុនការប្រកួតពាក់កណ្តាលផ្តាច់ព្រ័ត្រ World Cup
អត្ថបទសរសេរដោយ Danny • 27 views
ខ្សែការពារក្រុមជម្រើសជាតិបារាំង កីឡាករ Ibrahima Konate បានវាយបកទៅលើការលើកឡើងរបស់ខ្សែប្រយុទ្ធវ័យក្មេង Lamine Yamal ដែលបាននិយាយថា បារាំង (France) គួរតែមានការ «ភ័យខ្លាច» លើក្រុមអេស្ប៉ាញ (Spain) មុនពេលក្រុមយក្សទាំងពីរត្រូវជួបគ្នាក្នុងវគ្គពាក់កណ្តាលផ្តាច់ព្រ័ត្រពានរង្វាន់ពិភពលោក World Cup ២០២៦ នេះ។
កាលពីពេលថ្មីៗនេះ បន្ទាប់ពីអេស្ប៉ាញបានយកឈ្នះប៊ែលហ្សិកក្នុងវគ្គ ៨ ក្រុមចុងក្រោយ តារាឆ្នើមរបស់ក្លិប Barcelona គឺ Yamal បាននិយាយឌឺដងផ្ដល់សម្ពាធមកលើខាងបារាំង។ ជុំវិញរឿងនេះ Konate បានឆ្លើយតបទៅអ្នកសារព័ត៌មានវិញភ្លាមៗថា៖ «តើបារាំងខ្លាចអេស្ប៉ាញមែនទេ? អត់ទេ! បើនិយាយឱ្យត្រង់ទៅ ពួកយើងមិនបានយកចិត្តទុកដាក់លើរាល់ពាក្យសម្តីដែលគេនិយាយមុនការប្រកួតនោះឡើយ»។ ខ្សែការពាររូបនេះបានបន្ថែមថា ក្រុមបារាំងមិនត្រូវខ្លាចនរណាម្នាក់ឡើយ អ្វីដែលសំខាន់គឺត្រូវរក្សាការបន្ទាបខ្លួន និងមិនត្រូវធ្លាក់ចូលក្នុងអន្ទាក់ពាក្យសម្តីបែបនេះទេ ដោយគេសង្ឃឹមថាលទ្ធផលក្រោយបញ្ចប់ការប្រកួតនឹងបង្ហាញថាអ្នកណាជាអ្នកឈ្នះពិតប្រាកដ។
អតីតខ្សែការពារកណ្តាលរបស់ក្លិប Liverpool ដែលទើបតែបានផ្ទេរទៅរួមរស់ជាមួយក្លិប Real Madrid រូបនេះ បានសង្កត់ធ្ងន់ថា ក្រុមរបស់លោកគ្រូបង្វឹក Didier Deschamps មិនអាចផ្តោតអារម្មណ៍ទៅលើតែ Yamal ម្នាក់នោះទេ ព្រោះក្រុមអេស្ប៉ាញទាំងមូលសុទ្ធតែជាកីឡាករកម្រិតកំពូល និងមានគ្រោះថ្នាក់ខ្លាំងដូចគ្នា។
ក្រៅពីនេះ Konate ក៏បាននិយាយរំលឹកដល់រឿងរ៉ាវកាលពីពានរង្វាន់ Euro 2024 ដែលកាលនោះអេស្ប៉ាញបានយកឈ្នះបារាំងក្នុងវគ្គពាក់កណ្តាលផ្តាច់ព្រ័ត្រដែរ។ គេបានពន្យល់ថា កាលនោះខ្សែការពារជម្រើសដំបូងរបស់បារាំងភាគច្រើន គឺមិនធ្លាប់បានលេងចាប់គូសហការគ្នាពីមុនមកឡើយ ដែលធ្វើឱ្យមានភាពរញ៉េរញ៉ៃក្នុងទីលាន ប៉ុន្តែលើកនេះស្ថានភាពគឺខុសប្លែកពីមុនហើយ។ បច្ចុប្បន្ន គោលដៅធំបំផុតរបស់ Konate គឺចង់ជួយបារាំងឡើងទៅវគ្គផ្តាច់ព្រ័ត្រ World Cup ជាលើកទីបីជាប់ៗគ្នា និងសងសឹកក្រុមអេស្ប៉ាញឱ្យខានតែបាន។
