Harry Kane បើកកកាយពីរឿងរ៉ាវទៅលេងវាយកូនហ្គោលជាមួយប្រធានាធិបតីអាមេរិក Donald Trump
អត្ថបទសរសេរដោយ Danny • 40 views
ប្រធានក្រុមជម្រើសជាតិអង់គ្លេស កីឡាករ Harry Kane បានបើកកកាយពីបទពិសោធន៍ដ៏ប្លែក និងមិននឹកស្មានដល់មួយ ក្នុងការទៅលេងវាយកូនហ្គោល (Golf) ជាមួយប្រធានាធិបតីអាមេរិកលោក Donald Trump នៅរដ្ឋផ្លរីដា កាលពីប្រមាណ 18 ខែមុន។ ការទម្លាយរឿងនេះធ្វើឡើងនៅក្នុងសន្និសីទកាសែតនាទីក្រុងម៉ៃអាមី មុនពេលក្រុមអង់គ្លេសត្រូវចូលរួមប្រកួតវគ្គ 8 ក្រុមចុងក្រោយ World Cup ទល់នឹងក្រុមន័រវែស (Norway )។
ខ្សែប្រយុទ្ធវ័យ 32 ឆ្នាំរបស់ក្លិប Bayern Munich រូបនេះបានរៀបរាប់ថា លោកបានទទួលការអញ្ជើញផ្ទាល់ពីលោកប្រធានាធិបតី ក្នុងអំឡុងពេលដែលលោកទៅសម្រាកលំហែកាយនៅតំបន់ Palm Beach។ លោក Kane បានសរសើរពីសមត្ថភាពលេងរបស់លោក Trump វ័យ 80 ឆ្នាំថា៖ «ការលេងហ្គោលរបស់គាត់គឺល្អខ្លាំងណាស់។ ខ្ញុំសង្ឃឹមថាខ្ញុំអាចលេងហ្គោលបានល្អដូចគាត់នៅពេលដែលខ្ញុំមានអាយុច្រើនដូចគាត់។ វាពិតជាបទពិសោធន៍ដ៏ពិសេសមួយ ហើយខ្ញុំពិតជាអរគុណដែលគាត់បានអញ្ជើញខ្ញុំទៅលេងជាមួយ»។ មុននេះបន្តិច លោក Donald Trump ក៏ធ្លាប់បានសរសើរ Kane លើបណ្តាញសង្គម Truth Social ដែរថា ជាកីឡាករដ៏អស្ចារ្យម្នាក់ និងជាអ្នកលេងហ្គោលបានល្អ ក្រោយពេលអង់គ្លេសឈ្នះម៉ិកស៊ិក 3-2 ក្នុងវគ្គ 16 ក្រុមចុងក្រោយ។
ក្រៅពីទទួលបានការចាប់អារម្មណ៍ពីថ្នាក់ដឹកនាំអាមេរិក ក្រុមកីឡាករអង់គ្លេសក៏ទទួលបានកម្លាំងចិត្តបន្ថែមពីលោក Sir David Beckham ដែលបានចូលទៅសួរសុខទុក្ខ និងផ្តល់កម្លាំងចិត្តដល់ក្រុមកីឡាករផ្ទាល់ដល់កន្លែងហ្វឹកហាត់របស់ក្លិប Inter Miami ផងដែរ។ លោក Kane បានបញ្ជាក់ថាលោក Beckham តែងតែផ្ញើសារមកលើកទឹកចិត្តលោកជានិច្ចក្រោយចប់ការប្រកួត ហើយវត្តមានរបស់វីរៈបុរសរូបនេះ បានធ្វើឱ្យក្រុមកីឡាករទាំងអស់មានទឹកចិត្តកាន់តែខ្លាំងក្នុងការប្រកួតដ៏សំខាន់ទល់នឹងន័រវែស នៅថ្ងៃសៅរ៍នេះ ដើម្បីដណ្តើមយកកៅអីឡើងទៅវគ្គពាក់កណ្តាលផ្តាច់ព្រ័ត្រ World Cup ក្រោមការដឹកនាំរបស់គ្រូបង្វឹកលោក Thomas Tuchel។
