FIFA បដិសេធសំណើរបស់បារាំងក្នុងការលុបកាតលឿងរបស់ Michael Olise មុនជំនួបជាមួយម៉ារ៉ុក
អត្ថបទសរសេរដោយ Danny • 43 views
គ្រូបង្វឹកក្រុមជម្រើសជាតិបារាំង លោក Didier Deschamps បានបញ្ជាក់ថា សហព័ន្ធកីឡាបាល់ទាត់បារាំងបានទទួលការជូនដំណឹងពីស្ថាប័ន FIFA ជុំវិញការបដិសេធពាក្យបណ្តឹងតវ៉ា សុំលុបកាតលឿងរបស់ខ្សែប្រយុទ្ធ Michael Olise។ កាតលឿងនេះបានកើតឡើងក្នុងប្រកួតវគ្គ ១៦ ក្រុមចុងក្រោយ ដែលបារាំងបានយកឈ្នះប៉ារ៉ាហ្គាយ ក្រោយមានការទាញអាវគ្នាជាមួយកីឡាករ Matias Galarza។ ការសម្រេចចិត្តរក្សាទណ្ឌកម្មនេះ បានធ្វើឱ្យខាងភាគីបារាំងមានការមិនពេញចិត្តយ៉ាងខ្លាំង ព្រោះ Olise គឺជាកីឡាករសំខាន់ដែលបានចូលលេងគ្រប់ប្រកួត និងបង្កើតឱកាសឱ្យមិត្តរួមក្រុម (Assists) បានចំនួន ៥ ដងរួចមកហើយនៅក្នុងព្រឹត្តិការណ៍នេះ។
ការមិនយល់ព្រមរបស់ FIFA លើករណីរបស់បារាំង បានបង្កើតឱ្យមានការរិះគន់អំពីស្តង់ដារពីរ ព្រោះកាលពីប៉ុន្មានថ្ងៃមុន ស្ថាប័នដដែលនេះទើបតែបានយល់ព្រមពន្យារពេលការពិន័យកាតក្រហមរបស់ខ្សែប្រយុទ្ធអាមេរិក Folarin Balogun ដែលអនុញ្ញាតឱ្យគេអាចចូលលេងក្នុងវគ្គ ១៦ ក្រុមចុងក្រោយទល់នឹងប៊ែលហ្សិកបាន ទោះបីជាចុងក្រោយក្រុមអាមេរិកត្រូវធ្លាក់ក្រោមថ្វីជើងប៊ែលហ្សិក ៤-១ ក៏ដោយ។ បច្ចុប្បន្ន ក្រុមប៊ែលហ្សិកត្រូវឡើងទៅជួបអេស្ប៉ាញនៅវគ្គ ៨ ក្រុមចុងក្រោយ ដើម្បីស្វែងរកក្រុមឈ្នះឡើងទៅជួបក្រុមបារាំង ឬម៉ារ៉ុក នៅវគ្គពាក់កណ្តាលផ្តាច់ព្រ័ត្រ។
មុននឹងគិតដល់វគ្គបន្ត លោក Deschamps បានក្រើនរំលឹកដល់កូនក្រុមទាំងអស់កុំឱ្យមានការធ្វេសប្រហែសឱ្យសោះ ក្នុងការប្រកួតវគ្គ ៨ ក្រុមចុងក្រោយទល់នឹងក្រុមជម្រើសជាតិម៉ារ៉ុក (Morocco )។ លោកបានសង្កត់ធ្ងន់ថា ម៉ារ៉ុកមិនមែនជាប៉ារ៉ាហ្គាយឡើយ ពួកគេជាក្រុមដែលមានគុណភាពខ្ពស់ ចូលចិត្តគ្រប់គ្រងបាល់ និងមានតំបន់ប្រយុទ្ធដ៏គួរឱ្យខ្លាច ថែមទាំងធ្លាប់បានឡើងដល់វគ្គផ្តាច់ព្រ័ត្រពានរង្វាន់ទ្វីបអាហ្វ្រិក (AFCON) ទៀតផង។ ការប្រកួតដ៏សំខាន់នេះនឹងត្រូវធ្វើឡើងនៅថ្ងៃព្រហស្បតិ៍នេះ ហើយលោក Deschamps ត្រូវគិតគូរយ៉ាងហ្មត់ចត់ថាតើគួរដាក់ Olise ឱ្យចូលលេងតាំងពីដើមប្រកួតដែរឬទេ ព្រោះបើកីឡាកររូបនេះទទួលបានកាតលឿងមួយទៀត គេនឹងត្រូវរងការពិន័យហាមឃាត់មិនឱ្យចូលលេងនៅវគ្គពាក់កណ្តាលផ្តាច់ព្រ័ត្រឡើយ ប្រសិនបើបារាំងអាចឆ្លងផុតម៉ារ៉ុក។
