ច្បាប់បាល់ទាត់ត្រូវរលាយ? បែលហ្ស៊ិកស្រឡាំងកាំងយ៉ាងខ្លាំង ក្រោយ FIFA សម្រេចចិត្តព្យួរទោសកាតក្រហមឱ្យអាមេរិក តាមសំណើផ្ទាល់របស់លោក Donald Trump

រឿងរ៉ាវដ៏ភ្ញាក់ផ្អើលមួយបានកើតឡើងនៅក្នុងព្រឹត្តិការណ៍ World Cup ២០២៦ បន្ទាប់ពីមានសេចក្តីរាយការណ៍ថា ប្រធានាធិបតីសហរដ្ឋអាមេរិកលោក Donald Trump បានទូរស័ព្ទផ្ទាល់ទៅកាន់ប្រធានសហព័ន្ធកីឡាបាល់ទាត់អន្តរជាតិ (FIFA) លោក Gianni Infantino ដើម្បីស្នើសុំឱ្យពិនិត្យឡើងវិញនូវទោសកាតក្រហមរបស់ខ្សែប្រយុទ្ធអាមេរិក Folarin Balogun។ ភ្លាមៗបន្ទាប់ពីនោះ គណៈកម្មការវិន័យរបស់ FIFA បានសម្រេចចិត្តព្យួរទោសកាតក្រហមនេះជាបណ្តោះអាសន្ន ដែលអនុញ្ញាតឱ្យកីឡាកររូបនេះអាចចូលលេងក្នុងវគ្គ ១៦ ក្រុមចុងក្រោយបាន.។

មុននេះ Folarin Balogun ត្រូវបានអាជ្ញាកណ្តាលពិន័យកាតក្រហមបណ្តេញចេញពីទីលាន បន្ទាប់ពី VAR បង្ហាញថាគេបានជាន់កំភួនជើងខ្សែការពារ Tarik Muharemovic ក្នុងប្រកួតឈ្នះបូស្ន៊ី ២-០។ ទោះជាយ៉ាងណា FIFA បានប្រើប្រាស់មាត្រា ២៧ នៃក្រមវិន័យ ដើម្បីព្យួរការហាមឃាត់មួយប្រកួតនេះ ដោយកំណត់ថារូបគេនឹងត្រូវពិន័យលុះត្រាតែប្រព្រឹត្តកំហុសដដែលម្តងទៀតក្នុងរយៈពេល ១២ ខែខាងមុខ។ លោក Donald Trump បានបង្ហោះសារអបអរនៅលើបណ្តាញសង្គម Truth Social ថា៖ «សូមអរគុណដល់ FIFA ដែលបានធ្វើរឿងដ៏ត្រឹមត្រូវ និងបានកែប្រែភាពអយុត្តិធម៌ដ៏ធំធេងនេះ!»។

យ៉ាងណាមិញ ការសម្រេចចិត្តមិនធ្លាប់មាននេះ បានធ្វើឱ្យសមាគមបាល់ទាត់ប្រទេសបែលហ្ស៊ិក (RBFA) បង្ហាញការស្រឡាំងកាំង និងខឹងសម្បារយ៉ាងខ្លាំង។ ភាគីបែលហ្ស៊ិកបានលើកឡើងថា តាមមាត្រា ៦៦.៤ និងមាត្រា ១០.៥ នៃច្បាប់ FIFA កាតក្រហមផ្ទាល់ត្រូវតែផ្អាកកីឡាករដោយស្វ័យប្រវត្តិនូវប្រកួតបន្ទាប់។ ពួកគេកំពុងធ្វើការស៊ើបអង្កេតលើជម្រើសផ្លូវច្បាប់ទាំងអស់ជុំវិញរឿងរ៉ាវអន្តរាគមន៍នយោបាយនេះ។

យោងតាមកម្មវិធីប្រកួតផ្លូវការ ជំនួបដ៏តានតឹងវគ្គ ១៦ ក្រុមចុងក្រោយរវាង សហរដ្ឋអាមេរិក (USA) និង បែលហ្ស៊ិក (Belgium) នឹងត្រូវធ្វើឡើងនៅម៉ោង ៧:០០ ព្រឹក ថ្ងៃស្អែក (ថ្ងៃអង្គារ ទី ៧ ខែកក្កដា) ស្របតាមម៉ោងនៅក្នុងប្រទេសកម្ពុជា។ វត្តមានរបស់ Balogun នឹងក្លាយជាអាវុធដ៏សំខាន់របស់លោក Mauricio Pochettino ក្នុងការតទល់នឹងក្រុមអឺរ៉ុបមួយនេះ។