តើអាជ្ញាកណ្តាលពិតជាកាត់សេចក្តីមិនបានល្អមែនឬ? ប្រធានអាជ្ញាកណ្តាលរបស់ FIFA ឆ្លើយតបទៅនឹងការរិះគន់របស់លោក Didier Deschamps ក្រោយបារាំងធ្លាក់ចេញពី World Cup
អត្ថបទសរសេរដោយ Danny • 29 views
ប្រធានផ្នែកអាជ្ញាកណ្តាលរបស់សហព័ន្ធ FIFA លោក Pierluigi Collina បានចេញមុខបដិសេធយ៉ាងដាច់អហង្ការចំពោះការលើកឡើងរបស់លោក Didier Deschamps បន្ទាប់ពីគ្រូបង្វឹកក្រុមជម្រើសជាតិបារាំងរូបនេះ បានចោទសួរពីគុណភាពនៃការកាត់សេចក្តី នៅក្នុងការប្រកួតដែលក្រុមមាន់គកបារាំងចាញ់អេស្ប៉ាញ ២-០ ក្នុងវគ្គពាក់កណ្តាលផ្តាច់ព្រ័ត្រ World Cup។
នៅក្នុងការប្រកួតដ៏តានតឹងនៅរដ្ឋ Texas លោក Deschamps បានបង្ហាញការមិនពេញចិត្តយ៉ាងខ្លាំងចំពោះអាជ្ញាកណ្តាលសញ្ជាតិសាល់វ៉ាឌ័រ លោក Ivan Barton ជាពិសេសចំពោះការសម្រេចចិត្តពិន័យបាល់ប៉េណាល់ទីនៅវគ្គទីមួយ បន្ទាប់ពី Lamine Yamal ត្រូវរងការបង្កកំហុសពី Lucas Digne ដែលស៊ុតបញ្ចូលទីដោយ Mikel Oyarzabal។ លោក Deschamps បានថ្លែងទៅកាន់អ្នកសារព័ត៌មានទាំងហួសចិត្តថា៖
«បើខ្ញុំនិយាយអ្វីចេញទៅ ខ្ញុំនឹងមើលទៅដូចជាអ្នកចាញ់ដែលមិនព្រមទទួលស្គាល់ការពិតអញ្ចឹង។ ប៉ុន្តែខ្ញុំចង់សួរអ្នកទាំងអស់គ្នាវិញថា៖ តើអាជ្ញាកណ្តាលរូបនេះ មានកម្រិតសមត្ថភាពគ្រប់គ្រាន់ក្នុងការកាត់សេចក្តីប្រកួតវគ្គពាក់កណ្តាលផ្តាច់ព្រ័ត្រដែរឬទេ? វាមានទាំងរឿងបាល់ប៉េណាល់ទី និងរឿងរ៉ាវចម្រូងចម្រាសជាច្រើនទៀត បូកផ្សំបញ្ចូលគ្នា»។
រឿងរ៉ាវដែលធ្វើឱ្យលោក Deschamps ក្តៅចុងច្រមុះខ្លាំងបំផុតនោះគឺ មុនពេលមានបាល់ប៉េណាល់ទី លោកយល់ថា Yamal បានលេងបាល់ប៉ះដៃ (Handball) រួចទៅហើយ ប៉ុន្តែត្រូវបានបដិសេធបន្ទាប់ពីពិនិត្យ VAR។ លើសពីនេះ នៅនាទីទី ៤៣ លោក Barton បានសម្រេចចិត្តផ្លាស់ប្តូរការសម្រេចចិត្តរបស់ខ្លួនវិញ ដោយលុបចោលបាល់ហ្វ្រីឃីកដ៏មានឱកាសរបស់បារាំងនៅមុខប្រអប់គ្រោះថ្នាក់ ក្រោយពេលពិគ្រោះជាមួយជំនួយការរបស់ខ្លួន ទោះបីជាអាជ្ញាកណ្តាលទី ៤ និងទី ៥ បានគាំទ្របារាំងតាំងពីដំបូងក៏ដោយ។ គ្រូបង្វឹករូបនេះក៏បានរិះគន់ពីការបណ្តែតបណ្តោយឱ្យកីឡាករអេស្ប៉ាញរួចខ្លួនពីកាតលឿង ទោះបីជាមានការបង្កកំហុសធ្ងន់ៗជាច្រើនលើកក៏ដោយ។
មិនទុកឱ្យរង់ចាំយូរ លោក Pierluigi Collina វីរអាជ្ញាកណ្តាលជើងចាស់ដែលបច្ចុប្បន្នជាប្រធានផ្នែកកាត់សេចក្តីរបស់ FIFA បានចេញមុខមកការពារលោក Barton និងក្រុមការងារភ្លាមៗ។ លោកបានសង្កត់ធ្ងន់ថា៖
«ឆ្លើយតបទៅនឹងមតិរបស់លោក Didier Deschamps ដែលចោទសួរថាតើអាជ្ញាកណ្តាលមានកម្រិតគ្រប់គ្រាន់ក្នុងការដឹកនាំការប្រកួតវគ្គពាក់កណ្តាលផ្តាច់ព្រ័ត្រដែរឬទេ គឺ FIFA សូមបញ្ជាក់យ៉ាងច្បាស់ថា៖ "បាទ ពិតជាមានពិតប្រាកដណាស់"។ អាជ្ញាកណ្តាលរបស់យើងសុទ្ធតែជាកម្រិតពិភពលោក (World class)»។
ទោះបីជាមានការជជែកដេញដោលរឿងអាជ្ញាកណ្តាលក៏ដោយ ក៏លោក Deschamps បានទទួលស្គាល់ត្រង់ៗផងដែរថា ទម្រង់លេងរបស់ក្រុមកីឡាករបារាំងខ្លួនឯង ក៏មិនទាន់ឈានដល់កម្រិតដែលអាចឡើងទៅវគ្គផ្តាច់ព្រ័ត្រ ៣ ជំនាន់ជាប់គ្នានោះដែរ ដោយសារតែការលេងខុសបច្ចេកទេសច្រើន និងការមិនអាចទម្លុះរំលាយតំបន់ការពារដ៏រឹងមាំរបស់អេស្ប៉ាញបាន។
