FC Barcelona បង្ហាញឈុតអាវក្រៅដីថ្មីពណ៌ខ្មៅ លាយស្វាយ អមដោយឃ្លាដ៏មានអត្ថន័យរបស់វីរបុរស Kobe Bryant សម្រាប់រដូវកាល ២០២៦/២៧
អត្ថបទសរសេរដោយ Danny • 23 views
ក្លិប FC Barcelona បានប្រកាសបង្ហាញឈុតអាវប្រកួតក្រៅដី (Away Kit) ផ្លូវការរបស់ខ្លួនសម្រាប់រដូវកាល ២០២៦/២៧ ដែលជាការរចនាឡើងរួមគ្នារវាងក្រុមហ៊ុន Nike និងម៉ាកសញ្ញា Kobe Bryant Brand។
អាវប្រកួតថ្មីនេះបានប្រើប្រាស់ពណ៌ខ្មៅជាគ្រឹះបាត ជាមួយនឹងការដេញពណ៌ (Gradient) ទៅជាពណ៌ស្វាយនៅផ្នែកខាងក្រោម អមដោយការរចនាលម្អិតពណ៌មាស និងធាតុក្រាហ្វិកដែលផ្សារភ្ជាប់យ៉ាងជិតស្និទ្ធទៅនឹងអត្តសញ្ញាណរបស់ម៉ាកសញ្ញា Kobe Bryant។ អ្វីដែលកាន់តែពិសេសនោះ គឺនៅផ្នែកខាងក្នុងកអាវមានបង្កប់នូវឃ្លាប្រដៅដ៏ល្បីល្បាញរបស់ Kobe Bryant ដែលសរសេរថា "Leave the game better than you found it" (ចាកចេញពីហ្គេមកីឡានេះ ដោយបន្សល់ទុកអ្វីៗដែលប្រសើរជាងពេលអ្នកបានជួបវា)។
នៅក្នុងយុទ្ធនាការផ្សព្វផ្សាយពាណិជ្ជកម្មនៃការបើកសម្ពោធអាវថ្មីនេះ មានការចូលរួមសម្តែងពីសំណាក់កីឡាករ និងកីឡាការិនីឆ្នើមៗប្រចាំក្លិបជាច្រើនរូប រួមមាន Pedri, Gavi, Frenkie de Jong, Alejandro Balde, Ewa Pajor និង Patri Guijarro ផងដែរ។
សម្រាប់ពេលនេះ អាវប្រកួតដ៏ប្រណីតនេះត្រូវបានដាក់បង្ហាញត្រឹមជាផលិតផលពាណិជ្ជកម្មនៅឡើយ ដោយកាលបរិច្ឆេទនៃការផ្លាស់ប្តូរមកពាក់ប្រកួតផ្លូវការនៅលើទីលានមិនទាន់ត្រូវបានបញ្ជាក់ច្បាស់លាស់នៅឡើយទេ។ ទោះជាយ៉ាងណា វាត្រូវបានរំពឹងថានឹងត្រូវប្រើប្រាស់នៅក្នុងអំឡុងពេលប្រកួត Pre-season ដែលត្រូវគ្នានឹងការប្រកួតដំបូងៗរបស់ក្រុមធំ។ អាវក្រៅដីថ្មីនេះ នឹងមានដាក់លក់ចាប់ពីថ្ងៃសុក្រ ទី ២៤ ខែកក្កដានេះតទៅ នៅលើហាងទំនិញអនឡាញរបស់ក្លិប (e-commerce store), ហាង Barça Stores និងតាមតំណាងចែករាយរបស់ Nike។
