Enzo Fernandez បង្កភាពចម្រូងចម្រាសខ្លាំងតាមរយៈការបង្ហោះឌឺដងដាក់ អង់គ្លេស ក្រោយ អាហ្សង់ទីន ឡើងទៅវគ្គផ្តាច់ព្រ័ត្រ World Cup រហូតធ្វើឱ្យ Chelsea ត្រូវលុបការបង្ហោះចោលវិញ
អត្ថបទសរសេរដោយ Danny • 22 views
ខ្សែបម្រើរបស់ក្លិប Chelsea កីឡាករ Enzo Fernandez បានក្លាយជាផ្ទាំងស៊ីបនៃការរិះគន់យ៉ាងចាស់ដៃពីសំណាក់អ្នកគាំទ្រក្រុមជម្រើសជាតិអង់គ្លេស បន្ទាប់ពីរូបគេបានបង្ហោះសារឌឺដងនៅលើបណ្តាញសង្គម ក្រោយពេលជួយក្រុមមេឃខៀវអាហ្សង់ទីនយកឈ្នះអង់គ្លេស ២-១ ក្នុងវគ្គពាក់កណ្តាលផ្តាច់ព្រ័ត្រ World Cup យ៉ាងជក់ចិត្ត។
រលកកំហឹងបានផ្ទុះឡើងកាន់តែខ្លាំងបន្ទាប់ពី Enzo បានចែករំលែករូបភាពនៅលើ Instagram របស់ខ្លួនជាមួយ Lionel Messi និង Leandro Paredes ដោយភ្ជាប់ជាមួយបទចម្រៀងដ៏ល្បី «Wonderwall» របស់ក្រុមចម្រៀង Oasis។ បទចម្រៀងមួយបទនេះ ត្រូវបានគេស្គាល់ថាជាបទចម្រៀងតំណាងក្រៅផ្លូវការ (Unofficial anthem) នៃដំណើររបស់ក្រុមអង់គ្លេសនៅក្នុងទឹកដីអាមេរិកខាងជើង ដែល Harry Kane និងមិត្តរួមក្រុមតែងតែច្រៀងលេងកម្សាន្តជាមួយអ្នកគាំទ្រ។ ការជ្រើសរើសបទចម្រៀងនេះ ត្រូវបានគេមើលឃើញថាជាការ «ឌឺដងចំៗ» ទៅកាន់ក្រុមដែលរងបរាជ័យ។ ទោះបីជា Enzo បានលុបបទចម្រៀងនោះចេញពីការបង្ហោះឡើងវិញក៏ដោយ ប៉ុន្តែអ្នកគាំទ្រអង់គ្លេសបានដឹង និងប្រតិកម្មបាត់ទៅហើយ។
ក្រៅពីសកម្មភាពលើបណ្តាញសង្គម Enzo ក៏បានធ្វើឱ្យអ្នកគាំទ្រតោខៀវអង់គ្លេសក្តៅក្រហាយតាំងពីនៅលើទីលានម៉្លេះ។ ក្រោយស៊ុតបញ្ចូលទីគ្រាប់តាមស្មើនៅនាទីទី ៨៥ រូបគេបានរត់ទៅអបអរសាទរនៅមុខតំបន់បច្ចេកទេសរបស់អង់គ្លេស និងអ្នកគាំទ្រ ដោយធ្វើកាយវិការយកដៃខ្ទប់ត្រចៀក លៀនអណ្តាត និងផ្លុំខ្យល់ថើបឌឺដង។
រឿងរ៉ាវកាន់តែវឹកវររហូតដល់ក្រុមការងារបណ្តាញសង្គមរបស់ក្លិប Chelsea ត្រូវបង្ខំចិត្តលុបការបង្ហោះនៅលើបណ្តាញសង្គម X (Twitter) វិញភ្លាមៗ បន្ទាប់ពីពួកគេបានបង្ហោះរូបភាពអបអរសាទររបស់ Enzo ជាមួយរូបតំណាងគ្រាប់បែកផ្ទុះ (Explosion emoji) ដែលធ្វើឱ្យអ្នកគាំទ្រ Chelsea ជនជាតិអង់គ្លេសផ្ទុះកំហឹងយ៉ាងខ្លាំង និងចាត់ទុកទង្វើនេះថាជា «រឿងអាម៉ាស់ និងគ្មានការគោរព» (Absolute disgrace)។
ស្ថានភាពរបស់ Enzo នៅ Chelsea កំពុងតែស្ថិតក្នុងភាពរសើបខ្លាំង ដោយសារតែរូបគេធ្លាប់មានព័ត៌មានចង់ផ្ទេរទៅ Real Madrid និងធ្លាប់រងពិន័យផ្ទៃក្នុងកាលពីខែមេសា។ ការបង្កជម្លោះជាមួយកីឡាករអង់គ្លេសដែលជាស្នូលរបស់ Chelsea នាពេលនេះ អាចនឹងធ្វើឱ្យរូបគេប្រឈមមុខនឹងភាពតានតឹងកាន់តែខ្លាំងនៅពេលត្រឡប់ទៅកាន់ក្លិបវិញក្រោយចប់ភារកិច្ច World Cup។
បច្ចុប្បន្ន ក្រុមជម្រើសជាតិអាហ្សង់ទីនបានបង្វែរអារម្មណ៍ទាំងស្រុងទៅលើការប្រកួតវគ្គផ្តាច់ព្រ័ត្រដ៏ធំទល់នឹងអេស្ប៉ាញ នៅថ្ងៃអាទិត្យនេះ ដើម្បីការពារតំណែងជើងឯកពិភពលោករបស់ខ្លួន។
