ហេតុផលនៅពីក្រោយ៖ មូលហេតុដែលលោក Deco រារែកចិត្តមិនចង់ពន្យារកិច្ចសន្យាឱ្យ Ferran Torres នៅ Barcelona ស្របពេល PSG កំពុងតាមទិញ
អត្ថបទសរសេរដោយ Danny • 20 views
នាយកកីឡារបស់ក្លិប Barcelona លោក Deco ត្រូវបានរាយការណ៍ថាកំពុងមានភាពរារែកចិត្តក្នុងការផ្តល់កិច្ចសន្យាថ្មីជូនខ្សែប្រយុទ្ធ Ferran Torres នៅកីឡដ្ឋាន Camp Nou ដោយសារតែលក្ខខណ្ឌហិរញ្ញវត្ថុសម្ងាត់មួយដែលជាប់ជំពាក់ជាមួយក្លិប Manchester City។ ទោះបីជាខ្សែប្រយុទ្ធរូបនេះជាចំណែកមួយដ៏មានប្រយោជន៍ក្នុងយុទ្ធសាស្ត្របង្វិលកីឡាកររបស់លោក Hansi Flick ក៏ដោយ ប៉ុន្តែស្ថានភាពសេដ្ឋកិច្ចដ៏លំបាករបស់ក្លិប បានបង្ខំឱ្យពួកគេត្រូវគិតគូរឡើងវិញពីអនាគតវែងឆ្ងាយរបស់កីឡាករជម្រើសជាតិអេស្ប៉ាញរូបនេះ។
យោងតាមសារព័ត៌មាន The Athletic បានទម្លាយថា ការមិនចង់បន្តកិច្ចសន្យារបស់ Barcelona គឺដោយសារតែលក្ខខណ្ឌចងជើងមួយកាលពីពេលផ្ទេរចេញពី Man City កាលពីខែមករា ឆ្នាំ ២០២២។ កាលនោះ ក្លិបយក្សកាតាឡានបានព្រមព្រៀងទិញក្នុងតម្លៃដំបូង ៥៥ លានអឺរ៉ូ រួមជាមួយប្រាក់លើកទឹកចិត្តតាមទម្រង់លេង ១០ លានអឺរ៉ូទៀត។ ទោះជាប្រាក់ទាំងនោះត្រូវបានបង់រួចរាល់អស់ហើយក្តី ប៉ុន្តែមានព័ត៌មានលម្អិតថ្មីមួយបានលេចឡើងគឺ៖ Barcelona ត្រូវបង្ខំចិត្តបង់ប្រាក់បន្ថែមចន្លោះពី ៧ លានទៅ ៨ លានអឺរ៉ូទៀតឱ្យទៅក្រុមជើងឯក Premier League (គឺ Man City) ប្រសិនបើពួកគេព្រមព្រៀងចុះកិច្ចសន្យាថ្មីជាផ្លូវការជាមួយកីឡាកររូបនេះ។
ប្រសិនបើ Barcelona នៅតែបន្តកិច្ចសន្យាថ្មី វានឹងធ្វើឱ្យតម្លៃខ្លួនសរុបរបស់ Torres កើនឡើងដល់ប្រហែល ៧៣ លានអឺរ៉ូ ដែលជាចំនួនដ៏ច្រើនហួសហេតុសម្រាប់ក្លិបដែលកំពុងរឹតបន្តឹងការចំណាយ ពិសេសបន្ទាប់ពីពួកគេទើបតែបានទិញចូលកីឡាករ Karim Adeyemi។ ស្ថានភាពបែបនេះ បានធ្វើឱ្យថ្នាក់ដឹកនាំក្លិបកាន់តែជឿជាក់ថា ការលក់រូបគេចេញនៅរដូវក្តៅនេះ គឺជាជម្រើសដ៏ល្អបំផុត ដើម្បីចៀសវាងការបង់ប្រាក់បន្ថែមឱ្យ Man City ផង និងអាចប្រមូលលុយមកវិញបានខ្លះ មុនពេលរូបគេដើរចេញដោយគ្មានតម្លៃខ្លួន។
ស្របពេលជាមួយគ្នានេះ ក្លិប Paris Saint-Germain (PSG) ក្រោមការដឹកនាំរបស់លោក Luis Enrique កំពុងតែតាមដានស្ថានភាពនេះយ៉ាងដិតដល់ ដើម្បីនាំយក Torres ទៅពង្រឹងតំបន់ប្រយុទ្ធនៅបារាំង។ បើតាម Mundo Deportivo បានឱ្យដឹងថា ខ្សែប្រយុទ្ធស្លាបរូបនេះប្រហែលជាបានបើកភ្លើងខៀវយល់ព្រមផ្ទេរទៅកាន់កីឡដ្ឋាន Parc des Princes រួចហើយដែរ ព្រោះវត្តមានរបស់កីឡាករចំណូលថ្មីនៅ Barca អាចនឹងធ្វើឱ្យឱកាសចូលលេងរបស់គេត្រូវកាត់បន្ថយនារដូវកាលខាងមុខ។
កាលពីរដូវកាលមុន Torres ធ្វើបានយ៉ាងល្អដោយចូលរួមចំណែករកគ្រាប់បាល់បាន ២៤ ដង (ស៊ុតបញ្ចូលទី ២១ គ្រាប់ និងជំនួយការ ៣ ដង) ក្នុងការបង្ហាញខ្លួន ៤៩ ប្រកួត។ ចំណែកនៅក្នុងព្រឹត្តិការណ៍ World Cup ជាមួយក្រុមអេស្ប៉ាញវិញ គេត្រូវបានប្រើប្រាស់ជាកីឡាករបម្រុងប្តូរចូលដ៏មានឥទ្ធិពល ដោយបានបង្កើតឱកាសយ៉ាងសំខាន់ជួយឱ្យក្រុមរហស្សនាមគោជល់ (La Roja) យកឈ្នះព័រទុយហ្គាល់ (Portugal) ក្នុងវគ្គ ១៦ ក្រុមចុងក្រោយ។
