Dani Olmo បើកចិត្តរឿងការតស៊ូតាំងពីវ័យ ១៦ ឆ្នាំ រហូតដល់ការគ្រងអាវលេខ ១០ ដឹកនាំអេស្ប៉ាញនៅ World Cup
អត្ថបទសរសេរដោយ Danny • 58 views
ក្រោយពីត្រូវអង្គុយនៅកៅអីបម្រុងក្នុងប្រកួតដំបូងដែលអេស្ប៉ាញបានត្រឹមស្មើ ខ្សែបម្រើប្រយុទ្ធឆ្នើម Dani Olmo បានត្រឡប់មកកាន់ជម្រើស ១១ នាក់ដំបូងវិញក្នុងជំនួបយកឈ្នះអារ៉ាប៊ីសាអូឌីត ហើយបានបង្ហាញពីឥទ្ធិពលយ៉ាងខ្លាំងក្នុងការគ្រប់គ្រងតំបន់កណ្តាល។ នៅក្នុងកិច្ចសម្ភាសន៍ផ្តាច់មុខដ៏វែងមួយ ផ្កាយព្រឹករបស់ក្លិប Barcelona រូបនេះ បានបើកកកាយយ៉ាងលម្អិតពីដំណើរជីវិត យុទ្ធសាស្ត្រលេង និងមហិច្ឆតានៅក្នុងព្រឹត្តិការណ៍ World Cup 2026 នេះ។
នៅពេលរំលឹកកាលពីវ័យ ១៦ ឆ្នាំ ដែលរូបគេត្រូវចាកចេញពីទឹកដី Barcelona ទៅលេងនៅបរទេសទាំងបង្ខំ Olmo បាននិយាយទាំងញញឹមថា៖ «ខ្ញុំមិនចាំថាខ្លួនឯងបានយំស្រែកដាក់ភ្នាក់ងារងារ (Agent) ឬអត់ទេ ប៉ុន្តែវាពិតជាពិបាកខ្លាំងណាស់ក្នុងការចាកចេញពីផ្ទះទាំងវ័យក្មេង។ ទោះជាយ៉ាងណា ខ្ញុំនៅតែជាក្មេងប្រុសម្នាក់ដែលមានក្តីស្រមៃ និងមហិច្ឆតាដដែលគ្រាន់តែមានបទពិសោធន៍ជាងមុន។ ការត្រឡប់មក Barca វិញមិនមែនជាការបិទរង្វង់អាជីពនោះទេ តែវាជាការចាប់ផ្តើមទំព័រថ្មីដ៏អស្ចារ្យ»។
Olmo ក៏បានរំលឹកពីការលំបាកកាលពីឆ្នាំ ២០២១ ដែលរូបគេ និង Pedri ត្រូវញាំញីដោយសារបញ្ហារបួសក្រោយចប់ពានរង្វាន់អឺរ៉ុប និងអូឡាំពិក ប៉ុន្តែវាជាមេរៀនដែលធ្វើឱ្យពួកគេយល់ពីកាយសម្បទាខ្លួនឯងច្បាស់ជាងមុន។ សម្រាប់ការចាប់ដៃគូជាមួយ Pedri លើកនេះ លោកបញ្ជាក់ថាពួកយើងយល់ចិត្តគ្នាខ្លាំងណាស់ ទាំងនៅក្លិប និងជម្រើសជាតិ។ ចំណែកឯទំនាក់ទំនងជាមួយយុវជនទំនើប Lamine Yamal វិញ លោកបានទម្លាយថា៖ «ពួកយើងមិនបាច់និយាយគ្នាច្រើនទេ គឺយល់ចិត្តគ្នាតែតាមរយៈការសម្លឹងមើលភ្នែកប៉ុណ្ណោះ។ ខ្ញុំតែងតែព្យាយាមបើកចន្លោះ និងរត់ទៅជួយផ្ដល់ជម្រើសឱ្យគេនៅពេលត្រូវប្រឈមមុខនឹងខ្សែការពារពីរនាក់»។ លោកក៏បានបន្ថែមទាំងចិត្តស៊ុបថា រូបគេសក្តិសមនឹងពាក់អាវលេខ ១០ ឱ្យអេស្ប៉ាញ (Spain) ក្នុងការប្រកួតនេះ ព្រោះធ្លាប់ជួយក្រុមលើកពានរង្វាន់អឺរ៉ុបជាមួយលេខនេះរួចមកហើយ ដូច្នេះគ្មានហេតុផលអ្វីត្រូវដូរឱ្យទៅ Yamal ឡើយ។
ក្រៅពីនេះ នៅពេលសួរដល់ខ្សែប្រយុទ្ធរបស់ Atletico Madrid កីឡាករ Julian Alvarez ដែលជាគោលដៅផ្ទេររបស់ Barca នោះ Olmo បានកោតសរសើរចំៗថា Alvarez គឺជាកីឡាករកម្រិតពិភពលោក មានគុណភាពខ្ពស់ និងជាម្ចាស់ជើងឯកពិភពលោកដ៏គួរឱ្យគោរពម្នាក់។
ចុងបញ្ចប់ ទាក់ទងនឹងចរិតឫកពារដ៏បន្ទាបខ្លួន ដែលហ្វានៗធ្លាប់ឃើញលោកជិះកង់ជួលតាមផ្លូវអបអរសាទរពានរង្វាន់លីគជាមួយ Pedri និង Inigo នោះ Olmo និយាយថា៖ «ពួកយើងជាមនុស្សធម្មតា ចូលចិត្តដើរលេង និងផឹកកាហ្វេដូចគេឯងដែរ។ ខ្ញុំពិតជាប្រាថ្នាចង់ជិះកង់អបអរសាទរបែបនោះម្តងទៀតណាស់ បើសិនជាពួកយើងអាចឈ្នះ World Cup លើកនេះ។ វាដល់ពេលហើយដែលអេស្ប៉ាញត្រូវស្វែងរកផ្កាយទីពីរ (ជើងឯកពិភពលោកលើកទី ២) មកលម្អលើអាវជម្រើសជាតិ»។
