កំណត់ត្រាដ៏ជូរចត់ចុងក្រោយ! Cristiano Ronaldo លាឈប់ពី World Cup ក្នុងវ័យ 41 ឆ្នាំ ជាមួយស្ថិតិអវិជ្ជមានដែលមិនធ្លាប់មានក្នុងអាជីព
អត្ថបទសរសេរដោយ Danny • 50 views
ដំណើរផ្លូវរបស់កំពូលខ្សែប្រយុទ្ធ Cristiano Ronaldo នៅក្នុងព្រឹត្តិការណ៍ World Cup បានឈានដល់ទីបញ្ចប់យ៉ាងក្រៀមក្រំ ក្រោយពេលក្រុមជម្រើសជាតិព័រទុយហ្គាល់ (Portugal) ត្រូវធ្លាក់ចេញត្រឹមវគ្គ ១៦ ក្រុមចុងក្រោយក្រោមថ្វីជើងអេស្ប៉ាញ។ ទោះបីជាតារាឆ្នើមវ័យ ៤១ ឆ្នាំរូបនេះ រកបាន ៣ គ្រាប់នៅក្នុងព្រឹត្តិការណ៍ឆ្នាំ ២០២៦ នេះក៏ដោយ ប៉ុន្តែស្ថិតិផ្ទាល់ខ្លួនមួយបានលាតត្រដាងពីការធ្លាក់ចុះទម្រង់លេងយ៉ាងខ្លាំងរបស់លោក។
យោងតាមទិន្នន័យពី OptaJoe បានបង្ហាញថា Ronaldo គឺជាខ្សែប្រយុទ្ធតែម្នាក់គត់ដែលបានចំណាយពេលលេងលើសពី ៥០០ នាទី គិតទាំងក្នុងព្រឹត្តិការណ៍ World Cup ឆ្នាំ ២០២២ និង ២០២៦ ប៉ុន្តែមិនដែលអូសបាល់ដាច់ឆ្លងផុតគូប្រកួត (Successful Dribble) បានម្តងណាឡើយ។ ស្ថិតិលេខ «សូន្យ» លើការអូសបាល់នេះ បានបង្ហាញពីការប្រែប្រួលទាំងស្រុងនៃទម្រង់លេងរបស់អតីតម្ចាស់ពានរង្វាន់ Ballon d'Or ៥ សម័យកាល ដែលកាលពីមុនធ្លាប់ជាកីឡាករដ៏មានល្បឿន និងបច្ចេកទេសញាក់វាយលុកដ៏គួរឱ្យខ្លាច ប៉ុន្តែបច្ចុប្បន្នបានក្លាយជាត្រឹមតែខ្សែប្រយុទ្ធរង់ចាំបញ្ចប់ទីក្នុងប្រអប់គ្រោះថ្នាក់ និងជាអ្នកស៊ុតបាល់ពិន័យប៉ុណ្ណោះ។
ការប្រកួតចុងក្រោយរបស់លោកបានបញ្ចប់ទៅទាំងទឹកភ្នែកនៅកីឡដ្ឋាន Cotton Bowl ទីក្រុង Dallas បន្ទាប់ពីចាញ់អេស្ប៉ាញ ១-០។ បរាជ័យនេះបានធ្វើឱ្យលោកដេញទាន់កំណត់ត្រាចាញ់ច្រើនជាងគេនៅ World Cup ចំនួន ៨ ប្រកួត ស្មើនឹង Mathew Leckie និង Son Heung-min។ លោក Ronaldo បានថ្លែងទាំងក្តុកក្តួលថា៖ «ខ្ញុំពិតជាសោកស្តាយដែលត្រូវលាឈប់ពី World Cup បែបនេះ។ នេះជា World Cup ចុងក្រោយរបស់ខ្ញុំហើយ។ មុនពេលមានវត្តមានខ្ញុំ ព័រទុយហ្គាល់មិនដែលឈ្នះពានរង្វាន់ធំអ្វីឡើយ ដូច្នេះពានរង្វាន់អឺរ៉ូឆ្នាំ ២០១៦ គឺមានតម្លៃស្មើនឹងពានរង្វាន់ពិភពលោកសម្រាប់រូបខ្ញុំ»។ ទោះជាយ៉ាងណា លោកបានបញ្ជាក់ថាលោកមានមនសិការស្អាតស្អំ ហើយនឹងចំណាយពេលសម្រាកជាមួយក្រុមគ្រួសារមុនពេលសម្រេចចិត្តពីអនាគតបន្ត។
