Cristiano Ronaldo «អាចក្លាយជាតារា Hollywood?» Cristiano Ronaldo ត្រូវបានគេមើលឃើញថា អាចធ្វើរឿងមួយជោគជ័យដែល Lionel Messi មិនអាចធ្វើបាន

ខ្សែប្រយុទ្ធឆ្នើម Cristiano Ronaldo តែងតែជាមនុស្សដែលចូលចិត្តភាពលេចធ្លោនៅក្រោមពន្លឺភ្លើងក្នុងកីឡដ្ឋាន ប៉ុន្តែនាពេលអនាគត រូបលោកអាចនឹងឈានជើងចូលទៅក្រោមពន្លឺភ្លើងស្ទូឌីយោដ៏ភ្លឺស្វាងនៃពិភពហូលីវូដ (Hollywood) វិញម្តង។ យោងតាមសម្តីរបស់អតីតខ្សែបម្រើជម្រើសជាតិបារាំង លោក Emmanuel Petit បានលើកឡើងថា កំពូលតារាព័រទុយហ្គាល់រូបនេះ មានលក្ខណៈសម្បត្តិពិសេសមួយដែលអាចរុញច្រានរូបគេឱ្យជោគជ័យក្នុងវិស័យភាពយន្ត ដែលជាផ្លូវមួយគូប្រជែងចាស់ Lionel Messi មិនអាចធ្វើទៅរួចឡើយ។

លោក Petit ម្ចាស់ពានរង្វាន់ World Cup ឆ្នាំ ១៩៩៨ បានថ្លែងប្រាប់សារព័ត៌មាន Jackpot City Casino ថា៖ «តួសម្តែងហូលីវូដមែនទេ? Ronaldo អាចធ្វើអ្វីៗគ្រប់យ៉ាងដែលគេចង់ធ្វើ។ ប៉ុន្តែវាខុសស្រឡះពី Lionel Messi។ ខ្ញុំមិនដែលគិតថា Messi អាចឈានជើងចូលក្នុងវិស័យសិល្បៈកម្សាន្តឡើយ ព្រោះលោកជាមនុស្សមិនសូវនិយាយស្តី ឬចូលចិត្តឆ្លើយសំណួរឡើយ ពោលគឺលោកចូលចិត្តរស់នៅឆ្ងាយពីពន្លឺកាមេរ៉ា ខណៈដែល Ronaldo ចូលចិត្តស្ថិតក្នុងចំណុចស្នូលនៃការចាប់អារម្មណ៍បំផុត។ ខ្ញុំគិតថា Ronaldo ពិតជាអាចធ្វើជាតារាសម្តែងបានយ៉ាងពិតប្រាកដ»។ ភាពខុសគ្នានៃបុគ្គលិកលក្ខណៈនេះហើយ ទើបធ្វើឱ្យគេជឿជាក់ថា ខ្សែប្រយុទ្ធរបស់ Al-Nassr រូបនេះ នឹងរីកចម្រើនខ្លាំងនៅ Los Angeles។

ក្រៅពីការជជែកវែកញែករឿងអាជីពសម្តែងរបស់ Ronaldo លោក Petit ក៏បានសម្តែងការព្រួយបារម្ភយ៉ាងខ្លាំងជុំវិញហេដ្ឋារចនាសម្ព័ន្ធ និងអនាគតនៃពានរង្វាន់ពិភពលោក World Cup ផងដែរ បន្ទាប់ពីការប្រកួតឆ្នាំ ២០៣៤ នៅប្រទេសអារ៉ាប៊ីសាអូឌីត។ លោកមានមន្ទិលសង្ស័យចំពោះការខិតខំប្រឹងប្រែងរបស់ FIFA ក្នុងការវាយលុកទីផ្សារថ្មីៗដូចជា ប្រទេសឥណ្ឌា និងចិន ដែលបាល់ទាត់មិនមែនជាវប្បធម៌កីឡាលេចធ្លោរបស់ពួកគេ (ដូចជានៅឥណ្ឌា គឺល្បីល្បាញខាងកីឡាគ្រីឃីត)។ បច្ចុប្បន្ន Ronaldo ក្នុងវ័យ ៤១ ឆ្នាំ កំពុងចំណាយពេលសម្រាកជាមួយក្រុមគ្រួសារ ក្រោយការធ្លាក់ចេញពី World Cup ២០២៦ ក្រោមថ្វីជើងអេស្ប៉ាញ ដើម្បីពិចារណាពីជំហានបន្ទាប់ក្នុងអាជីពរបស់ខ្លួន។