Barcelona ប្រកាសត្រលប់មកកាន់ Spotify Camp Nou ជាផ្លូវការ
អត្ថបទសរសេរដោយ Bonat • 98 views
ក្លិប Barcelona បានបញ្ជាក់ជាផ្លូវការអំពីការ វិលត្រលប់ ទៅកាន់កីឡដ្ឋាន Spotify Camp Nou វិញនៅថ្ងៃ សៅរ៍ នេះ សម្រាប់ការប្រកួត La Liga ទល់នឹងក្រុម Athletic Club បន្ទាប់ពីអវត្តមានអស់រយៈពេលជាងពីររដូវកាល ដោយសារការជួសជុលធំៗ។ ការត្រលប់មកវិញនេះកើតឡើងយឺតជាងការគ្រោងទុក ប៉ុន្តែបន្ទាប់ពីទទួលបាន អាជ្ញាប័ណ្ណ 1B (ដែលអនុញ្ញាតឱ្យបើកកន្លែងអង្គុយបន្ថែម) ក្លិបអាចបើកកីឡដ្ឋានបានក្នុងចំណុះ ៤៥,៤០១ នាក់ (ជិតស្មើនឹងចំណុះនៅកីឡដ្ឋាន Olympic Stadium)។
លោក Joan Laporta ប្រធានក្លិបបានសម្តែងការរំភើបយ៉ាងខ្លាំង ដោយហៅកីឡដ្ឋានដែលបានកែលម្អនេះថាជា "ត្បូងពេជ្រស្ថាបត្យកម្ម" និង "កីឡដ្ឋានល្អបំផុតក្នុងពិភពលោក" ដែលនឹងមានចំណុះសរុប ១០៥,០០០ នាក់ នៅពេលបញ្ចប់ការជួសជុលនៅឆ្នាំ ២០២៧។ ការត្រលប់មកផ្ទះវិញនេះ កើតឡើងចំពេលដែលក្រុមរបស់លោក Hansi Flick កំពុងមានសន្ទុះវិជ្ជមាន ដោយបានឈ្នះ ២ ប្រកួត ជាប់គ្នាក្នុងលីគ។ យ៉ាងណាក៏ដោយ វានៅមិនទាន់ច្បាស់ថា តើ Barca អាចរៀបចំការប្រកួត Champions League នៅទីនោះបាននៅឡើយទេ។
