Barcelona បន្តទុក Lamine Yamal ឱ្យលេងនៅស្លាបស្តាំដដែល ដោយលោក Hansi Flick គ្មានផែនការផ្លាស់ប្តូររូបគេទៅលេងតំណែង False Nine ឡើយ
អត្ថបទសរសេរដោយ Danny • 24 views
យោងតាមការរាយការណ៍ពី El País លោក Hansi Flick មិនមានផែនការប្រើប្រាស់ Lamine Yamal ក្នុងតំណែងប្រយុទ្ធ False Nine នោះទេ ដោយក្រុមការងារគ្រូបង្វឹករបស់ Barcelona បានប្តេជ្ញាចិត្តយ៉ាងមុតមាំក្នុងការរក្សាតារាឆ្នើមវ័យក្មេងរូបនេះឱ្យលេងនៅស្លាបស្តាំដដែលសម្រាប់ពេលបច្ចុប្បន្ន និងទៅអនាគត។
ទោះបីជាលោក Flick ធ្លាប់បានពិសោធដាក់ Yamal ឱ្យលេងនៅតំបន់កណ្តាល ក្នុងការប្រកួត La Liga ទល់នឹង Real Betis កាលពីរដូវកាលមុនក៏ដោយ ប៉ុន្តែ El País បានបញ្ជាក់ថា ការផ្លាស់ប្តូរតំណែងបែបនេះមិនស្ថិតក្នុងផែនការបច្ចុប្បន្នឡើយ។ ក្រុមការងារគ្រូបង្វឹកនៅ Spotify Camp Nou ចូលចិត្តដាក់ Yamal ឱ្យលេងនៅស្លាបស្តាំ ដែលជាកន្លែងរូបគេអាចមានសេរីភាពពេញលេញក្នុងការបង្ហាញជំនាញបណ្តើរបាល់ ល្បឿន និងបច្ចេកទេសដ៏ប៉ិនប្រសប់ ដែលបានធ្វើឱ្យរូបគេក្លាយជាខ្សែប្រយុទ្ធស្លាបដ៏គ្រោះថ្នាក់បំផុតម្នាក់នៅអឺរ៉ុប។
Lamine Yamal ខ្លួនឯងបានទទួលស្គាល់ថា រូបគេរំពឹងថានឹងផ្លាស់ប្តូរពីតំណែងខ្សែប្រយុទ្ធស្លាបស្តាំទៅលេងនៅតំបន់កណ្តាលនាពេលអនាគត ប៉ុន្តែជំហរបច្ចុប្បន្នរបស់ក្លិបគឺធ្វើឡើងតាមសម្រួល និងជាជំហានៗ ដោយមិនមានការប្រញាប់ប្រញាល់ក្នុងការផ្លាស់ប្តូរតំណែងឡើយ។
ការនាំយកកីឡាករថ្មីៗដូចជា Anthony Gordon និង Karim Adeyemi រួមជាមួយវត្តមានរបស់ Raphinha បានធ្វើឱ្យផែនការនេះកាន់តែច្បាស់លាស់។ Barcelona ជឿជាក់ថាកាយសម្បទា និងល្បឿននៃការរត់របស់ខ្សែប្រយុទ្ធទាំងបីរូបនេះ អាចជួយបង្កើតចន្លោះទំនេរសម្រាប់ Yamal ក្នុងការផ្តាច់ប្រយុទ្ធចេញពីស្លាបស្តាំ។ លោក Flick បានរៀបចំរចនាសម្ព័ន្ធតំបន់ប្រយុទ្ធនៅរដូវក្តៅនេះ ដើម្បីគាំទ្រដល់ទម្រង់លេងរបស់ Yamal មិនមែនដើម្បីផ្លាស់ប្តូរតំណែងថ្មីឱ្យរូបគេនោះទេ។ ជាមួយគ្នានេះ Barcelona ក៏នៅតែសង្ឃឹមក្នុងការនាំយក Julián Álvarez ពី Atlético Madrid មកឈរជើងក្នុងតំណែងពាក់អាវលេខ ៩ ផងដែរ ដើម្បីពង្រឹងក្របខ័ណ្ឌយុទ្ធសាស្ត្រនេះឱ្យកាន់តែរឹងមាំ។
